Ап. уджъяс 4 - Коми Библия 2023

Петыр да Иоан веськӧдлан котыр водзын

¹ Кор Петыр да Иоан сёрнитісны йӧзыскӧд, на дінӧ матыстчисны попъяс, крам видзысьяслӧн веськӧдлысьыс да саддукейяс.

² Найӧ скӧралісны, мый апостолъяс велӧдӧны йӧзсӧ да висьтавлӧны, Исус пӧ ловзис, и кулӧмаяс пӧ тшӧтш ловзясны.

³ Найӧ босьтісны Петырӧс да Иоанӧс да йӧртісны асылӧдзыс дзескыдінӧ, ӧд вӧлі рыт нин.

⁴ А кывзысьяс пӧвстысь унаӧн эскисны, и вокъяслӧн лыдыс содіс вит сюрсӧдз.

⁵ Мӧд луннас чукӧртчисны Ерусалимӧ иудейяслӧн юралысьяс, юрнуӧдысьяс да Индӧдӧ велӧдысьяс.

⁶ Сэні вӧліны тшӧтш Аннас аркирей, Каиаф, Иоан, Ӧльӧксандр да аркирей рӧдвужысь мукӧдъяс.

⁷ Найӧ сувтӧдісны апостолъясӧс шӧрас да юалісны: «Кутшӧм вынӧн да код нимӧн ті тайӧс вӧчинныд?»

⁸ Сэки Петыр, коді вӧлі тырӧма Вежа Лолӧн, шуис налы: «Войтырлӧн юралысьяс да юрнуӧдысьяс!

⁹ Талун ті коранныд миянлысь вочакыв, мыйла ми бурсӧ вӧчим висьысь мортлы, и кыдзи сійӧ бурдіс.

¹⁰ Сідзкӧ, ті да став Израиль войтыр, тӧдӧй, мый Назаретса Исус Кристос нимӧн, Сылӧн вын отсӧгӧн, тайӧ мортыс сулалӧ тіян водзын дзоньвидза. Ті тувъялінныд Исус Кристосӧс крестӧ, но Енмыс ловзьӧдіс Сійӧс.

¹¹ Сійӧ эм из, кодӧс ті, керка лэптысьяс, ӧтдортінныд. Но тайӧ изйыс лоис пельӧс изйӧн. И абу мӧд Мездысьыс,

¹² да абу сетӧма йӧзлы енэж улас мӧд нимсӧ, код пыр миянлы позьӧ мездмыны».

¹³ Кор веськӧдлысьяс да юрнуӧдысьяс аддзисны Петыр да Иоанлысь повтӧмлунсӧ да казялісны, мый найӧ велӧдчытӧм йӧз, ёна шензисны. Гӧгӧрвоисны, мый найӧ вӧлӧмаӧсь Исускӧд.

¹⁴ Но Петыр да Иоанкӧд сулалысь бурдӧм морт вылӧ видзӧдігӧн нинӧм паныд шуны эз вермыны.

¹⁵ Сэсся апостолъяслы тшӧктісны петны, а ас костаныс пондісны сёрнитны:

¹⁶ «Мый кутам вӧчны тайӧ йӧзыскӧд? Ӧд став Ерусалимыс тӧдӧ налысь шензьӧданатор вӧчӧмсӧ, ми огӧ вермӧй соссьыны таысь.

¹⁷ Медым юӧрыс водзӧ эз паськав войтырным пӧвстын, чорыда ӧлӧдам найӧс, медым эз висьтавлыны Исус йылысь».

¹⁸ Сэсся бӧр корисны апостолъясӧс да тшӧктісны, мед дугдасны висьтавлыны да велӧдны Исус йылысь.

¹⁹ Петыр да Иоан воча шуисны налы: «Мӧвпыштлӧй асьныд, бур-ӧ тайӧ Ен водзын, ми кӧ Енмӧс дорысь ёнджыка кутам кывзыны тіянӧс.

²⁰ Ми огӧ вермӧй чӧв овны сы йылысь, мый аддзылім да кывлім».

²¹ Чорыда чирыштӧм бӧрын веськӧдлан котыр лэдзис апостолъясӧс. Йӧз вӧснаыс эз вермыны мыждыны найӧс, ӧд ставныс ошкисны Енмӧс тайӧ лоӧмторсьыс.

²² Шензяна ногӧн бурдӧм мортлы вӧлі нелямын сайӧ арӧс.

Эскысьяс кевмысьӧны

²³ Дзескыдінысь петӧм бӧрын Петыр да Иоан мунісны вокъясныс дінӧ. Сэні найӧ висьталісны аркирейяслӧн да юрнуӧдысьяслӧн ӧлӧдӧм йылысь.

²⁴ Найӧс кывзӧм бӧрын ставныс ӧтвылысь шыасисны Ен дінӧ: «Ыджыдӧй, Тэ вӧчин енэжсӧ, мусӧ, саридзсӧ да ставсӧ, мый сэні эм!

²⁵ Миян Давид батьным пыр, Тэнад кесъялысь пыр, Тэ Вежа Ловнад шуин: – Мыйла шызьӧны войтыръяс, мыйла мӧвпалӧны ковтӧмсӧ?

²⁶ Мувывса ӧксыяс ӧтувтчӧны, ыджыдалысьяс кыпӧдчӧны Господьлы паныд да Сылӧн Мавтыштӧмалы паныд.

²⁷ Тайӧ карас Ирӧд да Понтий Пилат збыльысь ӧтувтчисны ентӧдтӧмъяскӧд да Израиль войтыркӧд, сувтісны Тэнад Мавтыштӧмалы, Тэнад вежа Исус Пиыдлы паныд.

²⁸ Найӧ олӧмӧ пӧртісны Тэнсьыд водзвыв шуӧмтӧ да вына лӧсьӧдӧмтӧ.

²⁹ Ӧні, Господьӧй, видзӧдлы налӧн повзьӧдлӧм вылӧ, отсав Аслад кесйӧгъяслы повтӧг висьтавны Тэнсьыд кывтӧ.

³⁰ Нюжӧд китӧ, медым висьысьяс Тэнад вежа Исус Пи нимӧн бурдасны, шензьӧданаторъяс да индысьпасъяс тыдовтчасны».

³¹ Кевмысьӧм бӧрас чукӧртчанінын муыс вӧрзис. Ставныс тырисны Вежа Лолӧн да повтӧг пондісны висьтавны Енлысь кывсӧ.

Ӧти сьӧлӧмӧн олӧм

³² Эскысьяс ставныс вӧліны ӧти лолаӧсь да ӧти сьӧлӧмаӧсь. Некод ассьыс эмбурсӧ эз лыддьы асласӧн, ставыс налӧн вӧлі ӧтувъя.

³³ Апостолъяс ыджыд вынӧн висьтавлісны Господь Исус Кристослӧн ловзьӧм йылысь. Енлӧн ыджыд буралӧмыс вӧлі ставныс вылын.

³⁴ Налы ставыс вӧлі тырмана. Кодлӧн вӧлі керка да видз-му, сійӧ вузаліс ставсӧ, а сьӧмсӧ вайис

³⁵ апостолъяслы. Найӧ быдӧнлы юклісны колана мында.

³⁶ Иосей, Кипрын чужлӧм левит, кодӧс апостолъяс шуисны Варнава нимӧн, мый лоӧ ”бурӧдысь”,

³⁷ тшӧтш вузаліс ассьыс видз-мусӧ да вайис сьӧмсӧ апостолъяслы.