Ап. уджъяс 23 - Коми Библия 2023

Павел веськӧдлан котыр водзын

¹ Павел сюся видзӧдліс веськӧдлан котыр вылӧ да шуис: «Вокъяс! Тайӧ лунӧдзыс ме пыр олі Ен водзын сӧстӧм сьӧлӧмӧн».

² Сэки Ананий нима аркирей тшӧктіс Павел дінын сулалысьӧс кучкыны сылы вомас.

³ Павел шуис сылы: «Тэнӧ Енмыс пондас нӧйтны, еджыдӧн мавтӧм стен! Тэ пуксин мыждыны менӧ Индӧд серти, но ачыд Индӧдыслы паныд сувтан, тшӧктан нӧйтны менӧ».

⁴ Сэні сулалысьяс шуисны Павеллы: «Енлысь аркирейӧс лёкӧдан?»

⁵ Павел воча шуис: «Ме эг тӧд, вокъяс, мый сійӧ аркирей. Дерт, гижӧма: ”Эн лёкӧд ас войтырыдлысь юралысьтӧ”».

⁶ Веськӧдлан котырын вӧліны саддукейяс да фарисейяс. Тайӧс казялӧм бӧрын Павел гораа шыасис: «Вокъяс! Ме ачым фарисей, фарисейлӧн пи. Менӧ мыжалӧны сыысь, мый ме эска кулӧмаяслӧн ловзьӧмӧ».

⁷ Тайӧс кылӧм бӧрын фарисейяс да саддукейяс вензьыны пондісны, тадзи чукӧртчӧмаяс юксисны кык пельӧ.

⁸ Ӧд саддукейяс шуӧны, мый ловзьӧмыс абу, весиг анделъяс и ловъяс абуӧсь, а фарисейяс шуӧны, ставыс пӧ тайӧ эм.

⁹ Вензьысьяс лёкысь горзыны пондісны. Сэки фарисейяс лыдысь Индӧдӧ велӧдысьяс сувтісны да шуисны: «Тайӧ мортыслысь ми нинӧм лёксӧ огӧ аддзӧй. Гашкӧ, збыльысь сыкӧд сёрнитіс Лов либӧ андел. Вайӧ, огӧ пондӧй паныд сувтны Енмыслы».

¹⁰ Но вензьӧмыс ӧтарӧ ӧддзис, сюрс тышкамортӧн веськӧдлысь весиг повзис, мый косявласны Павелӧс. Та вӧсна тшӧктіс шыпуртаяслы босьтны Павелӧс веськӧдлан котыр водзысь да нуӧдны изкарӧ.

¹¹ Сійӧ войнас Господь сувтіс Павел водзӧ да шуис: «Эн пов, Павел. Ӧні тэ Ерусалимын висьталін Ме йылысь, тадзи тэныд ковмас висьтавны тшӧтш Римын».

Павеллы паныд гусьӧн сёрнитчӧм

¹² Асывнас иудейяс пӧвстысь кодсюрӧ ас костаныс сёрнитчӧмӧн кыв сетісны, мый оз кутны сёйны-юны, кытчӧдз оз вины Павелӧс.

¹³ Тадзи шуисны вӧчны нелямын сайӧ морт.

¹⁴ Найӧ локтісны аркирейяс да юрнуӧдысьяс дінӧ да шуисны: «Ми кыв сетім Ен водзын, мый воманым дзик нинӧм огӧ босьтӧй, кытчӧдз огӧ виӧй Павелӧс.

¹⁵ Ӧні тіянлы веськӧдлан котыркӧд колӧ юӧртны сюрс тышкамортӧн веськӧдлысьлы, медым сійӧ аски вайӧдас Павелӧс тіян дінӧ. Шуӧй, мый ті кӧсъянныд бурджыка тӧдмавны, мыйысь сійӧс мыжалӧны. А ми вайӧдігас виам Павелӧс».

¹⁶ Та йылысь кывліс Павел чойлӧн пиыс. Сійӧ муніс изкарӧ, пырис Павел дорӧ да ставсӧ висьталіс.

¹⁷ Сэки Павел корис сё тышкамортӧн веськӧдлысьӧс да шуис: «Тайӧ том мортсӧ колӧ нуӧдны сюрсӧн веськӧдлысь дінӧ, сійӧ мыйкӧ кӧсйӧ висьтавны сылы».

¹⁸ Сёӧн веськӧдлысь вайӧдіс том мортӧс сюрсӧн веськӧдлысь дінӧ да шуис: «Миянын пукалысь Павел корис вайӧдны тайӧ том мортсӧ тэ дінӧ, сійӧ кӧсйӧ мыйкӧ висьтавны».

¹⁹ Сюрсӧн веськӧдлысь босьтіс том мортӧс киӧдыс, сэсся бокӧ вешйӧмӧн юаліс сылысь: «Мый тэ кӧсъян висьтавны?»

²⁰ Сійӧ шуис: «Иудейяс сёрнитчӧмаӧсь корны тэнӧ, медым тэ аски вайӧдін Павелӧс веськӧдлан котыр водзӧ. Найӧ ылӧдлӧмӧн корасны бурджыка тӧдмавны, мыйысь Павелыс мыжа.

²¹ Но тэ найӧс эн кывзы. На чукӧрысь нелямын сайӧ морт кыйӧдӧмӧн лӧсьӧдчӧны вины Павелӧс. Найӧ кыв сетӧмаӧсь, мый оз кутны сёйны-юны, кытчӧдз оз вины сійӧс. Найӧ ӧні дасьӧсь нин, виччысьӧны сӧмын тэнсьыд шуӧмтӧ».

²² Сюрсӧн веськӧдлысь лэдзис том мортӧс да ӧлӧдіс: «Некодлы эн висьтав, мый йылысь тэ меным юӧртін талун».

Павелӧс Кесарияӧ нуӧдӧм

²³ Сюрс тышкамортӧн веськӧдлысь корис сёӧн веськӧдлысьясысь кыкӧс да шуис: «Дасьтӧй кыксё пода тышкамортӧс, сизимдас верзьӧмаӧс да кыксё лыйсьысьӧс. Ӧкмыс час рытын лоӧй дасьӧсь мӧдӧдчыны Кесарияӧ.

²⁴ Павеллы тшӧтш дасьтӧй вӧвъяссӧ да лючки-бура вайӧдӧй сійӧс Феликс юралысь дінӧ».

²⁵ Сюрсӧн веськӧдлысь мӧдӧдіс накӧд татшӧм гижӧд:

²⁶ «Пыдди пуктана Феликс юралысь, тэнӧ чолӧмалӧ Клавдий Лисий.

²⁷ Юӧрта, мый тайӧ мортсӧ босьтісны иудейяс да кӧсйисны вины. Кор ме тӧдмалі, мый сійӧ римса, муні аслам тышкайӧзкӧд да мырдди сійӧс налӧн киысь.

²⁸ Нӧшта кӧсйи тӧдмавны, мыйысь сійӧс мыжалӧны. Тайӧ могнас нуӧді сійӧс налӧн веськӧдлан котыр водзӧ.

²⁹ Тӧдмалі да, вӧлӧмкӧ, мыжалӧны сійӧс асланыс Индӧд понда, налӧн эм вензяна видзӧдлас. Ме ог аддзы сылысь мыжсӧ, мыйысь эськӧ колӧ сійӧс пуксьӧдны дзескыдінӧ да вины.

³⁰ Сэсся кывсис меӧдз, мый иудейяс кыйӧдӧмӧн лӧсьӧдчӧны вины тайӧ мортсӧ. Та вӧсна дзик пыр мӧдӧді сійӧс тэ дінӧ. Мыжалысьяслы тшӧкті тэ водзын висьтавны, мыйысь найӧ мыжалӧны сійӧс. Ло дзоньвидза!»

³¹ Тшӧктӧм серти тышкайӧз войнас нуӧдісны Павелӧс Антипатридаӧ.

³² Асьныс мӧд луннас бӧр локтісны изкарӧ, а Павелӧс верзьӧмаяскӧд мӧдӧдісны водзӧ.

³³ Кесарияӧ воысьяс вайӧдісны Павелӧс сэтчӧс юралысь дінӧ да сетісны сылы гижӧдсӧ.

³⁴ Сійӧс лыддьӧм бӧрын юралысь юаліс Павеллысь, кытысь сійӧ. Кор тӧдмаліс, мый Павел Киликияысь,

³⁵ шуис: «Тэнӧ мыжалысьяс кор локтасны, сэки кывза тэнӧ». Сэсся тшӧктіс нуӧдны Павелӧс дзескыдінӧ Ирӧдлӧн керкаӧ.