Амос 3 - Коми Библия 2023

¹ Израиль войтыр, кывзӧй, мый висьталӧ Господь тіян йылысь, кывзӧй, чужанкотыръяс, кодъясӧс Сійӧ петкӧдіс Египет муысь. Сійӧ шуӧ:

² – Сӧмын тіянӧс Ме бӧрйи мувывса войтыръяс пӧвстысь, та вӧсна Ме мыжда тіянӧс мыжъяссьыныд.

Пророк оз вермы чӧв овны

³ – Петасны-ӧ туйӧ кык морт ӧта-мӧдыскӧд сёрнитчытӧг?

⁴ Равзӧ ӧмӧй вӧрын лев, абу кӧ сылӧн кыйдӧсыс? Кутас ӧмӧй равзыны том лев аслас позйын, эз кӧ нинӧм кый?

⁵ Шедас ӧмӧй пӧтка лэчкӧ, оз кӧ некод лэчсӧ окты? Вӧрзьылас ӧмӧй дзугйыс, нинӧм кӧ сэтчӧ оз шед?

⁶ Карас кӧ кылӧ буксан шы, войтырыс ӧмӧй оз повзьы? Суас-ӧ карӧс шог, оз кӧ Господь тайӧс лэдз?

⁷ Господь Ыджыдыс нинӧм оз вӧч, оз кӧ восьт гусяторсӧ Аслас кесйӧгъяслы, пророкъяслы.

⁸ Лев кӧ равӧстас, коді нӧ оз повзьы? Господь Ыджыдыс кӧ висьталас, коді нӧ оз пророкав?

Господь мыждӧ Самария кар

⁹ Юӧртӧй Азот изкарын олысьяслы, египетса каръясын олысьяслы шуӧй: – Чукӧртчӧй Самария керӧсъяс вылӧ, видзӧдлӧй, кутшӧм шызьӧм да дзескӧдӧм сэні!

¹⁰ Дзескӧдӧмӧн да мырддялӧмӧн найӧ чукӧртӧны озырлун асланыс ыджыд керкаясӧ, веськыда вӧчны найӧ оз кужны, – висьталӧ Господь. –

¹¹ Та вӧсна Господь Ыджыдыс тадзи висьталӧ: – Мутӧ кытшалас вӧрӧг, вӧчас тэнӧ вынтӧмӧн, куштас ыджыд керкаястӧ.

¹² Господь тадзи висьталӧ: – Кыдзи ыж видзысь нетшыштӧ лев вомысь сӧмын ыжлысь коксӧ либӧ пельсӧ, тадзи мездмас сӧмын колясыс сійӧ израильсаясысь, кодъяс Самарияын пукалӧны небыд пуклӧсын, Дамаскысь вайӧм юрлӧсъяс вылын.

¹³ Кывзӧй да ӧлӧдӧй Яковлысь рӧдсӧ, – висьталӧ Господь Ыджыдыс, Ен Саваоф. –

¹⁴ Сійӧ лунӧ, кор Ме мыжда Израиль войтырӧс налӧн мыжъясысь, Ме бырӧда Вефильысь висьпуктанінъяс. Висьпуктанінлысь сюръяссӧ керыштасны да шыбитасны муӧ.

¹⁵ Ме бырӧда тӧвся и гожся керкаяс, слӧн лыӧн мичмӧдӧм керкаяс киссясны. Уна керка жмуткысяс, – висьталӧ Господь.