Аггей 2 - Коми Библия 2023

Выль крамлӧн мичлун

¹ Дарий ӧксылӧн мӧд веськӧдлан воӧ, сизимӧд тӧлысьлӧн кызь ӧтиӧд лунӧ Аггей пророк пыр вӧлі Господьсянь кыв:

² «Висьтав Шеалтиэллӧн Зоровавель пилы, Иуда муын юралысьлы, да Иоседеклӧн Исус пилы, аркирейлы, тшӧтш коляс войтырыслы:

³ – Коді тіян пӧвстысь аддзыліс воддза крамлысь мичлунсӧ? Кутшӧмӧн ті ӧні аддзанныд сійӧс? Абу-ӧ сійӧ тіян син водзын нинӧм кодь?

⁴ Но тэ, Зоровавель, ёнмӧдчы, – висьталӧ Господь, – ёнмӧдчы, Исус аркирей, Иоседеклӧн пиыс! Ёнмӧдчы, тайӧ муас олысь войтыр, – висьталӧ Господь. – Вӧчӧй ассьыныд уджнытӧ, ӧд Ме тіянкӧд, – висьталӧ Господь Саваоф. –

⁵ Египетысь тіян петігӧн Ме кӧсйысьлі, мый Менам Лолӧй лоӧ тіянкӧд. Сідзкӧ, энӧ полӧй!

⁶ Господь Саваоф тадзи висьталӧ: – Регыд Ме нӧшта ӧтчыдысь вӧрзьӧда енэжсӧ и мусӧ, саридзсӧ и косінсӧ.

⁷ Ме пыркнита став войтыръяссӧ, и найӧ ваясны ассьыныс озырлунсӧ крамӧ. Ассьым крамӧс Ме тырта дзирдлунӧн, – висьталӧ Господь Саваоф. –

⁸ Став эзысь-зарниыс – Менам, – висьталӧ Господь Саваоф. –

⁹ Тайӧ крамыслӧн дзирдлуныс лоӧ воддза дорсьыс на мичаджык, – висьталӧ Господь Саваоф. – Тані Ме сета лӧньлун да бур олӧм, – висьталӧ Господь Саваоф».

¹⁰ Дарийлӧн мӧд веськӧдлан воӧ, ӧкмысӧд тӧлысьлӧн кызь нёльӧд лунӧ Аггей пророклы вӧлі Господьсянь кыв:

¹¹ «Господь Саваоф тадзи висьталӧ: юав попъяслысь, мый Индӧдыс висьталӧ та йылысь.

¹² Шуам, паськӧм дорышас гартыштӧмӧн морт нуӧ вежӧдӧм яй. Сылӧн паськӧм дорышыс кӧ инмылас няньӧ, пуӧмторйӧ, винаӧ, выйӧ либӧ мукӧд сёянӧ, лоӧ-ӧ тайӧ сёяныс вежа?» Попъяс вочавидзисны: «Оз».

¹³ Аггей водзӧ юаліс: «А тайӧ сёяныс дінӧ кӧ инмӧдчылас морт, коді пежасис кулӧм морт дінӧ инмӧдчылӧм вӧсна, лоӧ-ӧ тайӧ сёяныс пеж?» Попъяс вочавидзисны: «Лоӧ».

¹⁴ Сэки Аггей шуис: «Дзик татшӧм жӧ Ме водзын тайӧ войтырыс, – висьталӧ Господь. – Татшӧмӧсь жӧ налӧн уджъясныс да вайӧмторъясныс, ставыс пеж».

Господь кӧсйысьӧ бурсины Ассьыс войтырсӧ

¹⁵ – Ӧні видзӧдлӧй, мый лоӧ тайӧ лунсяньыс да водзӧ. Видзӧдлӧй, мый вӧлі тайӧ кадӧдзыс, кор Господьлӧн крамын абу на вӧлі пуктӧма из вылӧ из.

¹⁶ Ті вӧлі мунанныд нянь йӧртӧдӧ, медым босьтны сэтысь кызь куд мында шобді, а сэні сӧмын дас куд мында. Ті вӧлі мунанныд виноград пычкан гу дорӧ, медым гумовтны сэтысь ветымын литра вина, а сэні сӧмын кызь литра.

¹⁷ Сотысь тӧвруӧн, висьӧмӧн да шерӧн Ме бырӧдлі тіян видз-му вылысь няньнытӧ да став быдтаснытӧ, но ті энӧ бергӧдчӧй Ме дінӧ, – висьталӧ Господь.

¹⁸ Ӧні видзӧдлӧй, мый водзӧ лоӧ тайӧ лунсяньыс, ӧкмысӧд тӧлысьлӧн кызь нёльӧд лунсянь, кор вӧлі пуктӧма подувсӧ Господьлӧн крамлы.

¹⁹ Нянь йӧртӧдын ӧмӧй эм на кӧйдысыс? Виноград да инжир пу, гранат да олив пу ӧнӧдз на эз вайлыны вотӧссӧ, но ӧнісянь Ме бурсиа тіянӧс.

Зоровавель йылысь Господьлӧн кыв

²⁰ Ӧкмысӧд тӧлысьлӧн кызь нёльӧд лунӧ Аггейлы мӧдысь вӧлі Господьсянь кыв:

²¹ – Висьтав Зоровавельлы, Иуда муын юралысьлы: Ме вӧрзьӧда енэжсӧ и мусӧ,

²² путкыльта ӧксыяслысь юралан пуклӧснысӧ, мукӧд войтыръясӧс вӧча вынтӧмӧн. Ме путкыльта тарантасъяс да сэні пукалысьясӧс, вӧвъяс да верзьӧмаяс усясны тышын.

²³ Сійӧ лунӧ, – висьталӧ Господь Саваоф, – Ме босьта тэнӧ, Шеалтиэллӧн Зоровавель пи, босьта тэнӧ, Ассьым кесйӧгӧс, – висьталӧ Господь, – да вӧча тэнӧ чунькытшӧн, кӧні лоӧ Менам пасӧй, ӧд Ме бӧрйи тэнӧ, – висьталӧ Господь Саваоф.