2 Коринфӧ 13 - Коми Библия 2023

Павеллӧн туйдӧдӧм да бурсиӧм

¹ Ме коймӧдысь нин мӧдӧдча тіян дінӧ. Гижӧдыс висьталӧ: «Ставсӧ колӧ подулавны кык либӧ куим мортлӧн висьталӧмӧн».

² Водзынсӧ волігӧн ме ӧлӧдлі нин мыжсӧ вӧчысьясӧс. Ӧні, кор тіянысь ылын, нӧшта на гижа налы, тшӧтш мукӧдыслы: выльысь локтігӧн ог жалит тіянӧс!

³ Ті кӧсъянныд тӧдны, збыльысь-ӧ Кристос сёрнитӧ ме пыр. Сійӧ абу вынтӧм тіян водзын, Ассьыс вынсӧ Сійӧ петкӧдлӧ тіян пӧвстын.

⁴ Крестӧ тувъялігӧн Сійӧ вӧлі вынтӧм, ӧні Ен вынӧн Сійӧ ловъя. Ми Кристос пытшкынӧсь, сідзкӧ, ми тшӧтш вынтӧмӧсь, но Сыкӧд олам Ен вынӧн, медым кесъявны тіянлы.

⁵ Тӧдмалӧй асьнытӧ, эм-ӧ тіян эскӧмныд? Видзӧдлӧй сьӧлӧманыд! Ті ӧмӧй онӧ тӧдӧй, мый Исус Кристос тіян пытшкын! Абу кӧ тадз, сідзкӧ, ті абу найӧ, кодъясӧн колӧ лоны тіянлы.

⁶ Но ме чайта, мый ті тӧданныд: ми найӧ, кодъясӧн колӧ лоны миянлы.

⁷ Ми кевмам Енлы, медым ті энӧ вӧчӧй некутшӧм лёктор. Ми огӧ кевмӧй сы могысь, медым петкӧдлыны асьнымӧс сэтшӧмӧн, кутшӧмӧн колӧ лонысӧ, но кевмам, медым ті вӧчинныд бурсӧ весиг сэки, ми кӧ абу сэтшӧмӧсь, кутшӧмӧн колӧ лоны миянлы.

⁸ Ми нинӧм огӧ вермӧй вӧчны збыльыслы паныд, ми сулалам збыльыс дор.

⁹ Ми нимкодясям, ті кӧ вынаӧсь, а ми вынтӧмӧсь. Дзик та вӧсна кевмысям, мед ті быдторйын вежсинныд бурланьыс.

¹⁰ Ставсӧ тайӧс водзвыв гижа, медым, кор воа тіянӧ, меным эз ковмы чорыдлунӧн ыджыдавны тіян вылын. Ӧд Господь пуктіс менӧ ыджыдавны тіянӧс ёнмӧдӧм могысь, эз жугӧдӧм могысь.

¹¹ Вокъяс, нӧшта висьтала тіянлы: нимкодясьӧй, вежсьӧй бурланьыс, сибӧдӧй меньсьым ышӧдана кывъясӧс, олӧй лӧня да ӧти сьӧлӧмӧн. Сэки муслунсӧ да лӧньлунсӧ сетысь Ен лоас тіянкӧд.

¹² Чолӧмалӧй ӧта-мӧднытӧ вежа окыштӧмӧн. Тіянлы ыстӧ чолӧм став вежа войтырыс!

¹³ Миян Господь Исус Кристослӧн буралӧмыс, Ен Батьлӧн муслуныс да Вежа Ловлӧн ӧтувтӧмыс ставныдкӧд тіянкӧд. Аминь.