2 Коринфӧ 10 - Коми Библия 2023

Павел дорйӧ ассьыс кесъялӧмсӧ

¹ Ӧткымынӧн ме йылысь шуӧны, мый ме, Павел, на дінын рам, а кор ылын наысь, сэки ме чорыд накӧд. Но ме шыася тіян дінӧ Кристос бурлунӧн да мелілунӧн.

² Кора тіянӧс: кывзӧй менӧ, мед тіянӧ локтігӧн меным эз ковмы чорзьӧдчыны. Дерт, ӧткымынкӧд ковмас чорыда сёрнитны, ӧд найӧ шуӧны, мый ми олам тайӧ муюгыдсаыс моз.

³ Кӧть ми олам тайӧ муюгыдас, но вермасям огӧ муюгыдсаыс моз.

⁴ Миян вермасянторным абу мортсянь, сыын эм Енлӧн выныс. Ми жугӧдам сійӧн чорыд мытшӧдъяс, ковтӧм мӧвпъяс,

⁵ да став кыпӧдчӧмсӧ, мый паныд сувтӧ Енсӧ тӧдмалӧмлы. Ми топӧдам быдпӧлӧс мӧвпъяс, медым найӧ кывзысисны Кристослысь.

⁶ Ми дасьӧсь мыждыны быдпӧлӧс кывзысьтӧмлунысь, но сӧмын сэки, кор ті асьныд кутанныд тырвыйӧ кывзысьны.

⁷ Видзӧдлӧй ас выланыд: коді зумыда эскӧ, мый сійӧ Кристослӧн, мед тӧдӧ, мый ми тшӧтш Кристослӧн.

⁸ Меным абу яндзим, весиг кӧ ёнджыка на ошйыся. Ӧд ме ошйыся сыӧн, мый Господь пуктіс миянӧс ыджыдавны тіянӧс ёнмӧдӧм могысь, эз жугӧдӧм могысь.

⁹ Ме ог кӧсйы, мед ті мӧвпалінныд, быттьӧ аслам гижӧдъясӧн повзьӧдла тіянӧс.

¹⁰ Кодсюрӧ шуӧны, мый гижӧдъясам ме чорыд да вына, а на дінын ме жеб, и сёрниӧй менам вынтӧм.

¹¹ Тадзи мӧвпалысь мед тӧдӧ: кутшӧмӧсь ми гижӧдын, сэтшӧмӧсь и тіян дінын.

¹² Ми огӧ лысьтӧй орччӧдны асьнымӧс либӧ ӧткодявны асьнымӧс вывтіасьысьяскӧд. Найӧ видзӧдӧны сӧмын ас выланыс да донъялӧны асьнысӧ ас сертиныс. Тадзи вӧчигӧн найӧ петкӧдлӧны ассьыныс мывкыдтӧмлунсӧ.

¹³ Ми огӧ ошйысьӧй этш тӧдтӧг. Ошйысям сӧмын сійӧн, мый Енмыс шуис вӧчны миянлы. Сійӧ тшӧктіс уджавны тшӧтш тіян пӧвстын.

¹⁴ Ми огӧ торкалӧй Енлысь шуӧмсӧ. Ми кӧ эгӧ локтӧй тіян дінӧ, артмис эськӧ торкалӧм, но ми локтім тіян дінӧ Кристослӧн Бур Юӧрнас.

¹⁵ Ми огӧ ошйысьӧй этш тӧдтӧг, огӧ ошйысьӧй мукӧдлӧн уджъясӧн, но лача кутам, кор тіян эскӧмныд ёнмас, сэки миян уджыс ёнджыка на паськалас тіян пӧвстын.

¹⁶ Сэки ми вермам водзӧ мунны да висьтавлыны Евангелльӧсӧ, а огӧ кутӧй мукӧдлӧн уджъясӧн ошйысьны.

¹⁷ Ӧд шуӧма: «Ошйысьысь мед ошйысьӧ Господьӧн».

¹⁸ Шогмана абу сійӧ, коді асьсӧ ошкӧ, а кодӧс ошкӧ Господь.