2 Каднебӧг 7 - Коми Библия 2023

Крам вежӧдӧм

¹ Кор Соломон помаліс кевмысьӧмсӧ, енэжсяньыс лэччис би да ньылыштіс сотан да мукӧд висьяс, и Господьлӧн дзирдлуныс тыртіс крамсӧ.

² Попъяс эз вермыны пырны Господьлӧн крамӧ, ӧд крамыс вӧлі тырӧма Господьлӧн дзирдлунӧн.

³ Кор Израиль войтыр аддзис енэжсяньыс лэччысь би да крам вылысь Господьлысь дзирдлунсӧ, найӧ кымынь уськӧдчисны муас да копыртчӧмӧн ошкисны Господьӧс: «Сійӧ бур, Сылӧн буралӧмыс оз помасьлы!»

⁴ Ӧксы да став войтырыс вайисны висьяс Господьлы.

⁵ Соломон ӧксы вайис вись пыдди кызь кык сюрс ӧшкӧс да сё кызь сюрс ыжӧс. Тадзи ӧксы да став войтырыс вежӧдісны Енлысь крамсӧ.

⁶ Попъяс сулалісны асланыс кесъяланінын, а левитъяс сулалісны шылада ворсанторъясӧн. Налысь ворсанторъяссӧ вӧлі вӧчӧма Давид ӧксыалӧм дырйи на. Господьӧс ошкисны Давидлӧн кывъясӧн: «Сылӧн буралӧмыс оз помасьлы». Трубаясӧ тутсысь попъяс сулалісны левитъяс водзвылын. Став Израиль войтырыс сулаліс.

⁷ Соломон вежӧдіс Господьлӧн крам йӧрлысь шӧр юкӧнсӧ, сотіс сэні сотан висьяс да бурасян вись пыдди вайӧм пемӧсъяслысь госсӧ. Ӧд Соломон тшӧктӧм серти вӧчӧм ыргӧн висьпуктанін вылӧ эз тӧр сотан вись, нянь вись да пемӧсъяслӧн госыс.

⁸ Сійӧ лунъясӧ Соломон став Израиль войтыркӧд пасйис сизимлунся гаж. Лево-Хаматсянь Египет мудорса шорӧдз израильсаяс чукӧртчисны Соломонкӧд ӧтвыв тайӧ гаж вылас.

⁹ Сизим лун чӧж найӧ вежӧдісны висьпуктанінсӧ, сэсся сизим лун чӧж гажӧдчисны. А гаж заводитчӧмсянь кӧкъямысӧд луннас налӧн вӧлі чукӧртчӧм.

¹⁰ Сизимӧд тӧлысьлӧн кызь коймӧд лунӧ Соломон ӧксы лэдзис войтырсӧ гортаныс. Найӧ мунісны долыд сьӧлӧмӧн, нимкодясисны став бурсьыс, мый Господь вӧчис Давидлы, Соломонлы да Аслас Израиль войтырлы.

Господь петкӧдчӧ Соломонлы

¹¹ Соломон помаліс вӧчны Господьлысь крамсӧ да ассьыс ӧксы керкасӧ. Мый Соломон кӧсйис вӧчны Господьлӧн крамын да аслас керкаын, ставыс артмис.

¹² Войнас Господь петкӧдчис Соломонлы да шуис: «Ме кылі тэнсьыд кевмысьӧмтӧ да бӧрйи тайӧ местасӧ, медым тані вӧлі крам, кӧні кутасны вайны висьяс.

¹³ Ме кӧ тупка енэжсӧ, и зэрыс оз ло, Ме кӧ тшӧкта саранчалы сёйны мувывса быдтассӧ, Ме кӧ мӧдӧда Аслам войтыр вылӧ пӧрӧс висьӧм,

¹⁴ и Менам нимӧн пасйӧм войтырӧй кӧ раммӧдчас, шыасяс Ме дінӧ кевмысьӧмӧн, эновтчас аслас лёк туйясысь да кутас корсьны Менӧ, сэки Ме кыла найӧс енэжсяньыс, прӧстита налысь мыжсӧ да бурдӧда налысь мусӧ.

¹⁵ Ӧні Менам синмӧй аддзӧ, Менам пельӧй кылӧ тайӧ крамас кевмысьӧмсӧ.

¹⁶ Ме бӧрйи да вежӧді тайӧ крамсӧ, медым сэні пыр вӧлі Менам нимӧй. Менам синмӧй пыр кутас видзӧдны сы вылӧ, сійӧ пыр лоӧ Менам сьӧлӧмын.

¹⁷ Кутан кӧ тэ ветлыны Менам чужӧмбан водзын Давид батьыд моз, кутан кӧ вӧчны ставсӧ, мый Ме тшӧкта тэныд, кутан кӧ овны Менам индӧд-тшӧктӧмъяс серти,

¹⁸ сэки Ме зумыдмӧда тэнсьыд ӧксыалӧмтӧ, кыдзи ме кӧсйысьлі тэнад Давид батьлы. Ме шулі сылы, мый сылӧн рӧдысь петӧм морт кутас пыр юравны Израильын.

¹⁹ Но ті кӧ кежанныд Меысь да эновтанныд Менсьым индӧд-тшӧктӧмъясӧс, мый Ме сеті тіянлы, кутанныд кӧ кесъявны да юрбитны мукӧд енъяслы,

²⁰ сэки Ме нетшышта тіянӧс Аслам му вылысь, мый Ме сеті тіянлы. А тайӧ крамсӧ, мый Ме вежӧді-торйӧді Аслым, Ме ӧтдорта Аслам чужӧмбан водзысь да серамтуйӧ пукта войтыръяс пӧвстын.

²¹ Тайӧ ыджыд крам дінті мунысь весьӧпӧрӧмӧн юалас: ”Мый вӧсна нӧ Господь тадзи вӧчис тайӧ муыскӧд да тайӧ крамыскӧд?”

²² Сылы вочавидзасны: ”Израиль войтыр эновтіс Господьӧс, асланыс батьяслысь Енсӧ, коді петкӧдіс найӧс Египет муысь. Найӧ сирасисны мукӧд енъяс дінӧ, юрбитісны-кесъялісны налы. Та вӧсна Господь ыстіс налы став тайӧ лёксӧ”».