2 Каднебӧг 5 - Коми Библия 2023

¹ Господьлысь крам лэптӧмсӧ помалӧм бӧрын Соломон вайис сэтчӧ Давид батьыслысь вежа козинъяс. Эзысь-зарни да став дозмук-кӧлуйсӧ сійӧ пуктіс Енлӧн крамса озырлун видзанінӧ.

Йитӧд кудсӧ крамӧ вайӧм

² Соломон корис Ерусалимӧ израильса юрнуӧдысьясӧс, быд чужанкотырысь юралысьӧс да рӧдкутысьясӧс, медым вайны Давид карысь, мӧд ногӧн кӧ, Сионысь, Господьлысь Йитӧд кудсӧ.

³ Гажӧдчан лунъяс дырйи, волӧн сизимӧд тӧлысьӧ, израильсаяс чукӧртчисны Соломон ӧксы дінӧ.

⁴ Израильса юрнуӧдысьяслӧн локтӧм бӧрын левитъяс босьтісны Йитӧд кудсӧ,

⁵ вежа чомсӧ да вежа дозмук-кӧлуйсӧ, мый вӧлі вежа чомйын, да ставсӧ тайӧс попъяскӧд нуисны крамӧ.

⁶ Соломон ӧксы да Йитӧд куд водзӧ чукӧртчӧм Израиль войтыр вайисны вись пыдди ыж-кӧзаӧс да ӧш-мӧскӧс. Пемӧсыс вӧлі сы мында, мый некод эз вермы лыддьынысӧ.

⁷ Попъяс пыртісны Господьлысь Йитӧд кудсӧ крамлӧн пыді вежӧсӧ – Вежасьыс-вежаинӧ – да пуктісны сійӧс индӧм местаӧ херувимъяслӧн бордъяс улӧ.

⁸ Херувимъяслӧн бордъясыс вӧлі шевкнитчӧмаӧсь Йитӧд куд весьтын. Бордъяснаныс найӧ вевттисны кудсӧ да куд новлӧдлан потшъяссӧ.

⁹ Потшъясыс вӧліны сэтшӧм кузьӧсь, мый налысь помсӧ мортыс вермис аддзыны Вежасьыс-вежаин водзвылын ортсы вежӧсас сулалігӧн. Но ылыстчыны кӧ, потшъясыс эз тыдавны. Йитӧд кудйыс ӧнӧдз сэні сулалӧ.

¹⁰ Кудйын вӧлі сӧмын кык изпӧв, найӧс сэтчӧ Хорив керӧсын пуктыліс Мӧисей. Буретш сэні Израиль войтырлӧн Египетысь петӧм бӧрын Господь кӧрталіс накӧд йитӧд.

¹¹ Быд котырысь крамӧ локтӧм попъяс вӧлі вежӧдӧмаӧсь-сӧстӧммӧдӧмаӧсь асьнысӧ. Кор попъяс петісны вежаинысь,

¹² сьылысь-ворсысь левитъяс – Асаф, Еман, Едутун, налӧн пиянныс да вокъясныс – ставныс сулалісны висьпуктанін асывладорын. На вылын вӧлі вӧсни шабді дӧраысь паськӧм. Найӧ ворсісны кимвалӧн, арфаӧн да гуслиӧн. Накӧд орччӧн сё кызь поп тутсісны трубаясӧ.

¹³ Труба шыыс да сьылан шыыс юргисны ӧтмоза, ӧти шыӧн. Тадзи найӧ ошкисны-нимӧдісны Господьӧс. Кор кыліс трубалӧн тутсан шыыс, кимваллӧн да мукӧд ворсанторлӧн шыыс, кор пондісны сьывны-ошкыны Господьӧс: «Сійӧ бур, Сылӧн буралӧмыс оз помасьлы», сэки Господьлысь крамсӧ тыртіс кымӧр.

¹⁴ Кымӧр вӧсна попъяс эз вермыны водзӧ кесъявны, ӧд Господьлӧн дзирдлуныс тыртіс крамсӧ.