2 Каднебӧг 37 - Коми Библия 2023

Иудаса Манассей ӧксылӧн кевмысьӧм, кор сійӧ вӧлі пленын Вавилонын

¹ [Господьӧй, Ставсӧвермысьӧй, Тэ – миян батьяслӧн Ен, Ӧвраамлӧн, Исааклӧн да Яковлӧн Ен да насянь чужысь веськыда олысьяслӧн Ен!

² Тэ вӧчин енэжсӧ да мусӧ став налӧн мичлуннас, Аслад шуӧмӧн Тэ дорин саридзсӧ, Тэ тупкин пыдӧстӧмин, кӧрталін сійӧс Аслад повзьӧдана да ошкана нимнад. Тэнад нимысь ставныс полӧны, Тэнад вынысь ставныс дзӧрӧны-тіралӧны. Тэнад помтӧм-дортӧм да шензьӧдана дзирдлуныд водзын да Тэнад скӧрлуныд водзын некод оз вермы сулавны,

³ ӧд Тэ повзьӧдан мыж вӧчысьясӧс.

⁴ Но Тэнад кӧсйысьӧм буралӧмыд помтӧм-дортӧм да вежӧрӧ тӧртӧм.

⁵ Господьӧй, Тэ – медыджыдыс, Тэ – бур сьӧлӧма, дыр терпитысь, Тэнад буралӧмыд ыджыд, Тэ бӧр босьтан мортлы мӧдӧдӧм шогсӧ. Господьӧй, Тэ вывті бур, Тэ кӧсйысин сетны позянлун бергӧдчыны мыжысь,

⁶ Тэ кӧсйысин прӧститны Тэ водзын мыжаясӧс, Аслад ыджыд буралӧмыд вӧсна Тэ сетін мыжаяслы позянлун бергӧдчыны да мездмыны. Господьӧй, веськыда олысьяслӧн Енмӧй, Тэ эн тшӧкты бергӧдчыны веськыда олысьяслы –

⁷ Ӧвраамлы, Исааклы да Яковлы, кодъяс эз вӧчны мыжсӧ Тэныд паныд, – но Тэ тшӧктан бергӧдчыны меным, мыжа мортлы, ӧд ме уна мыж вӧчи, менам мыжъясӧй саридздор лыа дорысь унджык на.

⁸ Господьӧй, менам мыжъясӧй лыдтӧм-тшӧттӧмӧсь, ме вывті уна лёксӧ вӧчи, та вӧсна ме ог шогмы видзӧдны енэжас. Менӧ личкӧны кӧрт чепъяс,

⁹ ме ог вермы весиг юрӧс кыпӧдны, меным абу шойччӧгыс, ӧд ме скӧрмӧді Тэнӧ, вӧчи Тэ водзын лёксӧ.

¹⁰ Ме эг ов Тэнад кӧсйӧм серти, эг кутчысь Тэнад тшӧктӧмъясӧ, ме сувтӧді бӧлбанъясӧс, вӧчи сійӧ, мый Тэ мустӧмтан. Ӧні став сьӧлӧмсянь ме копыртча Тэ водзӧ, кора Тэнӧ бурсьӧлӧмтчыны ме дінӧ.

¹¹ Господьӧй, ме мыж вӧчи, ме мыжа Тэ водзын, ме тӧда ассьым лёк вӧчӧмъясӧс, но кора-кевма Тэнӧ, прӧстит менӧ, Господьӧй, прӧстит, эн скӧрав ме вылӧ лёк вӧчӧмъясӧй вӧсна, вунӧд найӧс пыр кежлӧ, эн мыжды менӧ, эн шыбит пыдӧстӧминӧ, ӧд Тэ, Енмӧй, мыжысь бергӧдчысьяслӧн Ен. Петкӧдлы ыджыд бурлунтӧ менам олӧмын, Аслад ыджыд буралӧмыд кузя мезды менӧ, шогмытӧмӧс. Сэки став олӧм чӧж ме кута ошкыны Тэнӧ.

¹² Ӧд Тэнӧ ошкӧны енэжвыв вынъяс, Тэнад дзирдлуныд мед лоӧ нэмъяс чӧж. Аминь!]