2 Каднебӧг 33 - Коми Библия 2023

Иуда муын Манассейлӧн ӧксыалӧм

¹ Ӧксыӧ пуксигас Манассейлы вӧлі дас кык арӧс. Ветымын вит во чӧж сійӧ юраліс Ерусалимын.

² Манассей вӧчис Господь водзын шогмытӧмсӧ. Сійӧ вӧчис пежсӧ войтыръяс моз, кодъясӧс Господь вӧтліс Израиль войтыр водзысь.

³ Манассей выльысь вӧчис вись ваян мылькъяс, кодъясӧс бырӧдліс Езекей батьыс. Лэптіс Ваал идолъяслы висьпуктанінъяс, сувтӧдіс юрбитан пуяс, юрбитіс енэжвыв вынъяслы.

⁴ Манассей сувтӧдіс идолъяслы висьпуктанінъяс тшӧтш Господьлӧн крамӧ, мый йылысь Господь шуліс, Ерусалимын пӧ лоас Менам нимӧйлы оланін нэмъяс чӧж.

⁵ Господьлӧн крам кыкнан йӧрас Манассей сувтӧдіс енэжвыв вынъяслы висьпуктанінъяс.

⁶ Бен-Хинном ковтысын Манассей сотліс биын ассьыс пиянсӧ. Сійӧ кимӧститчис, тунасис, тшыкӧдчис да шыасьліс кулӧмаӧс корысьяс да тунасьысьяс дінӧ. Сійӧ вӧчис Господь водзын уна шогмытӧмсӧ, и тайӧн дӧзмӧдіс Господьӧс.

⁷ Манассей вӧчӧдіс бӧлбанӧс да сувтӧдіс сійӧс Енлӧн крамӧ, мый йылысь Ен шуліс на Давидлы да сылӧн Соломон пилы: «Тайӧ крамас да Ерусалим карын, мый Ме бӧрйи Израиль чужанкотыръяслӧн став карыс пӧвстысь, лоас Менам нимӧй нэмъяс чӧж.

⁸ Израиль войтыр кӧ кутас овны сы серти, мый Ме тшӧкті налы, Мӧисей пыр сетӧм индӧд-тшӧктӧмъяс серти, Ме ог вӧтлы найӧс сійӧ мусьыс, мый Ме сеті налӧн батьяслы».

⁹ Иуда войтырӧс да Ерусалимын олысьясӧс Манассей кежӧдіс лёкас. Найӧ вӧчисны лёксӧ унджык на сійӧ войтыръясыс дорысь, кодъясӧс Господь бырӧдіс Израиль войтыр водзысь.

¹⁰ Господь ӧлӧдліс Манассейӧс да Ассьыс войтырсӧ, но найӧ эз кывзыны Сійӧс.

¹¹ Сэки Господь мӧдӧдіс налы паныд ассурса ӧксылӧн тышкайӧзлысь юралысьясӧс. Найӧ дорисны Манассейлысь ки-коксӧ чепъясӧн да нуӧдісны сійӧс Вавилонӧ.

¹² Сьӧкыдалігас Манассей кутіс кевмысьны Господьлы, аслас Енлы. Сійӧ раммӧдчис аслас батьяслӧн Ен водзын.

¹³ Манассей кевмысис Енлы, и Енмыс кыліс сылысь кевмӧмсӧ да бӧр бергӧдіс сійӧс Ерусалимӧ ӧксыавны. Тадзи Манассей тӧдмаліс, мый Господь эм Ен.

¹⁴ Та бӧрти Давид кар ортсыӧ, Офел гӧгӧр, Манассей кыпӧдіс зэв джуджыд стен Гихон ва петанінсянь рытыввылӧ Чери дзиръя дорӧдз. Иуда му пасьтала став изкарӧ сійӧ индіс тышкайӧзӧн веськӧдлысьясӧс.

¹⁵ Господьлӧн крамысь Манассей шыбитіс сэтчӧ сувтӧдӧм бӧлбанӧс да мукӧд войтыръяслысь енъяссӧ. Сійӧ жугӧдіс висьпуктанінъяс, мый вӧлі сувтӧдӧма крамса керӧс вылӧ да Ерусалим карын мукӧдлаӧ, сэсся шыбитіс найӧс кар сайӧ.

¹⁶ Сійӧ дзоньталіс Господьлысь висьпуктанінсӧ да вайис сэні бурасян да аттьӧалана висьяс. Сійӧ тшӧктіс Иуда войтырлы юрбитны Господьлы, Израильлӧн Енлы.

¹⁷ Та вылӧ видзӧдтӧг войтырыс пыр на вайис висьяс мылькъяс вылын, но вайис найӧс Господьлы, аслас Енлы.

¹⁸ Манассей ӧксыалӧм дырйи мукӧд лоӧмторъяс йылысь гижӧма израильса ӧксыяслӧн небӧгӧ. Сэтчӧ гижӧма тшӧтш Манассейлысь Енмыслы кевмысьӧмсӧ да пророкъяслысь кывъяссӧ, мый найӧ висьталісны Манассейлы Израильлӧн Господь Ен нимсянь.

¹⁹ Хозайлӧн небӧгӧ гижӧма Манассейлысь кевмысьӧмсӧ да кыдзи Енмыс кыліс сійӧс, сылӧн мыжъяс йылысь да Енсӧ эновтӧм йылысь. Сэтчӧ гижӧма тшӧтш вись ваян мылькъяс йылысь, юрбитан пуяс да идолъяс йылысь, кодъясӧс сійӧ сувтӧдаліс Ен водзын раммӧдчытӧдз на.

²⁰ Манассей куліс да вуджис батьясыс дінӧ. Сійӧс дзебисны аслас керка йӧрӧ. Манассей бӧрти ӧксыӧ пуксис сылӧн Амон пиыс.

Иуда муын Амонлӧн ӧксыалӧм

²¹ Ӧксыӧ пуксигас Амонлы вӧлі кызь кык арӧс. Кык во чӧж сійӧ юраліс Ерусалимын.

²² Манассей батьыс моз Амон вӧчис Господь водзын шогмытӧмсӧ. Амон юрбитіс да вайліс висьяс идолъяслы, кодъясӧс вӧчис сылӧн Манассей батьыс.

²³ Но Амон эз раммӧдчы Господь водзын, кыдзи сылӧн Манассей батьыс раммӧдчис, а мӧдарӧ, сійӧ ёнджыка на мыжсӧ вӧчис.

²⁴ Амонлӧн кесйӧгъясыс кыпӧдчисны сылы паныд да виисны сійӧс аслас керкаас.

²⁵ Но Иуда войтыр виис ставнысӧ, кодъяс кыпӧдчисны Амон ӧксылы паныд. Амон бӧрти найӧ пуктісны ӧксыӧ сылысь Иосей писӧ.