2 Каднебӧг 30 - Коми Библия 2023

Ыджыд лун пасйӧм

¹ Езекей мӧдӧдіс юӧртысьясӧс Израиль да Иуда муӧ, тшӧтш ыстіс гижӧдъяс Ефрем да Манассей чужанкотыръяслы. Сійӧ чукӧстіс ставнысӧ локны Господьлӧн крамӧ Ерусалимӧ, медым пасйыны Израильлӧн Господь Енлысь Ыджыд лун.

² Езекей ӧксы, юралысьяс да Ерусалимын чукӧртчӧм войтыр шуисны пасйыны Ыджыд лунсӧ мӧд тӧлысьнас.

³ Найӧ эз вермыны пасйыны Ыджыд лунсӧ колана кадӧ, ӧд эз на вӧвны тырмымӧн попъяс, кодъяс эськӧ вӧлі вежӧдӧмаӧсь-сӧстӧммӧдӧмаӧсь нин асьнысӧ, и войтырыс абу на вӧлі чукӧртчӧма Ерусалимӧ.

⁴ Ӧксылы да став чукӧртчӧм войтырлы сьӧлӧм выланыс воис тайӧ шуӧмыс.

⁵ Став Израиль му пасьтала лунвыв Бер-Шевасянь войвыв Данӧдз юӧртісны тшӧктӧм, медым войтырыс локтас Ерусалимӧ пасйыны Израильлӧн Господь Енлысь Ыджыд лунсӧ, ӧд найӧ важӧн нин эз пасйывны сійӧс Гижӧдас тшӧктӧм серти.

⁶ Юӧр нуысьяс мӧдӧдчисны ӧксылӧн да юралысьяслӧн гижӧднас да ӧксылӧн тшӧктӧм серти юӧртісны став Израиль да Иуда му пасьтала: «Израиль войтыр, бергӧдчӧй Господь дінӧ, Ӧвраамлӧн, Исааклӧн да Израильлӧн Ен дінӧ, сэки Сійӧ бергӧдчас тіян дінӧ, кодъяс мынінныд ассурса ӧксыяслӧн киысь да ловйӧн колинныд.

⁷ Энӧ лоӧй асланыд батьяс кодьӧсь да асланыд войтыр кодьӧсь, кодъяс мыж вӧчисны Господьлы паныд, асланыс батьяслӧн Енлы паныд. Та вӧсна Енмыс сетіс найӧс бырӧдӧм вылӧ, ті асьныд тӧданныд тайӧс.

⁸ Ӧні батьясныд моз энӧ асныралӧй. Сетчӧй Господьлы да локтӧй Сылӧн крамӧ, кодӧс Сійӧ вежӧдіс пыр кежлӧ. Кесъялӧй Господьлы, асланыд Енлы, и Сійӧ вештас тіян вылысь Ассьыс ыпъялан скӧрлунсӧ.

⁹ Ті кӧ бергӧдчанныд Господь дінӧ, сэки тіян рӧдвуж дінӧ да тіян челядь дінӧ бурсьӧлӧмтчасны найӧс пленӧ босьтысьяс, и лэдзасны найӧс бӧр бергӧдчыны тайӧ муас, ӧд Господь, тіян Енныд, бур да мелі сьӧлӧма. Сійӧ оз бергӧдчы тіянысь, ті кӧ бергӧдчанныд Сы дінӧ».

¹⁰ Юӧртысьяс ветлісны карысь карӧ, найӧ кытшовтісны Ефрем да Манассей чужанкотыръяслысь мусӧ Завулон чужанкотырлӧн муӧдз, но найӧс сералісны-лёкӧдісны.

¹¹ Сӧмын Асирлӧн, Манассейлӧн да Завулонлӧн чужанкотырысь кодсюрӧ раммӧдчисны да локтісны Ерусалимӧ.

¹² Иуда войтыр вылын вӧлі Енлӧн киыс. Сійӧ сетіс налы ӧти сьӧлӧм, медым найӧ вӧчисны сійӧ, мый ӧксы да юралысьяс Господьлӧн кыв серти тшӧктісны вӧчны.

¹³ Мӧд тӧлысьнас Ерусалимӧ войтырыс чукӧртчис зэв уна, медым пасйыны Шомтӧм нянь сёян лунъяс.

¹⁴ Найӧ петкӧдісны Ерусалимысь идолъяслы сувтӧдӧм висьпуктанінъяс да тшынӧдчан висьпуктанінъяс, жугӧдісны да шыбитісны найӧс Кедрон ковтысӧ.

¹⁵ Мӧд тӧлысьлӧн дас нёльӧд лунӧ начкисны ыджыдлунся баляясӧс. Попъяслы да левитъяслы яндзим вӧлі, мый ас кадӧ найӧ эз вежӧдны-сӧстӧммӧдны асьнысӧ, та вӧсна ӧні тайӧс вӧчисны. Сэсся найӧ вайисны Господьлӧн крамӧ сотан висьяс.

¹⁶ Попъяс сулалісны асланыс местаын Енлӧн морт Мӧисейлӧн Индӧд серти. Найӧ босьтісны левитъяслӧн киысь висьяслысь вирсӧ да резісны вирнас.

¹⁷ Чукӧртчӧм войтыр пӧвстын вӧлі уна йӧз, кодъяс абу вӧлі вежӧдӧмаӧсь-сӧстӧммӧдӧмаӧсь асьнысӧ. На пыдди левитъяслы ковмис начкыны баляясӧс да вежӧдны-торйӧдны найӧс Господьлы.

¹⁸ Унаӧн, торйӧн нин Ефремлӧн, Манассейлӧн, Иссакарлӧн да Завулонлӧн чужанкотыръясысь, абу вӧлі сӧстӧммӧдӧмаӧсь асьнысӧ, но найӧ сёйисны ыджыдлунся баляӧс. Тадзи найӧ торкисны Индӧдсӧ,

¹⁹ но Езекей кевмысис на вӧсна. Сійӧ шуис: «Бур сьӧлӧма Господь мед вештас мыжсӧ быдӧнлысь, коді эз сӧстӧммӧдчы вежаин йылысь индӧд серти, но став сьӧлӧмсяньыс корсьысьӧ Господь Енмӧс, аслас батьяслысь Енсӧ».

²⁰ Господь кыліс Езекейлысь кевмысьӧмсӧ да эз мыжды войтырсӧ.

²¹ Ерусалимӧ чукӧртчӧм Израиль войтыр ёна нимкодясьӧмӧн сизим лун чӧж пасйис Шомтӧм нянь сёян лунъяс. Левитъяс да попъяс быд лун ошкисны Господьӧс ворсанторъясӧн, кодъясӧс вӧлі вӧчӧма Господьӧс ошкӧм вылӧ.

²² Езекей висьталіс бур кывъяс левитъяслы, кодъяс бурногӧн лӧсьӧдісны Господьлы кесъялӧм. Сизим лун чӧж войтырыс сёйис-гажӧдчис, вайис бурасян висьяс да ошкис Господьӧс, асланыс батьяслысь Енсӧ.

²³ Ерусалимӧ чукӧртчӧм войтырыс шуис нӧшта на сизим лун чӧж гажӧдчыны, и тайӧ сизимнан лунсӧ найӧ гажӧдчисны-нимкодясисны.

²⁴ Иудаса Езекей ӧксы сетіс чукӧртчӧм войтырлы сюрс ӧшкӧс да сизим сюрс ыжӧс, а юралысьяс сетісны войтырыслы сюрс ӧшкӧс да дас сюрс ыжӧс. Тайӧ кадас попъяс унаӧн нин вӧлі вежӧдӧмаӧсь-сӧстӧммӧдӧмаӧсь асьнысӧ.

²⁵ Иуда войтыр, попъяс, левитъяс да Израиль муысь локтӧм войтыр ёна нимкодясисны. Нимкодясисны тшӧтш Израиль муысь да Иуда муысь локтӧм мукӧд войтыръяс.

²⁶ Ерусалимын вӧлі ыджыд гаж, татшӧм гажыс эз нин вӧвлы сэні израильса Соломон ӧксылӧн, Давид пилӧн, веськӧдлан кадсянь.

²⁷ Попъяс да левитъяс бурсиисны войтырсӧ. Енмыс кыліс налысь гӧлӧс шысӧ, налӧн кевмӧмыс воис енэжӧдз, Енлӧн вежа оланінӧдз.