2 Каднебӧг 28 - Коми Библия 2023

Иуда муын Ахазлӧн ӧксыалӧм

¹ Ӧксыӧ пуксигас Ахазлы вӧлі кызь арӧс. Дас квайт во чӧж сійӧ юраліс Ерусалимын. Сійӧ эз вӧч Господь водзын шогманасӧ, эз ов Давид пӧльыс моз.

² Сійӧ ветліс израильса ӧксыяслӧн туйӧд, весиг сывдӧмӧн вӧчис Ваал бӧлбанъяс.

³ Бен-Хинном ковтысын сійӧ сотліс висьяс ылӧг енъяслы, сотліс биын ассьыс пиянсӧ, тадзи вӧчис пежсӧ войтыръяс моз, кодъясӧс Господь вӧтліс Израиль войтыр водзысь.

⁴ Ахаз вайліс висьяс, тшынӧдчис мылькъяс да керӧсъяс вылын и быд пашкыр пу улын.

⁵ Та вӧсна Господь Ен сетіс Ахазӧс арамейяслӧн ӧксы киӧ. Арамейяс пасьвартісны сійӧс да уна йӧзӧс нуӧдісны пленӧ Дамаскӧ. Господь сетіс Ахазӧс тшӧтш израильса ӧксы киӧ, и израильса ӧксы виис сылысь уна мортӧс.

⁶ Израильса ӧксы, Ремальлӧн Пеках пиыс, ӧти лунӧ виис сё кызь сюрс иудаса тышкамортӧс, ӧд найӧ эновтісны Господьӧс, асланыс батьяслысь Енсӧ.

⁷ Зикри, ефремса вына тышкаморт, виис иудаса ӧксылысь Маасей писӧ, ӧксы керкаӧн веськӧдлысь Азрикамӧс да Элканӧс, ӧксы бӧрся мӧд юралысьӧс.

⁸ Израильсаяс босьтісны пленӧ иудаса аньясӧс да ныв-зонмӧс, налӧн лыдыс вӧлі кыксё сюрс морт. Нӧшта мырддисны Иуда войтырлысь, асланыс вокъяслысь, уна эмбур да нуисны Самарияӧ.

⁹ Самарияын оліс Господьлӧн Одед нима пророк. Сійӧ воча петіс Самарияӧ локтысь тышкайӧзлы да шуис налы: «Господь, тіян батьяслӧн Ен, скӧрмис Иуда войтыр вылӧ да сетіс найӧс тіян киӧ. Ті виалінныд найӧс сэтшӧм скӧрлунӧн, мый тайӧ воис весиг енэжӧдзыс.

¹⁰ А ӧні ті кӧсъянныд вӧчны Иудаын да Ерусалимын олысьясӧс асланыд кесйӧгъясӧн. Но ті ӧмӧй асьныд абу мыжаӧсь Господь Енныд водзын?

¹¹ Кывзӧй менӧ! Лэдзӧй пленӧ босьтӧмаясӧс, ассьыныд вокъяснытӧ, ӧд Господьлӧн скӧрлуныс ыпъялӧ тіян вылӧ».

¹² Иохананлӧн Азарий пиыс, Мешиллемотлӧн Берек пиыс, Шаллумлӧн Езекей пиыс да Хадлайлӧн Амессай пиыс – ефремса юралысьяс – сувтісны тыш вылысь локтысьяс водзӧ

¹³ да шуисны налы: «Энӧ вайӧдӧй татчӧ пленӧ босьтӧм йӧзӧс, медым ми эгӧ мыжмӧй Господь водзын. Миян мыжным сідзи нин ыджыд, и Господьлӧн скӧрлуныс ыпъялӧ Израиль вылӧ, но ті нӧшта на кӧсъянныд содтыны миянлысь мыжъяснымӧс да лёк вӧчӧмнымӧс».

¹⁴ Сэки тышкайӧз колисны пленӧ босьтӧм йӧзсӧ да мырддьӧм эмбурсӧ юралысьяс да чукӧртчӧм войтыр дінӧ.

¹⁵ Сійӧ йӧзыс, кодъясӧс вӧлі индӧма тӧждысьны пленӧ босьтӧмаяс вӧсна, мунісны на дінӧ, сетісны пасьтӧмъяслы мырддьӧм эмбурысь кӧм-пась, вердісны-юкталісны найӧс да мавтісны налысь дойяссӧ. Жебмӧмаясӧс найӧ пуксьӧдісны осёлъяс вылӧ да нуӧдісны пленӧ босьтӧм йӧзӧс налӧн войтыр дінӧ Ериконӧ, мӧд ногӧн кӧ, Пальма карӧ, а асьныс бӧр бергӧдчисны Самарияӧ.

¹⁶ Тайӧ кадас Ахаз ӧксы мӧдӧдіс юӧр ассурса ӧксылы да корис отсавны,

¹⁷ ӧд эдомсаяс бара уськӧдчисны Иуда войтыр вылӧ да пасьвартісны найӧс. Босьтӧм йӧзсӧ найӧ нуӧдісны пленӧ.

¹⁸ Филистимсаяс уськӧдчисны керӧсбердса муын да Негевын сулалысь Иуда каръяс вылӧ. Найӧ босьтісны Бет-Шемеш, Аялон да Гедерот каръяс, тшӧтш Соко, Тимна да Гимзо каръяс да нагӧгӧрса сиктъяс и овмӧдчисны сэтчӧ.

¹⁹ Тадзи Господь раммӧдіс Иуда войтырӧс Ахаз ӧксы вӧсна, ӧд Ахаз эновтіс Господьӧс да лёкас кыскис ассьыс войтырсӧ.

²⁰ Ахаз дінӧ локтіс ассурса Тиглатпаласар ӧксы. Но отсалӧм пыдди сійӧ дзескӧдіс Ахаз ӧксыӧс.

²¹ Ахаз босьтіс Господьлӧн крамысь, ӧксы керкаысь да юралысьяслысь озырлунсӧ да сетіс ассурса ӧксылы, но та вылӧ видзӧдтӧг ассурса ӧксы эз отсав сылы.

²² Тайӧ сьӧкыд кадас Ахаз ӧксы ёнджыка на мыж вӧчис Господьлы паныд.

²³ Сійӧ вись вайис Дамаскын олысьяслӧн идолъяслы, ӧд чайтіс, мый налӧн енъясыс пасьвартісны сійӧс. Сійӧ шуаліс: «Арамса ӧксыяслӧн енъясыс отсалӧны налы. Ме вись вая налы, и найӧ меным тшӧтш отсаласны». Но найӧ мыжӧ вӧйтісны Ахазӧс да став Израиль войтырӧс.

²⁴ Енлӧн крамысь Ахаз чукӧртіс да жугліс став дозмук-кӧлуйсӧ, сэсся йигналіс Господьлӧн крамлысь ӧдзӧсъяссӧ. Ерусалим кар пасьтала сійӧ сувтӧдаліс ылӧг енъяслы висьпуктанінъяс.

²⁵ Иудаса быд карын сійӧ вӧчаліс вись ваян мылькъяс, сотліс сэні висьяс мукӧд енъяслы. Тадзи сійӧ дӧзмӧдіс Господьӧс, аслас батьяслысь Енсӧ.

²⁶ Ахаз ӧксыалӧм дырйи мукӧд лоӧмторъяс йылысь да сылӧн уджъясыс йылысь водзысяньыс и помӧдзыс гижӧма иудаса да израильса ӧксыяслӧн небӧгӧ.

²⁷ Ахаз куліс да вуджис батьясыс дінӧ. Сійӧс дзебисны Ерусалимӧ, но эз израильса ӧксыяслӧн дзебанінӧ. Ахаз бӧрти ӧксыӧ пуксис сылӧн Езекей пиыс.