2 Каднебӧг 22 - Коми Библия 2023

Иуда муын Ахазийлӧн ӧксыалӧм

¹ Ерусалимса олысьяс Иорам бӧрти ӧксыӧ пуктісны Ахазийӧс, иудаса Иорам ӧксылысь медічӧт писӧ, ӧд сылысь ыджыдджык пиянсӧ виисны арабъяскӧд локтӧм йӧз, кодъяс уськӧдчисны иудаса тышкайӧз вылӧ. Та вӧсна Ахазий лои ӧксыӧн.

² Ӧксыӧ пуксигас сылы вӧлі кызь кык арӧс. Ӧти во чӧж сійӧ юраліс Ерусалимын. Сылӧн мамыс вӧлі Аталия, Омрилӧн нылыс.

³ Ахазий ветліс Ахав рӧдлӧн туйӧд, ӧд сылӧн мамыс веськӧдіс сійӧс лёкас.

⁴ Ахав рӧд моз Ахазий вӧчис Господь водзын шогмытӧмсӧ, ӧд сійӧс туйдӧдысьясӧн батьыслӧн кулӧм бӧрын вӧліны Ахавсянь чужысьяс. Тайӧ вайӧдіс сійӧс кулӧмӧдз.

⁵ Налӧн туйдӧдӧм серти израильса Иорам ӧксыкӧд, Ахавлӧн пикӧд, Ахазий петіс тышӧ арамейяслӧн Азаил ӧксылы паныд. Найӧ тышкасисны галаадса Рамот карын, кӧні арамейяс дойдісны Иорамӧс.

⁶ Медым бурдны тайӧ дойяссьыс, Иорам бӧр локтіс Изреельӧ. Иудаса Ахазий ӧксы локтіс Изреельӧ видлыны доймалӧм Иорам ӧксыӧс.

⁷ Но Енмыслӧн вӧлі шуӧма, мый Иорам дінӧ Ахазийлӧн локтӧмыс вайӧдас сійӧс кулӧмӧдз. Локтӧм бӧртиыс Ахазий Иорамкӧд мунісны Нимшилӧн Еху пи дінӧ, кодӧс Господь вӧлі мавтыштӧма, медым сійӧ бырӧдас Ахавлысь рӧдсӧ.

⁸ Ахавлысь рӧдсӧ бырӧдігӧн Еху паныдасис иудаса юралысьяскӧд да Ахазий вокъяслӧн пиянкӧд, кодъяс кесъялісны Ахазийлы. Еху виис тшӧтш найӧс.

⁹ Сэсся Еху тшӧктіс корсьны Ахазийӧс, коді вӧлі дзебсясьӧ Самарияын. Аддзӧм бӧрын сійӧс вайӧдісны Еху дінӧ да виисны. Ахазийӧс дзебисны сӧмын сылӧн Иосафат пӧль вӧснаыс, коді став сьӧлӧмсяньыс корсис Господьӧс. Ахазийлӧн рӧдысь некод эз коль, коді эськӧ вермис пуксьыны ӧксыӧ.

Иуда муын Аталиялӧн ӧксыалӧм

¹⁰ Ахазийлӧн Аталия мамыс кор тӧдмаліс пиыслӧн кулӧм йылысь, шуис бырӧдны иудаса ӧксы рӧдысь став писӧ.

¹¹ Но Ахазийлӧн Ехошева нима чойыс, Иорам ӧксылӧн нылыс, гусьӧн пышйӧдіс Ахазийлысь Йоас писӧ ӧксылӧн мукӧд пиян пӧвстысь, кодъясӧс вӧлі шуӧма вины. Йоасӧс да сійӧс нёньӧдысьӧс Ехошева дзебис узьлан жырйӧ. Татшӧм ногӧн Ехошева, Иодай поплӧн гӧтырыс, мездіс Йоасӧс Аталия киысь, и Аталия эз вермы вины Йоасӧс.

¹² Квайт во чӧж Йоасӧс дзеблалісны Енлӧн крамын. Тайӧ кадас Иуда муын ӧксыаліс Аталия.