2 Каднебӧг 21 - Коми Библия 2023

Иуда муын Иорамлӧн ӧксыалӧм

¹ Иосафат куліс да вуджис батьясыс дінӧ. Сійӧс дзебисны Давид карӧ батьясыскӧд орччӧн. Иосафат бӧрти ӧксыӧ пуксис сылӧн Иорам пиыс.

² Иорамлӧн вӧліны Азарий, Ехиэл, Закар, Азарий, Микаил да Шефатай нима вокъяс. Ставныс найӧ вӧліны израильса Иосафат ӧксылӧн пиян.

³ Батьыс лышкыда козьналіс налы зарни, эзысь да мукӧд дона козинъяс. Сетіс налы тшӧтш Иуда муысь изкаръяс. Но юралӧмсӧ Иосафат сетіс Иорамлы, аслас медводдза пилы.

⁴ Кор батьыс бӧрти Иорам пуксис ӧксыӧ да зумыдмӧдіс ассьыс юралӧмсӧ, сійӧ виис шыпуртӧн став ассьыс воксӧ да ӧткымын израильса юралысьӧс.

⁵ Ӧксыӧ пуксигас Иорамлы вӧлі комын кык арӧс. Кӧкъямыс во чӧж сійӧ юраліс Ерусалимын.

⁶ Иорам ветліс израильса ӧксыяслӧн туйӧд. Сылӧн гӧтырыс вӧлі Ахавлӧн нылыс, та вӧсна Ахав рӧд моз сійӧ вӧчис Господь водзын шогмытӧмсӧ.

⁷ Но Господь эз кӧсйы бырӧдны Давидлысь рӧдсӧ, ӧд Сійӧ вӧлі кӧрталӧма Давидкӧд йитӧд да кӧсйысьӧма, мый Давидсянь чужысь кутас юравны нэмъяс чӧж.

⁸ Иудаса Иорам ӧксылӧн веськӧдлан кадӧ эдом войтыр кыпӧдчис сылы паныд да пуктіс аслыс ӧксыӧс.

⁹ Иорам аслас тарантаса тышкайӧзкӧд да наӧн веськӧдлысьяскӧд петіс тышӧ эдомсаяслы паныд. Эдомса тышкайӧз кытшалісны Иорамӧс да тарантаса тышкайӧзӧн веськӧдлысьяссӧ, но войнас Иорам пасьвартіс найӧс. [Эдомсаяс пышйисны асланыс гортӧ.]

¹⁰ Эдом войтыр мыніс Иуда кипод улысь, и ӧнӧдз тайӧ тадз. Сійӧ жӧ кадӧ иудаса ӧксылы паныд кыпӧдчисны тшӧтш Ливна карын олысьяс. Тадзи лои, ӧд Иорам эновтіс Господьӧс, аслас батьяслысь Енсӧ.

¹¹ Иуда керӧсвыв муын Иорам вӧчис вись ваян мылькъяс. Сылӧн веськӧдлӧм улын Ерусалимын олысьяс кырсалысь ань моз сетчисны идолъяслы, тадзи сійӧ кежӧдіс Иуда войтырӧс веськыд туй вылысь.

¹² Иорамлы вайисны Илля пророксянь гижӧд. Сэні вӧлі гижӧма: «Господь, Давид пӧльыдлӧн Ен, тадзи висьталӧ: ”Аслад Иосафат батьыдлӧн да иудаса Аса ӧксылӧн туйӧд тэ он ветлы,

¹³ а ветлан израильса ӧксыяслӧн туйӧд. Тэ кежӧдін Иуда войтырӧс да Ерусалимын олысьясӧс кырсалысь ань моз сетчыны идолъяслы да овны Ахав рӧд моз. Ассьыд вокъястӧ, батьыдлысь пиянсӧ, кодъяс вӧліны тэысь бурджыкӧсь, тэ виин.

¹⁴ Таысь Господь мӧдӧдас ыджыд мыждӧм тэнад войтырыд вылӧ, тэнад пияныд да гӧтыръясыд вылӧ, став тэнад овмӧсыд вылӧ.

¹⁵ Асьтӧ тэнӧ Господь дойдас пытшкӧсса сьӧкыд висьӧмӧн. Лунысь-лун тэ пондан висьны, кытчӧдз тэнад гырк пытшкӧсыд ортсӧ оз пет”».

¹⁶ Филистимсаяс да арабъяс пӧвстын, кодъяс олісны эфиопияса йӧзкӧд орччӧн, Господь кыпӧдіс лӧглун Иорам вылӧ.

¹⁷ Найӧ уськӧдчисны Иуда му вылӧ, пырисны сэтчӧ да куштісны ӧксылысь керкасӧ. Найӧ босьтісны аскӧдныс Иорамлысь пиянсӧ да гӧтыръяссӧ. Ичӧтджык Иохаз пиыс кындзи сылӧн пиян пӧвстысь некод эз коль.

¹⁸ Та бӧрти Господь мӧдӧдіс Иорамлы кулана пытшкӧсса висьӧм.

¹⁹ Лунысь-лун сійӧ сьӧкыда висис, а мӧд во помасигас сылӧн гырк пытшкӧсыс висьӧмысла ортсӧ петіс. Сійӧ куліс ёна сьӧкыдалӧмӧн. Казьтывлӧм могысь сылӧн батьяслы моз войтырыс эз песты сылы бипур.

²⁰ Ӧксыӧ пуксигас Иорамлы вӧлі комын кык арӧс. Кӧкъямыс во чӧж сійӧ юраліс Ерусалимын. Сылӧн кулӧм вӧсна некод эз бӧрд. Сійӧс дзебисны Давид карӧ, но эз ӧксыяслӧн дзебанінӧ.