2 Каднебӧг 20 - Коми Библия 2023

Иосафат вермӧ моав да аммон войтыръясӧс

¹ Кутшӧмкӧ кад мысти Иосафатлы паныд тышӧ петісны моав да аммон войтыръяс, накӧд тшӧтш тышӧ петісны маонсаяс пӧвстысь ӧткымын морт.

² Иосафатлы юӧртісны: «Сола саридз сайысь, Эдомысь, тэныд паныд локтӧ лыдтӧм-тшӧттӧм тышкайӧз. Найӧ воӧмаӧсь нин Хацацон-Тамарӧ». Мӧд ногӧн кӧ, тайӧ лоӧ Эн-Геди.

³ Иосафат повзис. Сійӧ шыасис Господь дінӧ, а Иуда муын олысьяслы тшӧктіс видзавны.

⁴ Иуда войтыр чукӧртчис, медым корны Господьлысь отсӧг. Иудаса быд карысь локтісны йӧз, медым кевмысьны Господьлы.

⁵ Иосафат сувтіс Иудаысь да Ерусалимысь локтӧм-чукӧртчӧм войтыр водзӧ, Господьлӧн крамса выль йӧрӧ.

⁶ Иосафат кевмысис: «Господьӧй, миян батьяслӧн Енмӧй! Тэ – енэжъяс вылын олысь Ен, Тэ веськӧдлан став войтыръясӧн. Тэнад киын выныс да ыджыдалӧмыс, некод оз вермы водзсасьны Тэкӧд.

⁷ Миян Енмӧй, Тэ вӧтлін тайӧ муас олысьясӧс Аслад Израиль войтыр водзысь да пыр кежлӧ сетін тайӧ мусӧ Аслад Ӧвраам ёртсянь чужысьяслы.

⁸ Найӧ овмӧдчисны татчӧ да лэптісны крам, медым сэні вӧлі Тэнад нимыд. Найӧ шуисны:

⁹ ”Миянӧс кӧ суас сьӧкыдлун, тыш, пӧрӧс висьӧм либӧ тшыглун, сэки ми сувтам Тэ водзӧ да тайӧ крамыс водзӧ, кӧні Тэнад нимыд. Сьӧкыдаліганым ми шыасям Тэ дінӧ, и Тэ кылан да мездан миянӧс”.

¹⁰ Ӧні татчӧ локтӧны аммон войтыр, моавсаяс да Сеир керӧсвыв муын олысьяс. Кор израильсаяс локтісны Египет муысь, Тэ эн лэдз налы мунны тайӧ войтыръяслӧн муясӧд. Та вӧсна израильсаяс ордйисны налысь муяссӧ да эз бырӧдны найӧс.

¹¹ Но ӧні найӧ мынтысьӧны миянлы – кӧсйӧны вӧтлыны миянӧс Тэнад муысь, мый Тэ вичмӧдін миянлы.

¹² Миян Енмӧй, мыжды найӧс. Ми абу сэтшӧм вынаӧсь, медым вермим паныд сувтны тайӧ уна лыда тышкайӧзыслы. Ми огӧ тӧдӧй, мый миянлы вӧчны, но Тэлань ми кыпӧдам синнымӧс!»

¹³ Став Иуда войтырыс сулаліс Господь водзын, накӧд тшӧтш вӧліны гӧтыръясныс да челядьныс.

¹⁴ Чукӧртчӧм йӧз пӧвстын Господьлӧн Лолыс лэччис Асаф рӧдысь Яхазиэл нима левит вылӧ. Яхазиэл вӧлі Закарлӧн пи, Закар – Бенайлӧн, Бенай – Евэллӧн, Евэл – Маттанайлӧн.

¹⁵ Яхазиэл шуис: «Иуда войтыр, Ерусалимын олысьяс да Иосафат ӧксы, кывзӧй! Господь тіянлы тадзи висьталӧ. Энӧ полӧй да энӧ тіралӧй тайӧ уна лыда тышкайӧзсьыс, ӧд тайӧ тышыс абу тіян, а Енмыслӧн.

¹⁶ Аски петӧй налы паныд тышӧ. Найӧ каясны Циц керӧс вылӧ, и ті паныдаланныд найӧс ковтыс помас, Еруэл овтӧминсянь асыввылын.

¹⁷ Энӧ тышкасьӧй накӧд, сӧмын сулалӧй да видзӧдӧй, кыдзи Господь мездас тіянӧс. Иудаын да Ерусалимын олысьяс, энӧ полӧй да энӧ тіралӧй! Петӧй аски налы паныд. Господь лоӧ тіянкӧд».

¹⁸ Иосафат копыртчис муӧдзыс, став Иуда войтырыс да Ерусалимын олысьяс тшӧтш уськӧдчисны Господь водзӧ, медым юрбитны Сылы.

¹⁹ Кааф да Корей рӧдъясысь левитъяс сувтісны да пондісны гораа ошкыны Господьӧс, Израильлысь Енсӧ.

²⁰ Иосафатлӧн тышкайӧзыс чеччисны водз асывнас да мӧдӧдчисны Текоя овтӧминлань. Кор найӧ мӧдӧдчисны, Иосафат сувтіс да шуис: «Кывзӧй менӧ, Иуда войтыр да Ерусалимын олысьяс! Эскӧй Господьлы, асланыд Енлы, да лоӧй зумыдӧсь. Эскӧй Сылӧн пророкъяслы, и тіян лоӧ вермӧм».

²¹ Войтырыскӧд сёрнитчӧм бӧрын Иосафат индіс сьылысьясӧс, медым найӧ вежа паськӧмӧн мунісны тышкайӧз водзын да ошкисны Господьӧс тайӧ кывъяснас: Ошкӧй Господьӧс, ӧд Сылӧн буралӧмыс оз помасьлы!

²² Кор сьылысьяс пондісны нимкодясьӧмӧн гораа ошкыны Господьӧс, сэки Господь мӧдӧдіс йӧзӧс уськӧдчыны аммонсаяс, моавсаяс да Сеир керӧсвыв муын олысьяс вылӧ, кодъяс кӧсйисны уськӧдчыны Иуда вылӧ. Но Господь пасьвартіс Иудалысь вӧрӧгсӧ,

²³ ӧд аммонсаяс да моавсаяс уськӧдчисны Сеир керӧсвыв муын олысьяс вылӧ. Найӧс бырӧдӧм бӧрын аммонсаяс да моавсаяс пондісны виавны ӧта-мӧднысӧ.

²⁴ Кор иудаса тышкайӧз кайисны овтӧминса керӧс вылӧ, медым сэсянь видзӧдлыны да уськӧдчыны вӧрӧг вылӧ, вылісяньыс аддзисны сӧмын шойяс, некод абу вӧлі ловйӧн кольӧма.

²⁵ Кор Иосафат аслас тышкайӧзкӧд пондісны чукӧртны вӧрӧглысь эмбурсӧ, найӧ аддзисны уна кӧлуй, паськӧм да озырлун. Найӧ чукӧртісны аслыныс сы мында, мый эз вермыны весиг нунысӧ. Эмбурыс вӧлі зэв уна, сійӧс ковмис чукӧртны куим лун чӧж.

²⁶ Нёльӧд луннас найӧ чукӧртчисны Берака ковтысын, и сэні найӧ ошкисны Господьӧс. Та вӧсна ӧнӧдз тайӧ ковтыссӧ шуӧны Берака ковтысӧн.

²⁷ Иосафатлӧн веськӧдлӧм улын иудаса да ерусалимса став тышкайӧзыс бӧр бергӧдчисны Ерусалимӧ нимкодясьӧмӧн, ӧд налысь вӧрӧгсӧ пасьвартӧм вӧсна Господь сетіс налы помка гажӧдчыны.

²⁸ Арфа, гусли да труба ворсан шы улӧ найӧ локтісны Ерусалимӧ да пырисны Господьлӧн крамӧ.

²⁹ Став муясын олысьяс кутісны повны Енсьыс, кор найӧ кылісны, мый Ачыс Господь тышкасис Израильлӧн вӧрӧгкӧд.

³⁰ Иосафат ӧксылӧн му вылӧ пуксис лӧнь олӧм, сылӧн Енмыс быд боксянь сетіс сылы лӧньлун.

Иуда муын Иосафатлӧн ӧксыалӧм

³¹ Иосафат ӧксы юраліс Иуда муын. Ӧксыӧ пуксигас сылы вӧлі комын вит арӧс. Кызь вит во чӧж сійӧ юраліс Ерусалимын. Сылӧн мамыс вӧлі Азува, Шилхилӧн нылыс.

³² Иосафат ветліс Аса батьыслӧн туйӧд да эз кежлыв сэтысь. Сійӧ вӧчис Господь водзын шогманасӧ.

³³ Но сійӧ эз бырӧд вись ваян мылькъяс, и войтырыс эз став сьӧлӧмсяньыс кесъяв аслас батьяслӧн Енлы.

³⁴ Иосафат ӧксыалӧм дырйи лоӧмторъяс йылысь водзысяньыс и помӧдзыс пасъялӧма Ханани Ехулӧн гижӧдын, мый пыртӧма израильса ӧксыяслӧн небӧгӧ.

³⁵ Бӧрынджык иудаса Иосафат ӧксы кӧрталіс йитӧд израильса Ахазий ӧксыкӧд, коді вӧчис лёксӧ.

³⁶ Найӧ сёрнитчисны вӧчны корабльяс, медым мӧдӧдны найӧс Фарсисӧ. Корабльяссӧ вӧчисны Эцион-Геверын.

³⁷ Но Элизер, Мареша карысь Додавлӧн пиыс, пророкаліс Иосафат йылысь: «Тэ кӧрталін йитӧд Ахазийкӧд, та вӧсна Господь жугӧдас тэнсьыд вӧчӧмтортӧ». Корабльяс жугалісны, Фарсисӧдз эз воны.