2 Каднебӧг 11 - Коми Библия 2023

Иуда муын Ровоамлӧн ӧксыалӧм

¹ Ерусалимӧ локтӧм бӧрын Ровоам чукӧртіс Иуда да Венямин чужанкотырысь сё кӧкъямысдас сюрс медбур тышкамортӧс, мед петны тышӧ Израильлы паныд да бӧр босьтны аслас киӧ на вылын ӧксыалӧмсӧ.

² Сэки Енлӧн морт Шемайлы вӧлі Господьсянь кыв:

³ «Висьтав Соломонлӧн Ровоам пилы, иудаса ӧксылы, тшӧтш Иуда да Венямин муясын олысь Израиль войтырлы,

⁴ мый Господь тадзи висьталӧ: энӧ петӧй тышӧ асланыд вокъяслы паныд, а бӧр бергӧдчӧй гортаныд. Ӧд ставыс тайӧ вӧлі Месянь». Найӧ кывзысисны Господьлысь да эз петны Еровамлы паныд тышӧ.

⁵ Ровоам оліс Ерусалимын, лэптіс изкаръяс Иуда муын.

⁶ Сійӧ кытшаліс стенмӧн Виплием, Этам, Текоя,

⁷ Бет-Цур, Соко, Адуллам,

⁸ Геф, Мареша, Зиф,

⁹ Адораим, Лакиш, Азека,

¹⁰ Цора, Аялон да Хеврон изкаръяс Иуда да Венямин муын.

¹¹ Ровоам зумыдмӧдіс тайӧ изкаръяссӧ, быд изкарӧ индіс юралысьӧс да лӧсьӧдіс сэні сёян, вый да вина видзанінъяс.

¹² Быд карын видзисны сайӧдъяс да шыяс. Ровоам зумыда вынсьӧдіс тайӧ каръяссӧ. Тадзи Иуда да Венямин муяс колины сылӧн кипод улӧ.

¹³ Израиль му пасьталаысь попъяс да левитъяс чукӧртчисны Ровоам дінӧ.

¹⁴ Левитъяс эновтісны ассьыныс видзьяснысӧ, овмӧснысӧ да овмӧдчисны Иуда муӧ да Ерусалимӧ, ӧд Еровам да сылӧн пияныс эз сетны налы лоны попъясӧн да кесъявны Господьлы.

¹⁵ Еровам индіс аслыс попъясӧс, медым найӧ кесъялісны вись ваян мылькъяс вылын кӧза да ӧш сяма бӧлбанъяслы, кодъясӧс сійӧ вӧчӧдіс.

¹⁶ Но израильса быд чужанкотырын вӧліны сэтшӧм йӧз, кодъяс став сьӧлӧмсяньныс кесъялісны Господьлы, Израильлӧн Енлы. Левитъяс бӧрся найӧ тшӧтш мунісны Ерусалимӧ, медым вись вайны Господьлы, асланыс батьяслӧн Енлы.

¹⁷ Куим во чӧж найӧ вынсьӧдісны Иуда муын Соломонлӧн Ровоам пилысь юралӧмсӧ, ӧд куим во чӧж найӧ ветлісны Давидлӧн да Соломонлӧн туйӧд.

¹⁸ Ровоам босьтіс гӧтырӧ Давидлӧн Еримот пилысь Махалата нывсӧ. Махалаталӧн мамыс вӧлі Авихаиль, Ессейлӧн Элиав пилӧн нылыс.

¹⁹ Махалата чужтіс Ровоамлы Еуш, Шемарай да Захам пиянӧс.

²⁰ Нӧшта Ровоам босьтіс гӧтырӧ Авессаломлысь Маака нывсӧ. Маака чужтіс сылы Авийӧс, Аттайӧс, Зизӧс да Шеломотӧс.

²¹ Аслас став гӧтырыс пӧвстысь Ровоам ёнджыка радейтіс Авессаломлысь Маака нывсӧ. Ровоамлӧн вӧлі дас кӧкъямыс гӧтыр да квайтымын кесйӧг-гӧтыр. Найӧ чужтісны сылы кызь кӧкъямыс пиӧс да квайтымын нылӧс.

²² Ровоам пуктіс Маакалысь Авий писӧ медыджыдӧн сылӧн вокъяс пӧвстын. Ас бӧртиыс Ровоам кӧсйис пуктыны ӧксыӧ Авийӧс.

²³ Ровоам мывкыда вӧчис – овмӧдіс ассьыс пиянсӧ Иуда да Венямин муясын сулалысь изкаръясӧ. Сійӧ тӧждысис налӧн сёян-юан вӧсна да корсис налы уна гӧтыр.