1 Петыр 3 - Коми Библия 2023

Верӧсъяс да гӧтыръяс

¹ Гӧтыръяс, кывзысьӧй асланыд верӧсныдлысь. Сэки Ен кывлысь кывзысьтӧм верӧсъяс тіян олӧм вылӧ видзӧдӧмӧн висьтавтӧг-велӧдтӧг кутасны эскыны.

² Ӧд найӧ аддзасны тіянлысь сӧстӧм да Енсьыс полана оласногнытӧ.

³ Энӧ тӧждысьӧй мичмӧдны асьнытӧ ортсысяньыс: юрсинытӧ баситӧмӧн, зарни ӧшлӧмӧн да дона паськӧмӧн.

⁴ Тіян мед лоӧ пытшкӧсса мичлун: рам да лӧнь сьӧлӧм. Тайӧ мичлуныс бырлытӧм, сійӧ дона Енмыслы.

⁵ Тадзи асланыс верӧсныслысь кывзысьӧмӧн важӧн мичмӧдлісны асьнысӧ вежа аньяс, Ен вылӧ лача кутысьяс.

⁶ Сарра кывзысис Ӧвраамлысь да шуис сійӧс аслас ыджыдӧн. Ті кӧ вӧчанныд бурсӧ нинӧмысь повтӧг, сідзкӧ, ті – Сарралӧн нывъяс.

⁷ Верӧсъяс, пыдди пуктӧй ассьыныд гӧтырнытӧ, олӧй накӧд бур мывкыдӧн. Дерт, найӧ тіян дорысь жебджыкӧсь, но налы тшӧтш вичмӧ Енсянь буралӧмыс да олӧмыс. Тадзи кӧ вӧчанныд, кевмысиганыд оз ло мытшӧдыс.

Олӧй сӧстӧм сьӧлӧмӧн

⁸ Медбӧрти кӧсъя шуны тіянлы: олӧй ӧти сьӧлӧмӧн да ӧти лолӧн, радейтӧй ӧта-мӧднытӧ, лоӧй меліӧсь да рамӧсь.

⁹ Лёк вӧчӧмысь энӧ мынтысьӧй лёкӧн, омӧльтӧмысь – омӧльтӧмӧн. Мӧдарӧ, бурсиӧй, ӧд ті тӧданныд, мый та вылӧ корӧма тіянӧс. Сэки тіянлы вичмас бурсиӧмыс.

¹⁰ – Кодлы муса олӧмыс, коді кӧсйӧ аддзыны шуда лунъяс, сійӧ мед видзас ассьыс кывсӧ лёк сёрниысь да вомсӧ пӧръясьӧмысь,

¹¹ мед ылыстчас лёксьыс да вӧчас бурсӧ, корсяс лӧньлунсӧ да кутчысяс сэтчӧ.

¹² Ӧд Господьлӧн синмыс видзӧдӧ веськыда олысьяс вылӧ, Сылӧн пельыс кылӧ налысь кевмӧмсӧ, а лёк вӧчысьяслы Господь паныд сувтӧ, медым бырӧдны найӧс му вывсьыс.

¹³ Коді вӧчас тіянлы лёксӧ, ті кӧ сьӧлӧмсяньныд вӧчанныд бурсӧ?

¹⁴ Ті кӧ нуанныд сьӧкыдсӧ веськыда олӧм вӧснаныд, сідзкӧ, ті шудаӧсь. Энӧ полӧй некодысь да энӧ майшасьӧй нинӧмысь.

¹⁵ Господь Енмӧс вежавидзӧмӧн медвылӧ пуктӧй сьӧлӧманыд. Юалас кӧ кодкӧ лачаныд йылысь, пыр лоӧй дасьӧсь вочавидзны сылы. Вочавидзӧй рам сьӧлӧмӧн да Енсьыс полӧмӧн.

¹⁶ Олӧй сідзи, мед сьӧлӧмныд эз мыжды тіянӧс. Сэки найӧ, кодъяс лёкӧдӧны тіянӧс лёк вӧчысьӧс моз Кристоскӧд бур нога олӧмысь, яналасны асланыс кывъясысь.

¹⁷ Енмыс кӧ кӧсйӧ, мед ми нуим сьӧкыдсӧ, бурджык сьӧкыдавны бур вӧчӧмысь лёк вӧчӧм дорысь.

¹⁸ Кристос ӧтчыдысь нуис сьӧкыдсӧ миян мыжъяс вӧсна, медым вайӧдны миянӧс Ен дінӧ. Сійӧ, веськыда олысь, куліс лёкнога олысьяс вӧсна. Сылысь вир-яйсӧ вӧлі виӧма, но Ловсянь Сійӧ ловзис,

¹⁹ сэсся муніс пемыдінын олысь ловъяс дінӧ да висьталіс налы юӧрсӧ.

²⁰ Тайӧ ловъясыс вӧліны кывзысьтӧмӧсь Енлӧн терпитӧм дырйи, кор Ной вӧчис ковчег. Сэні этшаӧн, сӧмын кӧкъямыс морт, мездмисны ва пыр.

²¹ Тайӧ лоӧмторйыс индӧ миян пыртчӧм вылӧ, мый абу вир-яй вылысь няйт мыськӧм, но сӧстӧм сьӧлӧмсянь Енлы кӧсйысьӧм. Пыртчӧм пыр ми мездмам Исус Кристослӧн ловзьӧм вӧсна.

²² Сійӧ кыпӧдчис енэжас да пукалӧ Ен веськыдладорын, Сылысь кывзысьӧны анделъяс, енэжвыв ыджыдалысьяс да вынъяс.