1 Коринфӧ 8 - Коми Библия 2023

Идоллы вайӧм сёян

¹ Ӧні кӧсъя сёрнитыштны идоллы вайӧм сёян йылысь. Дерт, ми быдӧн тӧдам та йылысь. Но тӧдӧмлуныс вайӧдӧ ышнясьӧмӧдз, а муслуныс ёнмӧдӧ.

² Мортыс кӧ чайтӧ, мый сійӧ мыйкӧ тӧдӧ, збыльвылас сійӧ нинӧм на оз тӧд.

³ Но мортыслы кӧ Енмыс муса, Енмыс тӧдӧ сійӧс.

⁴ Ӧні висьталышта идоллы вайӧм сёян йылысь. Ми тӧдам, мый идолыс збыльвылас абу, эм сӧмын ӧти Ен.

⁵ Дерт, енэжас да му вылас эмӧсь сідз шусяна енъяс. Татшӧм енмыс да ыджыдалысьыс зэв уна,

⁶ но миян эм сӧмын ӧти Ен Бать. Сійӧ ставсӧ вӧчӧма, Сылы ми олам. Миян эм сӧмын ӧти Господь – Исус Кристос. Сы пыр вӧчӧма ставсӧ, Сы пыр сетӧма миянлы олӧм.

⁷ Но оз быдӧн та йылысь тӧд. Ӧткымынӧн вӧлі ёна велалӧмаӧсь вайны идолъяслы вись. Та вӧсна ӧні, яй сёйигӧн, найӧ лыддьӧны сійӧс идоллы вайӧм висьӧн, и налӧн сьӧлӧмыс мыждӧ найӧс асьнысӧ, ӧд найӧ жебӧсь на.

⁸ Но сёяныс оз матыст миянӧс Ен дінӧ. Ми кӧ огӧ сёйӧй – нинӧм огӧ воштӧй, а сёям кӧ – тайӧ нинӧм оз содты миянлы.

⁹ Дерт, ті верманныд сёйны ставсӧ, но видзчысьӧй, медым энӧ лоӧй крукӧдӧн жеб эскысьяслы.

¹⁰ Ӧд жеб эскысь кӧ аддзас, мый тэ тӧдӧмӧн сёян идоллы вайӧм сёян, сэки сійӧ тшӧтш кутас сёйны татшӧм сёянсӧ, весиг сылӧн сьӧлӧмыс кӧ мыждӧ сійӧс.

¹¹ И тэнад тӧдӧмлун вӧсна вошас тайӧ жеб эскысьыс, тэнад вокыд, код вӧсна куліс Кристос.

¹² Тадзи ті дойданныд жеб вокныдлысь сьӧлӧмсӧ да вӧчанныд мыж сылы паныд. Сідзкӧ, ті вӧчанныд мыж Кристослы паныд.

¹³ Та вӧсна менам сёянӧй кӧ уськӧдӧ вокӧс, ме некор ог кут сёйны яй, медым менам вокӧй эз усь.