1 Коринфӧ 5 - Коми Библия 2023

Павел янӧдӧ мыж вӧчӧмысь

¹ Ме кывлі, ӧткымынӧн пӧ тіян пӧвстысь кырсалӧны, и сідзи, мый татшӧмыс оз овлы весиг ентӧдтӧмъяс пӧвстын. Кодкӧ пӧ тіян пиысь узьлӧ весиг батьыслӧн гӧтырыскӧд.

² Оз ӧмӧй тіянлы ков шогсьыны та вӧсна да вӧтлыны ас дорсьыныд татшӧм мортсӧ? А ті пыр на ышнясянныд.

³ Дерт, вир-яйӧн ме абу тіянкӧд, но ловнам тіянкӧд. Ме быттьӧ ачым вӧлі тіянкӧд да мӧвпышті, мый вӧчны тайӧ мортыскӧд.

⁴ Кор ті чукӧртчанныд миян Господь Исус Кристос нимӧн, ловнам лоа тіянкӧд, миян Господь Исус Кристослӧн выныс тшӧтш лоӧ тіянкӧд.

⁵ Сэки тайӧ мортсӧ сетӧй сӧтана киӧ вир-яйсӧ жугӧдӧм вылӧ, мед лолыс сылӧн мездмас миян Господь Исус Кристослӧн лунӧ.

⁶ Тіянлы нинӧмӧн ошйысьнысӧ! Ті ӧмӧй онӧ тӧдӧй, мый этшаник няньшом шоммӧдӧ дзоньнас кӧтассӧ.

⁷ Сідзкӧ, весалӧй ас пытшсьыныд няньшомнытӧ, медым лоинныд выль кӧтасӧн. Дерт, тіян пытшкын шоммӧданторйыс абу нин, ӧд Кристосӧс, ыджыдлунся Балянымӧс, вайӧма нин вись пыдди миян вӧсна.

⁸ Сідзкӧ, огӧ кутӧй пасйыны Ыджыд лунсӧ важ няньшомӧн: лёклунӧн да наянлунӧн. Кутам пасйыны сійӧс шомтӧм няньӧн: сӧстӧмлунӧн да збыльӧн.

⁹ Водзынджык ме тіянлы гижлі нин: энӧ кутӧй некутшӧм йитӧд кырсалысьяскӧд.

¹⁰ Ме ог сёрнит тайӧ мувывса кырсалысьяс, горшасьысьяс, гусясьысьяс да идоллы юрбитысьяс йылысь. Сэки эськӧ ковмис эновтны тіянлы тайӧ муюгыдсӧ.

¹¹ Но ме сёрнита сэтшӧм морт йылысь, коді шуӧ асьсӧ эскысьӧн, но ачыс кырсалӧ, горшасьӧ, суклясьӧ, гусясьӧ, кодалӧ да идоллы юрбитӧ – татшӧмыскӧд энӧ кутӧй некутшӧм йитӧд. Весиг энӧ сёйӧй сыкӧд ӧтлаын!

^12-13 Меным ӧмӧй мыждыны вичкоысь ортсысасӧ? Енмыс найӧс мыждас, а вичкосаӧс ті мыжданныд. «Бырӧдӧй лёксӧ ас пӧвстсьыныд».