1 Коринфӧ 11 - Коми Библия 2023

Юрвевттьӧд

¹ Видзӧдӧй ме вылӧ, ӧд ме видзӧда Кристос вылӧ.

² Вокъяс, ошка тіянӧс, ӧд ті нинӧм абу вунӧдӧмныд менам висьтавлӧмысь. Ті ставсӧ вӧчанныд менам велӧдӧм серти.

³ Кӧсъя, мед ті тӧдінныд, мый быд верӧслы юрыс – Кристос, гӧтырлы юрыс – верӧс, а Кристослы юрыс – Ен.

⁴ Айлов кӧ кевмысьӧ либӧ пророкалӧ юрсӧ вевттьӧмӧн, сійӧ ассьыс юрсӧ янӧдӧ.

⁵ Ань кӧ кевмысьӧ либӧ пророкалӧ юрсӧ вевттьытӧг, тшӧтш сійӧ ассьыс юрсӧ янӧдӧ, ӧд сійӧ нинӧмӧн оз торъяв куш юра аньысь.

⁶ Та вӧсна ань кӧ оз вевттьы ассьыс юрсӧ, мед шырсьӧ. А яндзим кӧ сылы лоны шырӧмаӧн либӧ куш юраӧн, мед вевттьысьӧ.

⁷ Айловлы оз ков вевттьыны юрсӧ, ӧд сійӧ Енлӧн пертасыс. Сійӧ Енмыслы ошкӧм вайӧ, а гӧтыр – верӧслы.

⁸ Эз айлов артмы аньсянь, но ань – айловсянь.

⁹ Абу айловӧс вӧчӧма аньлы, но аньӧс – айловлы.

¹⁰ Та вӧсна аньлы колӧ вевттьыны юрсӧ. Тайӧ лоӧ анделъяслы пасӧн, мый сійӧ ыджыдалӧм улын.

¹¹ Но Господь пытшкын айлов оз вермы лоны аньтӧг, и ань – айловтӧг.

¹² Ӧд ань артмис айловсянь, айлов чужӧ аньсянь, но ставыс Енсянь.

¹³ Асьныд мӧвпыштлӧй, бур-ӧ тайӧ, ань кӧ кевмысьӧ Енмыслы юрсӧ вевттьытӧг?

¹⁴ Оз ӧмӧй олӧмыс петкӧдлы, мый айловӧс кузь юрсиыс янӧдӧ,

¹⁵ а аньӧс – мичмӧдӧ, ӧд юрсисӧ аньлы сетӧма вевттьӧд пыдди.

¹⁶ Кӧсйӧ кӧ кодкӧ вензьыны та йылысь, сылы тадзи шуа: ни миянын, ни Енлӧн мукӧд вичкоясын мӧд нога велӧдӧмыс абу.

Господьлӧн рытйӧм

¹⁷ Таысь кындзи нӧшта шуа тіянлы: меным нинӧмысь тіянӧс ошкынысӧ, ӧд тіян чукӧртчӧмныд бурыс дорысь унджык лёксӧ вайӧ.

¹⁸ Ӧти-кӧ, ме кывлі, мый вичкоӧ чукӧртчигӧн тіян костын овлӧны вензьӧмъяс. Ме мыйтакӧ эска татчӧ.

¹⁹ Дерт, колӧ, медым ті мӧвпалӧмнад торъялінныд, татшӧм ногӧн воссьӧ, коді тіян пиысь шогмана Енмыслы.

²⁰ Но кор ті чукӧртчанныд ӧтвыв сёйны, тайӧс оз позь шуны Господьлӧн рытйӧмӧн,

²¹ ӧд быдӧн тіян пиысь тэрмасьӧ сёйны ассьыс сёянсӧ. Тадзи кодкӧ тшыгйӧн кольӧ, а кодкӧ коддзӧма нин.

²² Ті ӧмӧй онӧ вермӧй гортаныд сёйны-юнысӧ? Мыйла нӧ нинӧм туйӧ пуктанныд Енлысь вичкосӧ да увтыртанныд гӧльясӧс? Мый меным шуны тіянлы? Гашкӧ, ошкыны тіянӧс? Ог кут!

²³ Ме висьтавлі нин тіянлы, мый Ачыс Господь меным висьталіс. Господь Исус, Сійӧс вузалан войӧ, босьтіс нянь,

²⁴ Енмӧс аттьӧалӧмӧн чегъяліс няньсӧ да шуис: «Босьтӧй, сёйӧй, тайӧ Менам яй, чегъялӧма тіян вӧсна. Вӧчӧй тайӧс Менӧ казьтывлӧм могысь».

²⁵ Сёйӧм бӧрас босьтіс тшӧтш чаша да шуис: «Тайӧ чашаыс – Выль Йитӧд, кӧрталӧма Менам вирӧн. Быдпӧрйӧ, тайӧ чашасьыс юигӧн, казьтывлӧй Менӧ».

²⁶ Тадзи быдпӧрйӧ, кор сёянныд тайӧ няньсӧ да юанныд тайӧ чашасьыс, ті висьталанныд Господьлӧн кулӧм йылысь, кытчӧдз оз лок Сійӧ.

²⁷ Сідзкӧ, коді шогмытӧма сёйӧ Господьлысь няньсӧ да юӧ Сылӧн чашаысь, сійӧ Господьлӧн яйлы да вирлы паныд мыж вӧчӧ.

²⁸ Быдӧн мед асьсӧ тӧдмалӧ, сэсся сёйӧ тайӧ няньсӧ да юӧ тайӧ чашасьыс.

²⁹ Ӧд мортыс кӧ сёйӧ да юӧ шогмытӧма, Господьлӧн вир-яй йылысь мӧвпавтӧг, тайӧс сійӧ вӧчӧ асьсӧ мыждӧм вылӧ.

³⁰ Та вӧсна унаӧн тіян пӧвстысь жебӧсь, унаӧн висьӧны да унаӧн нин кулісны.

³¹ Ми кӧ водзвыв тӧдмалам асьнымӧс, сэки Господь оз кут мыждыны миянӧс.

³² А мыждӧ кӧ, миянӧс бур вылӧ велӧдӧ, медым тайӧ муюгыдсаыскӧд ӧтвыв эгӧ веськалӧй мыждӧм улӧ.

³³ Та вӧсна вокъяс, кор ті чукӧртчанныд сёйны, виччысьӧй ӧта-мӧднытӧ.

³⁴ А тшыг кӧ кодкӧ, мед гортас сёйӧ, сэки тіян чукӧртчӧмныд оз ло мыждӧм вылӧ. Мукӧдторсӧ висьтала тіянӧ локтӧм бӧрын.