1 Каднебӧг 29 - Коми Библия 2023

Крам лэптӧм вылӧ вайӧмторъяс

¹ Чукӧртчӧм йӧзлы Давид ӧксы шуис: «Енмыс бӧрйис сӧмын ӧтнассӧ менсьым Соломон пиӧс. Сійӧ том на, оз на куж ставсӧ вӧчны. Сійӧс виччысьӧ ыджыд удж, ӧд тайӧ керкасӧ лоӧ вӧчӧма Господь Енлы, а оз мортлы.

² Ме пукті став ассьым вынӧс, медым менам Енлысь крамсӧ лэптӧм вылӧ чукӧртны зарни, эзысь, ыргӧн, кӧрт, пу, оникс из, уна рӧма мича да дона изъяс да уна мрамор.

³ Менам Енлӧн крамыс меным муса, та вӧсна Енлысь крамсӧ лэптӧм могысь ме сета аслам озырлунысь зарни да эзысь. Сыысь кындзи, мый ме дасьті нин вежа керка лэптӧм вылӧ, ме сета

⁴ куим сюрс талант офирса зарни да сизим сюрс талант сывдӧм эзысь, медым эжасны керкапытшкӧсса стенъяс

⁵ да вӧчасны зарни да эзысь дозмук-кӧлуй. Коді нӧшта кӧсйӧ вайны сетӧмторсӧ Господьлы?»

⁶ Сэки рӧдкутысьяс, израильса чужанкотыръяслӧн юралысьяс, тышкайӧзлӧн юралысьяс да веськӧдлысьяс да ӧксылы уджалысьясӧн веськӧдлысьяс вайисны ассьыныс сетӧмторъяснысӧ.

⁷ Енлысь крамсӧ лэптӧм вылӧ найӧ сетісны вит сюрс талант зарни да дас сюрс зарни дарик, дас сюрс талант эзысь, дас кӧкъямыс сюрс талант ыргӧн да сё сюрс талант кӧрт.

⁸ Кодлӧн вӧліны дона изъяс, найӧ сетісны тайӧ изъяссӧ Господьлӧн крамса озырлун видзанінӧ, Гирсон рӧдысь Ехиэл киӧ.

⁹ Ставныс найӧ сьӧлӧмсяньныс вайисны ассьыныс сетӧмторнысӧ Господьлы. Став войтырыс нимкодясис таысь, Давид ӧксы тшӧтш ёна нимкодясис.

¹⁰ Чукӧртчӧм йӧз водзын Давид ошкис Господьӧс: «Господьӧй, миян Израиль батьлӧн Енмӧй, мед лоӧ ошкӧма Тэнӧ нэмъяс чӧж.

¹¹ Господьӧй, Тэнад эм нималӧм, вын, дзирдлун, вермӧм да юралӧм. Ставыс, мый эм енэжас да му вылас – тайӧ Тэнад. Господьӧй, Тэ – Ӧксы, Тэ ставыс вылын Медыджыдыс.

¹² Тэ сетан озырлунсӧ да нималӧмсӧ, Тэ веськӧдлан ставнас, Тэнад киын выныс да ыджыдалӧмыс, Тэ верман кыпӧдны да вынсьӧдны.

¹³ Миян Енмӧй, ӧні ми аттьӧалам да ошкам Тэнсьыд дзирдлуна нимтӧ.

¹⁴ Коді ме да менам войтырӧй, медым вайны Тэныд татшӧм сетӧмторъяс. Но ставыс Тэсянь, и ми сетам Тэныд сійӧ, мый сибӧдім Тэсянь.

¹⁵ Тэ водзын ми батьясным моз йӧз муысь локтысьяс. Му вылас миян олан лунъясным вуджӧр кодь, миянлы нинӧм вылӧ лачанымӧс кутны.

¹⁶ Господьӧй, миян Енмӧй, ставыс – Тэнад, Тэнад кисянь ми сибӧдім ставсӧ, мый вайим, медым Тэнад вежа нимлы крам лэптыны.

¹⁷ Енмӧй, ме тӧда, мый Тэ тӧдмалан мортлысь сьӧлӧмсӧ. Тэныд мусаӧсь сӧстӧм сьӧлӧмаяс. Став тайӧ сетӧмторсӧ ме вайи сӧстӧм сьӧлӧмсянь. Ме аддза, мый татчӧ чукӧртчӧм Тэнад войтырыд нимкодьпырысь вайӧны Тэныд сетӧмторъяс.

¹⁸ Господьӧй, миян Ӧвраам батьлӧн, Исаак батьлӧн да Израиль батьлӧн Ен, нэмъяс чӧж видз Аслад войтырыд сьӧлӧмын тайӧ кӧсйӧмсӧ, веськӧд налысь сьӧлӧмсӧ Ас дінад!

¹⁹ Отсав менам Соломон пилы став сьӧлӧмсяньыс овны-вӧчны Тэнад индӧд-тшӧктӧмъяс серти да лэптыны крамсӧ, мый могысь ме ставсӧ тайӧс дасьті».

²⁰ Сэсся Давид шуис чукӧртчӧм йӧзлы: «Ошкӧй Господьӧс, ассьыныд Еннытӧ!» Йӧзыс ошкисны Господьӧс, асланыс батьяслысь Енсӧ, муӧдз копыртчисны Господьлы да ӧксылы.

Соломонӧс ӧксыӧ пуктӧм

²¹ Мӧд луннас вайисны Господьлы сотан да мукӧд висьяс: сюрс ӧшкӧс, сюрс межӧс да сюрс ыжӧс. Нӧшта вайисны вина висьяс да став Израиль вӧсна уна мукӧд вись.

²² Сійӧ лунӧ найӧ ёна нимкодясьӧмӧн сёйисны-юисны Господь водзын. Давидлысь Соломон писӧ выльпӧв пуктісны ӧксыӧ да мавтыштӧмӧн сиисны Господьлы, а Садокӧс мавтыштӧмӧн пуктісны аркирейӧ.

²³ Соломон пуксис Господьлӧн юралан пуклӧсӧ, сійӧ лои ӧксыӧн аслас Давид батьыс пыдди. Сылӧн ставыс артмис, и Израиль войтыр кывзысис сылысь.

²⁴ Став веськӧдлысьыс и тышкайӧзыс, тшӧтш Давид ӧксылӧн став пияныс кӧсйысисны кывзысьны Соломон ӧксылысь.

²⁵ Господь кыпӧдіс Соломонӧс став Израиль войтыр водзын да сетіс сылы сэтшӧм нималӧм, мый татшӧм нималӧмыс израильса ӧксыяслӧн эз вӧвлы.

Давид ӧксылӧн кулӧм

²⁶ Давид, Ессейлӧн пиыс, вӧлі став Израиль войтырлӧн ӧксыӧн.

²⁷ Давид ӧксыаліс Израильын нелямын во чӧж. Хевронын сійӧ юраліс сизим во, Ерусалимын – комын куим во.

²⁸ Сійӧ кувсис ыджыд арлыдаӧн, олӧмнас пӧтӧмаӧн. Сылӧн вӧлі уна озырлун, вӧлі нималӧм. Сы пыдди ӧксынас лои Соломон пиыс.

²⁹ Давид ӧксылӧн веськӧдлан кадӧ лоӧмторъяс йылысь водзысяньыс и помӧдзыс пасъялӧма Самуил пророклӧн, Нафан пророклӧн да Гад нима тӧдысь-аддзысьлӧн гижӧдъясын.

³⁰ Сэні гижӧма тшӧтш Давидлӧн юралӧм йылысь, сылӧн тӧдчана уджъяс йылысь, сылӧн олӧмын, Израильын да мукӧд муясын лоӧмторъяс йылысь.