1 Каднебӧг 28 - Коми Библия 2023

Давидлӧн туйдӧдӧм

¹ Давид чукӧртіс Ерусалимӧ израильса веськӧдлысьясӧс. На лыдын вӧліны чужанкотыръяслӧн юралысьяс, ӧксылӧн тышкакотыръясӧн веськӧдлысьяс, тышкайӧзлӧн юралысь-веськӧдлысьяс, ӧксылӧн да сылӧн пияныслӧн овмӧс да ыж-мӧс вӧсна кывкутысьяс, ыджыд чина йӧз да став тӧдчана йӧз.

² Давид ӧксы сувтіс да шыасис на дінӧ: «Кывзӧй менӧ, вокъясӧй, менам войтырӧй! Менам вӧлі кӧсйӧм лэптыны Господьлӧн Йитӧд кудйыслы керка, медым сійӧ вӧлі миян Енлӧн кок улӧн. Ме дасьтыси лэптыны сійӧс,

³ но Енмыс шуис меным: ”Тэ он лэпты Меным керка, ӧд тэ уна вир кисьтін тышъяс дырйи”.

⁴ Господь, Израильлӧн Ен, бӧрйис менӧ батьлӧн рӧдысь да пыр кежлӧ пуктіс Израильлӧн ӧксыӧ. Став чужанкотырыс пӧвстысь Сійӧ бӧрйис Иудаӧс да пуктіс сійӧс юралысьӧ, Иуда чужанкотыр пӧвстысь бӧрйис менам батьлысь рӧдсӧ, а менам батьлӧн пиян пӧвстысь ме вои Сылы сьӧлӧм вылас, и Сійӧ пуктіс менӧ ӧксыӧ Израильлы.

⁵ Господь сетіс меным уна пи, но став пиян пӧвстысь Сійӧ бӧрйис Соломонӧс, медым сійӧ пукаліс Господьлӧн юралан пуклӧсын да веськӧдліс Израиль войтырӧн.

⁶ Господь шуис меным: ”Тэнад Соломон пиыд лэптас Меным керка да вӧчас йӧр. Ӧд Ме бӧрйи сійӧс, медым сійӧ вӧлі Меным пиӧн, а Ме – сылы батьӧн.

⁷ Сійӧ кӧ кутас овны менам индӧд-тшӧктӧмъяс серти, кыдзи сійӧ ӧні вӧчӧ, Ме вынсьӧда сылысь юралӧмсӧ нэмъяс кежлӧ”.

⁸ Ӧні Господьлӧн став Израиль войтыр водзын да миян Ен водзын тшӧкта: зумыда кутчысьӧй асланыд Господь Енлӧн тшӧктӧмъясӧ. Сэки тайӧ бур муыс лоӧ тіян, и ті вичмӧданныд сійӧс асланыд челядьныдлы пыр кежлӧ.

⁹ А тэ, Соломон пиӧй, тӧд аслад батьыдлысь Енсӧ, кесъяв Сылы став сьӧлӧмнад да став олӧмнад. Ӧд Господь быдӧнлысь тӧдмалӧ сьӧлӧмсӧ да тӧдӧ мӧвпъяссӧ. Кутан кӧ корсьны Сійӧс, сэки аддзан, а эновтан кӧ, Сійӧ пыр кежлӧ эновтас тэнӧ.

¹⁰ Видзӧдлы, Господь бӧрйис тэнӧ вӧчны вежа керка. Сідзкӧ, ло зумыд, вӧч сійӧс!»

¹¹ Давид сетіс аслас Соломон пиыслы серпасъяс, мый серти колӧ вӧлі вӧчны крам посводз да дзоньнас крамсӧ, озырлун видзанінъяс, вылысса жыръяс, вежӧсъяс да Ен куд видзан вежаин.

¹² Сетіс став серпас-баласӧ, мый дасьтіс-лӧсьӧдіс Лов нуӧдӧм улын: Господьлӧн крам йӧрлысь да сыгӧгӧрса вежӧсъяслысь серпассӧ, Енлӧн крам видзанінлысь да вежа козин видзанінлысь серпассӧ.

¹³ Давид сетіс Соломонлы поп-левит котыръяс йылысь, Господьлӧн крамын кесъялӧм йылысь да кесъялан дозмук-кӧлуй йылысь тшӧктӧмъяс.

¹⁴ Сійӧ висьталіс, уна-ӧ колӧ эзысь-зарни, медым вӧчны кесъялан дозмук-кӧлуй,

¹⁵ бикокъяс да би дозъяс. Сійӧ индіс быд бикоклысь сьӧктасӧ сыӧн вӧдитчӧм серти.

¹⁶ Давид висьталіс, уна-ӧ колӧ эзысь-зарни, медым вӧчны эзысь пызанъяс да зарни пызан, кытчӧ пуктыны нянь,

¹⁷ уна-ӧ колӧ весалӧм зарни, медым вӧчны яй бергӧдлан вилаяс, вир резан тасьтіяс да кисьтан вись дозъяс, уна-ӧ колӧ эзысь-зарни, медым вӧчны мукӧд дозсӧ,

¹⁸ уна-ӧ колӧ сывдӧм зарни, медым вӧчны тшынӧдчан висьпуктанін. Давид сетіс серпасъяс, мый серти колӧ вӧлі вӧчны тарантас да зарни херувимъяс, кодъяс шевкнитӧм бордъяснас вевттясны Господьлысь Йитӧд кудсӧ.

¹⁹ «Став тайӧ тшӧктӧмъяссӧ крам вӧчӧм йылысь ме тӧдмалі Господьсянь да гижи найӧс», – висьталіс Давид.

²⁰ Давид шуис аслас Соломон пиыслы: «Ло зумыд да повтӧм, босьтчы уджӧ! Эн пов, эн майшась, ӧд Господь Ен, менам Енмӧй, тэкӧд. Сійӧ оз коль, оз эновт тэнӧ, но отсалас помавны Господьлысь крам вӧчан уджъяссӧ.

²¹ Попъяс да левитъяс дасьӧсь вӧчны быдпӧлӧс уджсӧ Енлӧн крамын. Тэнад эм йӧз, кодъяс кӧсйӧны да кужӧны вӧчны быдтор. А юралысьяс да став войтырыс кутасны кывзыны став тэнсьыд тшӧктӧмъястӧ».