1 Каднебӧг 24 - Коми Библия 2023

Попъяслӧн котыръяс

¹ Ааронсянь чужысьясӧс юклісны котыръяс вылӧ. Ааронлӧн вӧліны Надав, Авиуд, Элазар да Итамар пиян.

² Надав да Авиуд кулісны батьсьыс водзджык, налӧн эз вӧвны пияныс. Элазар да Итамар кесъялісны попъясӧн.

³ Элазар рӧдысь Садоккӧд да Итамар рӧдысь Ахимелеккӧд ӧтвылысь Давид юкліс попъясӧс котыръяс вылӧ, медым найӧ кесъялісны сьӧрсьӧн-бӧрсьӧн.

⁴ Элазарсянь чужысьыс вӧлі унджык Итамарсянь чужысьяс дорысь, та вӧсна найӧс вӧлі юклӧма сідзи, мый Элазарлӧн рӧдын вӧлі дас квайт рӧдкутысь, Итамарлӧн рӧдын – кӧкъямыс.

⁵ Найӧс юклісны пудъясьӧмӧн, ӧд Енлӧн вежаинын юралысьясыс вӧліны кыкнан рӧдсьыс: Элазарлӧн да Итамарлӧн рӧдысь.

⁶ Гижалысь Шемай, Нафанаиллӧн пиыс, коді тшӧтш вӧлі левит, гижаліс налысь нимъяссӧ ӧксы да юралысьяс дырйи, Садок поп дырйи да Авиатарлӧн Ахимелек пиыс дырйи, попъяслӧн да левитъяслӧн рӧдкутысьяс дырйи. Пудъясьӧмӧн индылісны сьӧрсьӧн-бӧрсьӧн Элазар рӧдысь ӧти котыр, сэсся Итамар рӧдысь ӧти котыр, и тадзи водзӧ.

⁷ Медводдза пудйыс уси Ехояривлы, мӧдыс – Едайлы,

⁸ коймӧдыс – Харимлы, нёльӧдыс – Сеоримлы,

⁹ витӧдыс – Малкийлы, квайтӧдыс – Мияминлы,

¹⁰ сизимӧдыс – Хаккоцлы, кӧкъямысӧдыс – Авийлы,

¹¹ ӧкмысӧдыс – Исуслы, дасӧдыс – Шеканийлы,

¹² дас ӧтикӧдыс – Эльяшивлы, дас кыкӧдыс – Якимлы,

¹³ дас коймӧдыс – Хуппайлы, дас нёльӧдыс – Ешевавлы,

¹⁴ дас витӧдыс – Вилгалы, дас квайтӧдыс – Иммерлы,

¹⁵ дас сизимӧдыс – Хезирлы, дас кӧкъямысӧдыс – Гапицецлы,

¹⁶ дас ӧкмысӧдыс – Петахийлы, кызьӧдыс – Езекильлы,

¹⁷ кызь ӧтикӧдыс – Якинлы, кызь кыкӧдыс – Гамуллы,

¹⁸ кызь коймӧдыс – Делайлы, кызь нёльӧдыс – Маазийлы.

¹⁹ Тадзи налӧн котыръяслы вӧлі лӧсьӧдӧма сьӧрсьӧн-бӧрсьӧн кесъявны Господьлӧн крамын, кыдзи Аарон батьныс пыр налы тшӧктіс вӧчны Господь, Израильлӧн Ен.

²⁰ Левий чужанкотырысь нӧшта вӧліны Амрамлӧн Шуваэл пиыс, Шуваэллӧн Ехдей пиыс,

²¹ Рехавийлӧн Ишший пиыс, рӧдкутысь,

²² Ицгарлӧн Шеломот пиыс да Шеломотлӧн Яхат пиыс.

²³ Хевронлӧн пиянысь Ерий вӧлі рӧдкутысь, мӧд пиыс вӧлі Амарей, коймӧдыс – Яхазиэл, нёльӧдыс – Екамам.

²⁴ Узиэллӧн вӧлі Микей нима пи, Микейлӧн – Шамир.

²⁵ Микейлӧн вӧлі Ишший нима вок. Ишшийлӧн вӧлі Закар нима пи.

²⁶ Мерарилӧн вӧліны Махли да Муши пиян. Яазийлӧн вӧлі Бено нима пи.

²⁷ Мерарисянь чужысь Яазийлӧн вӧліны Бено, Шогам, Заккур да Иври пиян.

²⁸ Махлилӧн вӧлі Элазар нима пи, но сылӧн эз вӧвны пияныс.

²⁹ Кислӧн вӧлі Ерахмеэл нима пи.

³⁰ Мушилӧн вӧліны Махли, Эдер да Еримот пиян. Тайӧ вӧліны левитъяс рӧдныс серти.

³¹ Найӧ тшӧтш пудъясисны, кыдзи пудъясисны Ааронлӧн рӧдысь налӧн вокъясныс. Аарон рӧдысь вокъясныс моз найӧ пудъясисны Давид, Садок да Ахимелек дырйи, тшӧтш попъяслӧн да левитъяслӧн рӧдкутысьяс дырйи. Рӧдкутысьяс йылысь да налӧн ичӧтджык вокъясныс йылысь пудъясисны ӧтмоза.