1 Каднебӧг 19 - Коми Библия 2023

Давид вермӧ аммон да арамей войтыръясӧс

¹ Кад мысти куліс аммон войтырлӧн Нахаш ӧксы, и сы пыдди пуксис ӧксыӧ сылӧн пиыс.

² Давид шуис: «Ме бурсьӧлӧмтча Ханун дінӧ, ӧд сылӧн Нахаш батьыс вӧлі бур сьӧлӧма ме дінӧ». Давид мӧдӧдіс йӧзӧс, медым Ханункӧд тшӧтш юкны шогсӧ сылӧн батьыс вӧсна. Кор Давидлӧн кесйӧгъяс локтісны аммон войтырлӧн муӧ, медым бурӧдны Ханунӧс,

³ сэтчӧс юралысьяс шуисны Ханунлы: «Тэ чайтан, Давид збыльысь пыдди пуктӧ тэнсьыд батьтӧ и та вӧсна мӧдӧдіс тэ дінӧ ассьыс йӧзсӧ? Сійӧ мӧдӧдіс найӧс кыйӧдчысьясӧс моз, мед видзӧдлыны мунымӧс, а сэсся бырӧдны сійӧс».

⁴ Ханун босьтіс Давидлысь кесйӧгъяссӧ, шырис найӧс да улісяньыс коскӧдзыс вундіс налысь паськӧмнысӧ шӧрипельӧ. Сэсся бӧр ыстіс найӧс.

⁵ Найӧ мунісны. Давидлы кор юӧртісны, мый сылысь кесйӧгъяссӧ татшӧм ногӧн янӧдӧмаӧсь, сэки налы воча мӧдӧдіс йӧзӧс. Ӧксы тшӧктіс висьтавны, медым сылӧн янӧдӧм кесйӧгъясыс кольччасны Ериконӧ да оласны сэні, кытчӧдз оз быдмы тошныс, а сэсся вермасны бӧр локны.

⁶ Аммонсаяс казялісны, мый найӧ лоины мустӧмӧсь Давидлы. Ханун да аммонсаяс мӧдӧдісны сюрс талант эзысь арамейяслы Месопотамияӧ, Маакаӧ да Цоваӧ, медым медавны сэтысь аслыныс тарантасъяс да верзьӧмаясӧс.

⁷ Найӧ медалісны комын кык сюрс тарантас да маакаса ӧксыӧс сылӧн тышкайӧзкӧд. Найӧ локтісны да сувтісны Медева кар водзӧ. Аммонсаяс асланыс каръясысь чукӧртчисны ӧти карӧ да дасьтысисны петны тышӧ.

⁸ Кор Давид кыліс та йылысь, мӧдӧдіс налы паныд Йоавӧс да став ассьыс тышкайӧзсӧ.

⁹ Аммон тышкайӧз сувтісны карса дзиръя дорӧ. Отсавны локтысь ӧксыяс сувтісны эрд вылӧ, наысь торйӧн.

¹⁰ Йоав аддзис, мый вӧрӧг локтӧ кыкладорсянь – водзысяньыс и бӧрсяньыс. Сэки сійӧ бӧрйис израильса тышкайӧзысь медбуръяссӧ да сувтӧдіс найӧс арамейяслы паныд.

¹¹ А мукӧдсӧ сетіс Авишай вокыслы, мед сійӧ сувтас накӧд аммон тышкайӧзлы паныд.

¹² Йоав шуис Авишайлы: «Арамейяс кӧ кутасны вермыны менӧ, тэ отсалан меным, а аммон тышкайӧз кӧ кутасны вермыны тэнӧ, ме локта тэныд отсӧг вылӧ.

¹³ Эн пов. Кутам зумыда сулавны асланым войтыр вӧсна, миян Енлӧн каръяс вӧсна. А Господь вӧчас, кыдзи Сылы колана».

¹⁴ Йоав аслас тышкайӧзкӧд уськӧдчис арамейяс вылӧ, и найӧ пышйисны сыысь.

¹⁵ Аммон тышкайӧз аддзисны арамейяслысь пышйӧмсӧ, и найӧ тшӧтш пышйисны Йоавлӧн Авишай вокысь да локтісны асланыс карӧ. Йоав бӧр муніс Ерусалимӧ.

¹⁶ Кор арамейяс аддзисны, мый израильсаяс вермисны найӧс, мӧдӧдісны юӧртысьясӧс да корисны мукӧд арамейясӧс ю сайысь. Сэтысь локтысьясӧн веськӧдліс Шовак, Ададезер тышкайӧзлӧн юралысь.

¹⁷ Давидлы кор юӧртісны та йылысь, сійӧ чукӧртіс став израильса тышкайӧзсӧ да вуджис накӧд Йӧрдан ю сайӧ. Давид аслас йӧзкӧд сувтісны, мед петны арамейяслы паныд тышӧ.

¹⁸ Давид пасьвартіс арамейясӧс, и найӧ пышйисны израильсаясысь. Давид бырӧдіс налысь сизим сюрс тарантас да нелямын сюрс подаӧс. Виис тшӧтш Шовакӧс, тышкайӧзлысь юралысьсӧ.

¹⁹ Кор Ададезерлӧн киподувса ӧксыяс аддзисны, мый израильсаяс вермисны найӧс, сэки сёрнитчисны Давидкӧд, мед пом пуктыны тышныслы, сэсся сетчисны сылы. Арамейяс сэсся эз нин кӧсйыны отсавны аммон войтырлы.