1 Фессалоникаӧ 5 - Коми Библия 2023

Ті – югыдыслӧн ныв-пи

¹ Вокъяс, урчитӧм кад йывсьыс абу колана гижны тіянлы.

² Ті ӧд асьныд бура тӧданныд, мый Господьлӧн луныс воас войся гусясьысь моз.

³ Кор йӧзыс кутасны шуавны, гӧгӧр пӧ лӧнь, повнысӧ пӧ нинӧмысь, сэки тӧдлытӧг суас найӧс кулӧм, кыдзи тӧдлытӧг суӧ кага чужтысьӧс дой. Сэки некод оз вермы пышйынысӧ.

⁴ Вокъяс, ті онӧ пемыдас олӧй. Сідзкӧ, сійӧ луныс оз во тіян дінӧ гусясьысь моз тӧдлытӧг,

⁵ ӧд ті – луныслӧн да югыдыслӧн ныв-пи. Ми абу пемыдыслӧн, абу войыслӧн ныв-пи.

⁶ Сідзкӧ, мукӧдыс моз огӧ кутӧй узьны. Садьмӧдчам да кутам овны садь вежӧрӧн.

⁷ Ӧд узьысьяс войнас узьӧны, юысьяс войнас кодалӧны.

⁸ А ми – луныслӧн ныв-пи. Сідзкӧ, кутам овны садь вежӧрӧн. Пасьталам ас выланым муслуныслысь да эскӧмыслысь кӧрт кышӧдсӧ, а юртупкӧд пыдди босьтам мездмӧм вылӧ лачасӧ.

⁹ Ӧд Енмыс бӧрйис миянӧс эз сы могысь, медым Сылӧн скӧрлуныс суис миянӧс, но сы могысь, медым Исус Кристос Господьным пыр ми босьтім мездмӧмсӧ.

¹⁰ Кристос куліс миян вӧсна, медым ми, ловъяӧсь али кулӧмаӧсь, олім Сыкӧд.

¹¹ Сідзкӧ, ӧнія моз водзӧ ышӧдӧй да ёнмӧдӧй ӧта-мӧднытӧ.

Павеллӧн корӧм-тшӧктӧмъяс

¹² Вокъяс, корам тіянӧс: пыдди пуктӧй тіян пӧвстын уджалысьясӧс, Господькӧд ӧтувъя олӧмас тіянӧс туйдӧдысьясӧс да тіянӧн веськӧдлысьясӧс.

¹³ Вылӧ пуктӧй татшӧм йӧзсӧ, радейтӧй найӧс налӧн уджысь. Ас костаныд олӧй лӧня.

¹⁴ Вокъяс, корам тіянӧс: дышъясӧс туйдӧдӧй, полысьясӧс ышӧдӧй, жебъясӧс кутыштӧй, быдӧнӧс терпитӧй.

¹⁵ Видзчысьӧй, мед некод лёксьыс эз мынтысь лёкӧн. Мӧдарӧ, зільӧй вӧчны бурсӧ ӧта-мӧдныдлы да став йӧзыслы.

¹⁶ Пыр нимкодясьӧй.

¹⁷ Дугдывтӧг кевмысьӧй.

¹⁸ Ставсьыс аттьӧалӧй Енсӧ, ӧд татшӧмъясӧн Енмыс кӧсйӧ аддзыны тіянӧс, Исус Кристослы эскысьясӧс.

¹⁹ Ловлысь ыпъялӧмсӧ энӧ кусӧдӧй.

²⁰ Пророкъяслысь висьталӧмсӧ энӧ ӧтдортӧй.

²¹ Ставсӧ тӧдмалӧй, бурас кутчысьӧй.

²² Ылыстчӧй быдпӧлӧс лёксьыс.

²³ Лӧньлуныслӧн Ен мед Ачыс тырвыйӧ вежӧдас тіянӧс да видзас тіянлысь ловнытӧ, олӧмнытӧ да вир-яйнытӧ сӧстӧмӧн миян Господь Исус Кристос локтігкежлӧ.

²⁴ Сійӧ, коді корис тіянӧс, эскана. Сідзкӧ, вӧчас шуӧм сертиыс.

²⁵ Вокъяс, кевмысьӧй миян вӧсна.

²⁶ Чолӧмалӧй вокъясӧс вежа окыштӧмӧн.

²⁷ Кора тіянӧс Господь нимӧн: лыддьӧй тайӧ гижӧдсӧ став вежа вокъяслы.

²⁸ Миян Господь Исус Кристослӧн буралӧмыс тіянкӧд. Аминь.