1 Фессалоникаӧ 3 - Коми Библия 2023

¹ Миянлы вӧлі вывті сьӧкыд тіянкӧд дыр кад янсалӧмысь. Та вӧсна ми шуим, мый асьным кольччам Афин карӧ,

² а Тимофей вокнымӧс мӧдӧдам тіян дінӧ. Сійӧ миянкӧд ӧтвыв кесъялӧ Енмыслы, отсалӧ висьтавлыны Кристослысь Бур Юӧрсӧ. Ми мӧдӧдім сійӧс тіян дінӧ, медым ышӧдны тіянӧс да ёнмӧдны эскӧмнытӧ,

³ медым сьӧкыдсӧ нуигӧн тіян пӧвстысь некод эз усь. Ті ӧд асьныд тӧданныд, мый миянлы ковмас нуны сьӧкыдсӧ.

⁴ Тіянӧ волігӧн ми висьтавлім нин, мый ковмас нуны сьӧкыдсӧ. Ті тӧданныд, мый дзик тадзи и лоис.

⁵ Та вӧсна ме эг нин вермы виччысьнысӧ, а мӧдӧді тіян дінӧ Тимофейӧс, медым тӧдмавны тіян эскӧмныд йылысь, эз-ӧ ылӧдлы тіянӧс омӧльыс, эз-ӧ ло весьшӧрӧ миян уджным.

Нимкодь юӧр

⁶ Тимофей сӧмын на воис тіян дінысь да вайис тіян эскӧмныд да муслунныд йылысь нимкодь юӧр, ті пӧ век бур ногӧн казьтывланныд миянӧс да миян моз ёна кӧсъянныд аддзысьлыны миянкӧд.

⁷ Та вӧсна, вокъяс, став тайӧ сьӧкыдсӧ нуигӧн да миянӧс вӧтлігӧн тіян эскӧмныд ышӧдіс миянӧс.

⁸ Ӧні миян сьӧлӧмын лӧнь, ӧд ті зумыда кутчысянныд Господь дінӧ.

⁹ Ми ёна аттьӧалам Енсӧ тіянысь, ӧд ті сетанныд миянлы позянлун ёна нимкодясьны Ен водзын.

¹⁰ Ми лун и вой сьӧлӧмсянь кевмысям, медым аддзысьлыны тіянкӧд да сетны тіян эскӧмлы тырмытӧмсӧ.

¹¹ Ачыс Енмыс, миян Бать, да миян Господь Исус Кристос мед веськӧдасны миянлысь туйнымӧс тіян дінӧ.

¹² Господь мед уна пӧв содтас ӧта-мӧдныд дінӧ да став йӧзыс дінӧ муслуннытӧ. Тіян муслунныд мед лоӧ сэтшӧм жӧ вына, кутшӧм вына тіян дінӧ миян муслунным.

¹³ Господь мед ёнмӧдас сьӧлӧмнытӧ, медым ті вӧлінныд вежаӧсь да сӧстӧмӧсь Ен Батьным водзын, кор миян Господь Исус Кристос локтас став Аслас вежа войтыркӧд. Аминь.