Ebraniin 1 - TIMIꞌDI TUMMA MA ꞌBÏTÏNGNGÖ NJA RAWUS NJA YÜNAN

Tumma na Masala nja ꞌBiiꞌbala tiya oono

¹ ꞌBilli Masala magürünü naganeꞌbi kadageema nja kafaafa ma angnga a naguuru nja nafïïnï kada tonggoonyo.

² Lakiini ka naguuru tanno eere no, mageema nja angnga a ꞌBiiꞌbala tiya oono, ya ara takarna ka eema nyeꞌdꞌde yoono ka tadina ꞌbüdhülü ana iꞌi ya.

³ ꞌBiiꞌbala iꞌi ya töyeene ma tïdhïndhï ma Masala iꞌi ya koronggore ma taneene tanno oono afa ka eema nyeꞌdꞌde a türü ma tumma tanno iini, a kini ka ndagala tatoroko naaja emmi ka nïïsö ma kuri ma tïdhïndhï ma Masala ka ꞌdotomboꞌdo.

⁴ Nggeege iꞌi ïdhïndhï adagiiꞌbi kadhangga kudumma iini ka aꞌduga eere adagiiꞌbi nagareene neene.

⁵ Taalo Masala miki a tadhangga töccö, “Oꞌo no ꞌBiiꞌbala tiya eede, aꞌa nageene oꞌo ka uuru tanno.” Miki afeꞌde, “Ara ta Pupa tiya iini ata ꞌbiiꞌbala tiya eede.”

⁶ Ka Masala ka agürünü ꞌBiiꞌbala yoono ya dhidha ya ka ꞌbüdhülü ya, miki aꞌda, “A kadhangga ma Masala tüürü kini kidha.”

⁷ A Masala meema tumma ma kadhangga miki, “Marüꞌbü kadhangga kada tanya, a kadu ma linggo noono ka nagonggoꞌdo ma ïssï.”

⁸ Lakiini kudumma ma ꞌBiiꞌbala miki, “Ka Masala, tauugaara nüüdü kara tütü turi taꞌbilli, a kuufi ma tauugaara ta tiya üüdü dhorro turi.

⁹ Nasaasa oꞌo tumma no dhorro nanu ka tanno atoroko no, yungngo a Masala, Masala müüdü ka tagesse oꞌo masiri uuꞌba üdü ka üüdü ma dhodho masa ka titaalo manangnga a kijöögö.”

¹⁰ Miki afeꞌde, “Ka Uugaara, narüꞌbü ꞌbüdhülü ka dhidha, narüꞌbü oꞌo ꞌdotomboꞌdo ana iisine ma oꞌo.

¹¹ Eege kara tamanyaga, ara oꞌo ka tütü, kara toorodo afa tenꞌdi.

¹² Ara oꞌo taꞌdukunjaana eege koꞌdo afa tenꞌdi ka temꞌbele, lakiini oꞌo naganuuru nüüdü taalo kara titaalo.”

¹³ Taalo Masala miki a kadhangga, “Emmi kede ka nïïsö ma kuri kita, ara aꞌa tanangnga diidi yüüdü küdü ka uune nasiri kene.”?

¹⁴ Kadhangga eege ka nagoronggore tanno linggo ada Masala, na oono ka kürünü eege kööꞌdö takarna ka toolonadene?