TITO 3 - Bukuit Ne Tilil

Yai poisyonik che myach

¹ Ibwaatyi icheek koming'injigei pounik, ak pounatosyek, kogas iit, kochobogis eng' poisyet age tugul ne myee,

² amat komwa kiy ne ya agobo chii age tugul, amat koek piich che po pooryot, ingoek che talaen, koboorchin piik tugul mutyonet tugul.

³ Amu ki kiberberen agacheek keny, ki ma kegase iit, ki kiberberech, keote maguutik che teerchiin ak ureryosyek, ketebye eng' yaityet ak ng'etkong', ki kiche kiwechei ak kewechegei.

⁴ Ago ye kingo took talasyetap Kamuktaindet Yetindennyo, ak chamyennyi ne chamei piik,

⁵ kosarwech, ma eng' poisyonigap imanda che ki kiyai acheeget, ago ko uu ole teptoi rireenennyi pogei, eng' kaunetap sigeet ne leel ak kaleelitetap Kabuuset ne Tiliil,

⁶ ne kiroong'wech eng' aiyebindo eng' Jeso Kristo Yetindennyo;

⁷ si, ye kagiityech imanda eng' myeeindonyi, keyaech keegu che namei tuguuk ko uu kamang'unetap saboondap koigeny.

⁸ Po iman ng'olyoondoni, ak amache imwa tuguuchuuto eng' kimnateet, si kobwaat icheek che ki koyan Kamuktaindet, koyai kotugul poisyonik che myach. Myachen tuguuchuuto ak kotoreti piik:

⁹ ago istoegei teebutik che perber, ak tetuutigap ibinwek che ki kosiirto, ak suryosyek, ak pooryosyek agobo Ng'atuutyet; amu ma tinyei porot ak ko puch.

¹⁰ Eesye chiito ne ibu toiyet ye kagitigon ne po tai ak ne po aeng';

¹¹ ingen ile chiito ne uu nooto ko ki komaasta, ak koyaei tengekto, ko kagorwookyigei.

Ng'aleek che po let

¹² Ye tuun kayogu Artema, anan Tukiko, igiilgei inyoo eng' Nikopoli ole ami; amu koabegechi atebee olooto eng' peetuusyegap kaitityet.

¹³ Igiilgei imonorsechi eng' pandanywa Sena ng'amotyotap ng'atuutik ak Apolo, si ma rarta kiy eng' icheek.

¹⁴ Ak ingoneetkei piikyok ak icheek koyai poisyonik che myachen kotugul, agobo tuguuk che makyingei, si ma ek che mayiei logoek.

¹⁵ Igatin tugul che kemi tugul. Igat icheek che chamech eng' kayaneet. Ingotep myeeindo kobootok okweek tugul.