TITO 2 - Bukuit Ne Tilil

Kaneetisyet ne nyoljin piik che teerchiin

¹ Ago ng'alaal inyee agobo ng'aleek che nyoljin kaneetisyet ne po iman:

² si koriipkei poisyek che kagoeegitu, koek che po teegisto, che pou kabwaatutikwak, che po iman eng' kayaneet, eng' chamyet, eng' muitaet:

³ ko uu nooto chebyosok che kagoeegitu, ingoek che teegot eng' atebosyekwak, che ma kataamik, anan che rategei eng' divaik che chaang', kaneetik che po tuguuk che myach;

⁴ si kobiit koneet osotik che mengeechen kocham manong'otaikwak, kocham lagokwak,

⁵ koek che pou kabwaatutikwak, che tiliileen, che poisyei eng' kooriikwak, che talaen, che kase iit manong'otaikwak, si ma kimwaitae ng'olyootap Kamuktaindet kiy ne ya:

⁶ iteechi neranik ak icheek koek che pou kabwaatutikwak;

⁷ ibartegei inyeendet eng' tuguuk tugul iegu kaboorunet ne po poisyonik che myachen; eng' kaneetisyeng'ung' ibarte atebeet ne ma ng'emaksei,

⁸ ng'aleek che po iman, teegisto, che ma kimuuchi kirwookyi; si kobiit kolilaan ineendet ne kirindoech, koma tinyei kiy ne ya ne mwaitaenech.

⁹ Ingogas iit otwogik kiptainikwak, ak kobaibai icheek komyee eng' tuguuk tugul; amaek che wolu kiy;

¹⁰ amaek che kooen eun, ago kobarta kayaneet tugul ne myee; si kobiit kogoochi icheek telunateet kaneetisyetap Kamuktaindet ne Yetindennyo eng' tuguuk tugul.

¹¹ Amu ki kotook myeeindap Kamuktaindet, ne ipchin piik tugul yetunet.

¹² Ineetech kole keeesye ooreet ne ma tokyingei Kamuktaindet, ak maguutik che po ng'wony, ak ketebi eng' ng'omnateet ne litit, ak eng' imanda, ak eng' ooreet ne tokyingei Kamuktaindet eng' kenyisyechu;

¹³ kigeni kamang'unet ne iberuurot, nooto ko tagunetap toroornatetap Kamuktaindet nenyo ne oo ne Yetindennyo Jeso Kristo;

¹⁴ ne ki igoitogei agobo acheek, si kobiit kotyachech eng' tengekto tugul, ak kotiliiljigei piik koek chechiik, che lewenotin, che igiilegei eng' poisyonik che myach.

¹⁵ Mwaa tuguuchuuto ak iteechi ak iger kong' kobooto pounateet tugul. Amat kosasin chii age tugul.