TITO 1 - Bukuit Ne Tilil

Kagateet

¹ Paulo, otwogindetap Kamuktaindet, ak kayooktoindet ne po Jeso Kristo, ko uu kayaneetap che ki kilewen che po Kamuktaindet, ak naetap imanit ne namegei ak kayweet ne kiywei Kamuktaindet,

² eng' kamang'unet ne po saboondap koigeny, ne ki iyomis Kamuktaindet, ne ma imuuchi kolembechaan, kobooch kenyiisyek che po koigeny;

³ ago ki ng'aany ng'olyoondennyi eng' peetuusyekyik eng' amdaet, ne ki kiyanwa ko uu ng'atuutyetap Kamuktaindet Yetindennyo:

⁴ asirchini Tito, lakweennyu ne po iman eng' kayaneet ne kiyamdoi: Ingotep kobooten myeeindo ak kaalyeet che punu Kamuktaindet Kwanda ak Kristo Jeso Yetindennyo.

Poisyetap Tito eng' Krete

⁵ Ki abagaakteen eng' Krete amu ng'olyoondoni, si kobiit ichop tuguuk che ki rartootin, ak inde poisyek nganaseet age tugul, ko uu ye ki ang'atiin;

⁶ ngot komi chii age tugul ne ma tinyei leluut, ne manong'otyotap osotyot agenge, ne tinyei lagok che iyanotin, che ma kimwaitae yaityo, anan che ma kase iit.

⁷ Amu kanyolji riibindetap kaniset koek chii ne ma tinyei leluut, ineendet ne riibindetap poisyetap Kamuktaindet; ma ne isubi magennyi, ne ma sip konereechi, ne ma kimaiya, ne ma pirisyei, ne ma ting'ee keiyandit mogornateetap teweernateet;

⁸ ago ne taachei toek, ne chamei che myachen, ne pou kabwaatutikyik, ne po imanda, ne tiliil, ne riibegei;

⁹ ne namei ng'olyoot ne kiyani ko uu ole teptoi kaneetisyet, si komuuch koteechi eng' kaneetisyet ne po iman, ak koterteer kiptiyotinik.

¹⁰ Amu mi piik che chaang' che ma kase iit, ng'alaaligap ng'aleek che po puch ak keniik, miising' ko icheek che po kamuratanet,

¹¹ che kanyool keger kutusweekwak; che itarng'aanyi ko komugul, koneeti tuguuk che kama konyolu amu mogornateetap teweernateet.

¹² Ki le age eng' icheek, ne maotyonnywa, Kiplembechonik Kretik kotugul, tyong'ik che yaacheen, kipkeinik che choriren.

¹³ Po iman paornataniito. Kergong' anyun eng' kimnateet amu nooto, si kobiit koek che po iman eng' kayaneet,

¹⁴ ama epchin iit atindonigap Yahudik, ak ng'atuutigap piik che istoegei imanit.

¹⁵ Tiliileen tuguuk tugul eng' icheek che tiliileen: ago ma mi kiy ne tiliil eng' icheeget che murwonen che ma iyanotin; ago murwonen nautikwak ak kabwaatutikwak.

¹⁶ Mwaei kole ingen Kamuktaindet; ago eesyoi ineendet eng' poisyonikwak, ki koek che kiwechei, ak che ma kase iit, ama tilei kiy eng' poisyet age tugul ne myee.