TIENWOGIKAL 9 - Bukuit Ne Tilil

Kirwoogutik che po iman che po Kamuktaindet ne Toroor

Po ne oo eng' putiik: eng' Muth-laben. Tyendap Kalasunet ne po Daudi.

¹ Aweekyini Kamuktaindet ne Toroor kongoi eng' muguleldanyu tugul; aboortoi kwang'utiguk tugul.

² Abaibaitu ak agasigei eng' inyee; atyenjini kalasunet kaineng'ung', ee, inyee Ne Toroor Miising'.

³ Ye kaweek let puunikyuk, ibutos ak kolusyo eng' taing'ung'.

⁴ Amu ki iyai kirwoogennyu ak ng'aleekyuk; ki itebee ng'echereetap laitornatet, irwooch anyun eng' iman.

⁵ Ki iger kong' pororyosyek, ak ki ing'em kiptengeginik, ki ibukte kainennywa koigeny agoi koigeny.

⁶ Ki igeskei kobetito puunik koek karatwek koigeny; ki ing'em nganasookwak, ki kogeskei kabwaatet ne kibwaatee icheeget.

⁷ Ago laitorani Kamuktaindet ne Toroor koigeny; Ki kochopchi ng'echerennyi po laitornatet kirwooget.

⁸ Irwookyin ineendet ng'wony eng' imanda, ibesyechin piik kirwooget eng' imanda.

⁹ Egu `Kamuktaindet ne Toroor irimeetap ne kiusei, irimeet eng' peetuusyegap nyalilda.

¹⁰ Ak imang'un icheek che ingen kaineng'ung', amu inyee, Kamuktaindet ne Toroor, koma imete che cheeng'in.

¹¹ Otyenji kalasunet Kamuktaindet ne Toroor ne menyei Zion. Omwaite poisyonikyik eng' kwenutap piik.

¹² Amu ibwaati icheek ne yaaktoi mugetuut agobo korotiik; ma utye riiregap kibananook.

¹³ Rireena, ee Kamuktaindet ne Toroor! Keer nyalildanyu ne punu icheek che wecho, inyee ne itogosuneno eng' kurgotigap meet,

¹⁴ si kobiit abarta kalasuneng'ung' tugul; ak eng' kurgotigap cheptap Zion, agasegei yetuneng'ung'.

¹⁵ Kagororokyi pororyosyek keriinget ne ki palei; kagonam keelyekwak mesteet ne kiga uny icheek.

¹⁶ Kigoboorgei Kamuktaindet ne Toroor, ki korwooch inee; ki konam kiptengekyot poisyetap eunekyik. [Higgaion. Selah]

¹⁷ Weechegei kiptengeginik kobendi ye mi meet, agot pororyosyek tugul che utye Kamuktaindet.

¹⁸ Ago ma kiutye kotugul kibananook, ama petei koigeny kamang'unetap che nyalildos.

¹⁹ Ng'eet, ee Kamuktaindet ne Toroor! Amat ichamji piik koterteeris. Ingirwooksechi pororyosyek eng' taing'ung'.

²⁰ Ee Kamuktaindet ne Toroor, imu icheek; ingonai pororyosyek kole icheek ko piik kityo.