TIENWOGIKAL 74 - Bukuit Ne Tilil

Saaet agobo Pororyet

¹ Ee Kamuktaindet, amu nee si iwiirtech agoi? Amu nee si koiyenji nereegeguk keechiiregap akweeng'ung'?

² Ibwaat tuiyeng'ung' ne ki ial keny, Ne ki ityaach koek pororyetap poroteng'ung'; Tulweetap Zion ole ki imeny.

³ Iyogoochi keeldong'ung' ole Ki kong'emak koigeny, Yaityet tugul ne ki koyai puunyoot eng' ole-tiliil.

⁴ Kogoborisenso puuniguk eng' kwenutap tuiyeng'ung'; Ki konde songolikwak koek kaboorunoik.

⁵ Ki uu icheek piik Che namjin parak aonok, komachei koep keetiigap sondiit.

⁶ Ago putei icheek nguno aonok ak kirisonok poisyennyi tugul ne kagiwai.

⁷ Kigobeel oldang'ung' ne tiliil; Ki koyai ole menyei kaineng'ung' kong'wanit agoi ng'wony.

⁸ Ki le eng' mugulelwekwak, Ongeng'em kowong'kei tugul: Kigobeel kapkorosusyek tugul che po Kamuktaindet eng' emet.

⁹ Ma kigeere kaboorunoikyok; Ma komi maotyondo; Ama mi kwenunnyo age tugul ne ingen kole tyanitu.

¹⁰ Ee Kamuktaindet, rosu puunyoot kot kotyanit? Tos chubei puunyoot kaineng'ung' agoi koigeny?

¹¹ Kalya si iweekte eung'ung', eung'ung' ne po tai? Inemu eng' tegeng'ung', ak iwong'u icheek.

¹² Ago Kamuktaindet ko Laitoryandennyu kobooch keny, Ne yaei yetunet eng' kwenutap ng'wony.

¹³ Ki ipchei inyee nyanjet eng' kimnateng'ung': Ki iri metowegap cheluguinik eng' peek.

¹⁴ Ki iri kotonogis metowegap tyong'ik che eecheen che po peek, che uu ting'ong'ok, Ki igoite koek amditap piik che menyei surkwen.

¹⁵ Ki igereer kong'igap peek ak ainoosyek: Ki iteenyi ainoosyek che kirootei agoi.

¹⁶ Neng'ung' peetuut, ak neng'ung' kemout agine: Ki ichop tuguuk che iluu, ak asiista.

¹⁷ Ki ipchei kiwotosyek tugul che po ng'wony: Ki iyai kemeut ak iwot.

¹⁸ Ibwaat niito, ee Kamuktaindet ne Toroor, ile, ki kogerin kong' puunyoot, ak ki chup piik che abusotiin kaineng'ung'.

¹⁹ Ee, amegoochi saboondap cheptugeng'ung' tyondap timiin: Ameutyee koigeny saboonwegap piiguk che nyalildos.

²⁰ Ibwaat kayomiset: Amu nyiitaat komoswek che imenen che po ng'wony, ole menyei che koroomen.

²¹ Amengoweek kolilaananu ne tinyei usiisyet; Ingolas kaineng'ung' che nyalildos ak che ma tinyei kiy.

²² Ng'eet, ee Kamuktaindet, ibesyechigei ng'aleeguk: Ibwaat ole kertoin kong' eng' peetuut komugul, chiito ne abusat.

²³ Ameutyee ng'aleegap puuniguk: Togostoi kotugul polatetap icheeget che ng'eetyinin.