TIENWOGIKAL 57 - Bukuit Ne Tilil

Soomet agobo Toreteet

¹ Rireena, ee Kamuktaindet, rireena; amu mwechinin saboondanyu. Amwechini urwetap kebebaiguk, agoi kosiirto nyalilwogichu.

² Ariirchini Kamuktaindet Ne Toroor Miising'; Ineendet Kamuktaindet ne isuldaiwo tuguuk tugul.

³ Iyogu toretet eng' kipsengwet ak kosarwo, ye reenya ne machei kolugua. Iyogu Kamuktaindet rireenennyi ak imaninnyi.

⁴ Miitei saboondanyu kwenutap ng'etuunyik; arue kwenutap icheek che miitei maat, agot weeriigap piik, che kelekwak ko ng'otwek ak kipchabonik, ak ng'elyebwekwak ko rotonik che ng'atiben.

⁵ Tororitu, ee Kamuktaindet, isiir kipsengwet. Ingoeet teegistang'ung' eng' ng'wony komugul.

⁶ Kagoriich mesteet si konam keelyekyuk; kagong'uruuk saboondanyu. Kagobal icheek keriinget eng' tainnyu, kagororokyi icheeget olooto.

⁷ Igiilotkei muguleldanyu, ee Kamuktaindet, igiilotkei muguleldanyu. Atyeni, ee atyeni kalasunoik.

⁸ Ng'eet, ee saboondanyu! Ng'eet, ee kibugandet ak ketubet! Ang'eete ko kairir emet!

⁹ Aweegun kongoi, ee Kiptaiyat, eng' kwenutap piik; atyenun kalasunoik eng' kwenutap pororyosyek.

¹⁰ Amu oo rireeneng'ung' agoi kipsengwet, ak itei imaning'ung' poolik parak.

¹¹ Tororitu, ee Kamuktaindet, isiir kipsengwet. Ingoeet teegistang'ung' eng' ng'wony komugul.