TIENWOGIKAL 43 - Bukuit Ne Tilil

Saaetap Chii ye mi eng' riirek

¹ Ibesyeiwo ng'aleekyuk, ee Kamuktaindet, ak itononwo eng' pororyet ne ma po iman; sarwo eng' chiito ne ng'aalsei ak ne ma po iman.

² Ii Kamuktaindet nooto ne amwechini; amu nee anyun si ibagaakta? Amu nee si awo ariiroti amu kanyaliiletap puunyoot?

³ Iyookte lapkeiyeng'ung' ak imaning'ung'; ingondoiywa chooto; ingomuta agoi tulweeng'ung' ne tiliil, ak meng'otosyeguk.

⁴ Awendi anyun kaptisisyetap Kamuktaindet, ole mi Kamuktaindet ne poiboiyennyu ne siirtoot. Alasun eng' ketubet, ee Kamuktaindet, Kamuktaindennyu.

⁵ Amu nee si ing'uruuge, ee saboondanyu? Amu nee si iimige eng' anee? Imang'u Kamuktaindet; amu ta alasu ineendet, ineendet toretindennyu ak Kamuktaindennyu.