TIENWOGIKAL 4 - Bukuit Ne Tilil

Saaetap toreteet eng' koskoleny

Po ne oo eng' putiik eng' kibugandinik che po inoik. Tyendap kalasunet ne po Daudi

¹ Wolwo ye aguurin, ee Kamuktaindet ne po imandanyu! Ki indea parautyet ye ki atinye nyalilda; rireena ak igaswa saaennyu.

² Ee okweek, weeriigap piik, owale teegistanyu koek teweernateet kot kotyanit? Agoi au ochame ng'aleek che ma namegei ak kiy, ak ocheeng'e lembechek?

³ Ago onai ni ole ki kotabaanjigei Kamuktaindet ne Toroor chiito ne po iman; kasei Kamuktaindet ne Toroor ye aguure ineendet.

⁴ Eng' nereegekwok ko moyai tengek; ye omi itook, ong'alaaljigei eng' mugulelwekwok ak osisye.

⁵ Ogoite tiseiywek che po imanda, ak omang'u Kamuktaindet ne Toroor.

⁶ Mwaei che chaang' kole, “Ng'oo ne iboorwech kiy ne myee? Ee Kamuktaindet ne Toroor, tokyech lapkeiyetap togeng'ung'!”

⁷ Ki inde muguleldanyu kaagaasetapkei, kosiir ne tinyei icheek ye katesak peekwak ak divaikwak.

⁸ Alyeldoi ak anuuchi eng' kaalyeet, ee Kamuktaindet ne Toroor, inyee inyegei ne igoono ameng'iis eng' chametapkei.