TIENWOGIKAL 36 - Bukuit Ne Tilil

Yaityetap piik ak myeeindap Kamuktaindet ne Toroor

Po ne oo eng' putiik. Tyendap Kalasunet ne po Daudi kiboityotap Kamuktaindet ne Toroor.

¹ Ng'alaaljin `yaityet pistoindet eng' muguleldanyi, kole ma mi kaiyweisyetap Kamuktaindet eng' konyekyik.

² Amu ilasugei ineendet, leen, ma kinyooru tengektanyi ak kewech.

³ Ng'aleegap kutinnyi ko tengekto ak ng'aalseet; ma komage kiy kong'omit anan koyai ne myee.

⁴ Ruchin tengekto eng' itogunnyi; indogei ooreet ne ma myee; ama wechei yaityet.

⁵ Itei chamyeng'ung' ne tala kipsengwet, ee Kamuktaindet ne Toroor; ak itei parak imandang'ung'.

⁶ Kergei imandang'ung' ak tuloonoogap Kamuktaindet; kergei kirwoogutiguk ak rireet ne oo; ee Kamuktaindet ne Toroor, inyee ne iriibe chii ak tyony.

⁷ Karaaran ne tya chamyeng'ung' ne tala, ee Kamuktaindet! Mwechin anyun weeriigap piik urwetap kebebaiguk.

⁸ Piyong'dos eng' akwaiyetap koong'ung'; ak igoochini koee che po aineetap poiboindang'ung'.

⁹ Amu mi oldang'ung' kondap peegap saboon; eng' lapkeiyeng'ung' kegeere lapkeiyet.

¹⁰ Ingotepto chamyeng'ung' ne tala icheek che ingenin; ak ingotepto yetuneng'ung' che po iman eng' mugulelwek.

¹¹ Ameng' koit ole ami keelyegap menotik, amechamji koistaa eunegap kiptengeginik.

¹² Olooto ole ki kobutyi che yaei tengekto; kigetimda, ak ma komuuchi kong'eetyo.