TIENWOGIKAL 3 - Bukuit Ne Tilil

Saaetap toreteet eng' karon

Tyendap kalasunet ne po Daudi, ye ki mwee weeriinnyi Absalom.

¹ Ee Kamuktaindet ne Toroor, kagotesak puunikyuk ne tya! Chaang' ne tya che ng'eetyina!

² Miitei che chaang' che mwaei agobo saboondanyu, koleen, “Ma tinyei chiichi yetunet eng' Kamuktaindet.”

³ Ago inyee, ee Kamuktaindet ne Toroor, ko ii long'eet ne mi komoswek tugul eng' anee; ii teegistanyu ak ii tiindetap metinnyu.

⁴ Ariirchini Kamuktaindet ne Toroor eng' kutinnyu, ak ki wolwo eng' tulweennyi ne tiliil.

⁵ Ki alyelde eng' ng'wony ak anuuch, ki agosu kogeny, amu ki igimita Kamuktaindet ne Toroor.

⁶ Ma ywei piik tamanusyegap eliphuusyek, che kayiema kotokyagei eng' komoswek tugul.

⁷ Ng'eet, ee Kamuktaindet ne Toroor! Sarwo, ee Kamuktaindennyu! Amu ki irabaach matang'wegap puunikyuk tugul; ki iri kelegap kiptengeginik.

⁸ Po Kamuktaindet ne Toroor yetunet; ingotebee perurtang'ung' piiguk.