TIENWOGIKAL 145 - Bukuit Ne Tilil

Ooindo ak aiyebindap Kamuktaindet

¹ Alasun inyee, ee Kamuktaindennyu ak Laitoryannyu; ak alasu kaineng'ung' koigeny ak koigeny.

² Amwae peetuut age tugul ale iberuurot; ak alasu kaineng'ung' koigeny ak koigeny.

³ Oo Kamuktaindet ne Toroor, ak kanyool kilas miising'; ama isiagaksei etunatennyi.

⁴ Ilasu poisyoniguk ibinda age agoi ibinda age, ak mwaitoi poisyoniguk che po kamuktaet.

⁵ Abwaatati telunateet ne oo ne po teegistang'ung', ak ne po poisyoniguk che po kwong'eet.

⁶ Mwaitoi piik agobo kamuktaetap poisyoniguk che kiywei; ak amwaitoi ooindang'ung'.

⁷ Twegu icheek komwaei kabwaatetap myeeindong'ung' ne oo, ak tyeni icheek agobo imandang'ung'.

⁸ Kamuktaindet ne Toroor ko ne po myeeindo ak ko nyiitaat rireenet; ma sip konereechi ak tinyei rireenet ne oo.

⁹ Myee Kamuktaindet ne Toroor eng' piik tugul; ak pou rireenosyekyik che talaen poisyonikyik tugul.

¹⁰ Weegun kongoi poisyoniguk tugul, ee Kamuktaindet ne Toroor, ak iberuurin cheguuk che tiliileen.

¹¹ Ng'alaali icheek agobo toroornatetap laitornateng'ung', ak ng'alaale kimnateng'ung',

¹² koboorchi weeriigap piik poisyonikyik che po kamuktaet, ak toroornatetap etunateet ne po laitornatennyi.

¹³ Laitornateng'ung' ko laitornatet ne po koigeny; ak tebyei laitornateng'ung' eng' ibinwek tugul.

¹⁴ Tiiei Kamuktaindet ne Toroor tugul che ibutos, ak ing'eeti icheeget tugul che ing'uruuksei.

¹⁵ Igenin konyegap piik tugul; ak igoochini amitwogikwak eng' peetuut ne nyolu.

¹⁶ Ing'aanye eung'ung', ak igoochini age tugul ne sabei kiit ne machei kot kobiyo.

¹⁷ Po iman Kamuktaindet ne Toroor eng' ortinwekyik tugul, ak tala eng' poisyonikyik tugul.

¹⁸ Neegitee Kamuktaindet ne Toroor icheeget tugul che kuurei ineendet, tugul che kuurei ineendet eng' iman.

¹⁹ Isuldochin icheeget che iywei ineendet kiit ne machei icheek; kasei ineendet riirekwak, ak saru icheeget.

²⁰ Riibei Kamuktaindet ne Toroor tugul che chamei ineendet; a, o ng'emei kiptengeginik.

²¹ Ng'alaali kutinnyu agobo kalasunetap Kamuktaindet ne Toroor; ak ilasu piik tugul kainennyi ne tiliil koigeny ak koigeny.