TIENWOGIKAL 144 - Bukuit Ne Tilil

Saaet agobo saruunetap emet

¹ Iberuurot Kamuktaindet ne Toroor rwandennyu, ne ineeti eunekyuk lugeet, ak koneeti morikyuk pooryeet.

² Ineendet chamyennyu ne tala ak irimennyu, teeksennyu ne kooi ak saruunindennyu; long'ennyu ak ineendet ne amang'u; ne igoochin piikyuk kogasa iit.

³ Kamuktaindet ne Toroor, tos nee chii kot inai? Anan weeriitap chii, ne tos iit ile kiy?

⁴ Kergei chii ak kiy puch; uu peetuusyekyik merumbet ne siirtoi.

⁵ Ing'uruuch kipsengwetisyeguk, ee Kamuktaindet ne Toroor, ak ichooruge! Twa tuloonook, si koiyenso!

⁶ Iyookte kalyeleet, ak iyeste icheek; mwokte kipchaboniguk, ak inyaliil icheek.

⁷ Iyogou eung'ung' eng' parak; ityacha ak isarwo eng' peek che chaang', eng' eunegap toek;

⁸ che nyalili kutusweekwak tuguugap puch, ak eunekwak che po tai ko eunek che po lembech.

⁹ Atyenun tyendo ne leel, ee Kamuktaindet, atyenun kalasunoik eng' kibugandet ne po inoik taman.

¹⁰ Ineendet ne igoochin katerteerisyet laitorinik, ne saru Daudi kiboityondennyi.

¹¹ Ityacha eng' rotweet ne koroom, ak isarwo eng' eunegap toek, che ng'alaali kutusweekwak lembecheek, ak eunekwak che po tai ko eunek che po lembech.

¹² Ngo kergeit weeriikyok che ta ko neran ak keetiik che piitos; ak kogergeit tiibiikyok ak koigap luuita che ki kiwai ko uu che po kootap laitoryat.

¹³ Ngo ek chogenikyok che nyiitaat tuguuk tugul che konorotiin, ngo iiyo keechiirekyok eliphuusyek ak tamanusyegap eliphuusyek eng' korotinwekyok;

¹⁴ ak ngo ek eikyok che kiimen ye laisei. Ma piitu ne iboogu, ama mi ondo, amat kobiit kateiyet eng' ortinwekyok che eecheen.

¹⁵ Poiboen piik che ityin kaberuret ko uu nooto; poiboen piik che Kamuktaindennywa ko Kamuktaindet ne Toroor.