TIENWOGIKAL 109 - Bukuit Ne Tilil

Saaet agobo Yaaktaetap Mugetuut

¹ Amesiis, ee Kamuktaindet ne po kalasunennyu.

² Amu kaiseng'eng'ja kiptengekyot ak ng'aaliindet, kagong'alaalwo eng' kutit ne po lembech.

³ Koyiemena ng'aleek che po wegeet, ak koboryena puch.

⁴ Ki achame ago ki ek puunikyuk, nga uu no asaae agobo icheek.

⁵ Ak ki igeerwo ne ya eng' ne myee, ak ki igeerwo wegeet eng' chamyennyu.

⁶ Inde chiito ne ya koboi ineendet; ak ingotonone puunyoot eunnyi ne po tai.

⁷ Ingonam ineendet tengekto ye kirwookyin; ak ingowalak saaennyi koek tengekto.

⁸ Ingong'ering'itu peetuusyekyik; ak ingonam age poisyennyi.

⁹ Ingoek lagokyik che ma kotinyei kwanda, ak ingoek osotyonnyi ne ki kosiirtoe manong'otyot.

¹⁰ Ingoombenot lagokyik, kosoomsot; ak ingocheeng'ate amitwogikwak surkwen.

¹¹ Ingorebe yaagindet tuguuk tugul che tinyei; ak ingoluul toek poisyennyi.

¹² Amat kobiit chii ne riiree ineendet; amat kobiit ne riiree lagokyik che ma kotinyei kwanda.

¹³ Ingogeskei iyotennyi; ak ingobugok kainennywa eng' ibinda ne isubu.

¹⁴ Ingobwaatak tengektap kwanisyekyik eng' Kamuktaindet ne Toroor; amat kibukto tengektap kamet.

¹⁵ Ingotebee taitap Kamuktaindet ne Toroor kotugul, si kobiit koisto kabwaatennywa eng' ng'wony.

¹⁶ Amu ma ibwaat kobarta rireenet, ago kius kibananiat ne ma tinyei kiy, ak ne ilot muguleldo, si kobiit kobar.

¹⁷ Ki cham ineendet chubisyet, ak ki nyoonji; ak ki ma paibaitune kaberuret, ak kilooit eng' ineendet.

¹⁸ Ki ilaach chubisyet ko uu ngoryennyi, ak kichut oriitinnyi ko uu peek, ak kichut kawekyik ko uu mwaita.

¹⁹ Ingoek eng' ineendet ngoryeet ne tugegei, ak pireneet ne rategei kotugul.

²⁰ Niito melektap puunikyuk ne punu Kamuktaindet ne Toroor, ak ne po icheek che mwaei ne ya agobo saboondanyu.

²¹ Ago poisye inyee agobo anee, ee Kamuktaindet ne Toroor, Kiptaiyandennyu, amu kaineng'ung'; amu myee rireeneng'ung', sarwo anyun.

²² Amu aa ne nyalili, amaleli kiy, ak iguotenot muguleldanyu oriit.

²³ Ki abetite ko uu urwet ne petei: ki onota ko uu chereng'endet.

²⁴ Nyalulyotin kutung'oikyuk amu karugutetapkei; ak kagosagit poortanyu.

²⁵ Kaegu ne kirasyin eng' icheek; ye keera, kobarbar metowekwak.

²⁶ Toreto, ee Kamuktaindet ne Toroor Kamuktaindennyu; sarwo ko uu rireeneng'ung'.

²⁷ Si kobiit konai kole niito ko eung'ung'; ak konai kole inyee Kamuktaindet ne Toroor ne ki iyai.

²⁸ Ingochubis, ago iberuur inyee. Ye ng'eetyo, kolilaanso, ago paibai otwogindeng'ung'.

²⁹ Ingilaakyi teweernateet puunikyuk, ak ingotugegei icheegei teweernatennywa ko uu ngoryeet ne kiturturi.

³⁰ Aweekyini Kamuktaindet ne Toroor kongoi ne oo eng' kutinnyu; alasu ineendet eng' tuiyet.

³¹ Amu tonone eutap tai ne po ineendet ne panani, si kosar ineendet eng' icheek che irwookyin saboondanyi.