TIENWOGIKAL 105 - Bukuit Ne Tilil

Kamuktaindet ak Piikyik

¹ Oweekyi kongoi Kamuktaindet ne Toroor, oguur kainennyi; ongonaak poisyonikyik eng' piik.

² Otyenji, otyenji kalasunoik; ong'alaale poisyonikyik che kikwong'ee.

³ Olasunegei kainennyi ne tiliil; ingoboiboitu mugulelwegap icheek che cheeng'ei Kamuktaindet ne Toroor.

⁴ Ocheeng' Kamuktaindet ne Toroor ak kimnateennyi; ocheeng' togeennyi kotugul.

⁵ Obwaat poisyonikyik che kikwong'ee che ki koyai, kwang'utikyik, ak kirwoogutigap kutinnyi,

⁶ ee okweek, kesweegap Abraham kiboityondennyi, okweek lagogap Jakobo, chechiik che kigelewen.

⁷ Ineendet ko Kamuktaindet ne Toroor, Kamuktaindennyo, miitei kirwoogutikyik ng'wony komugul.

⁸ Ibwaati kayomisennyi koigeny, ng'olyoot ne ki ng'at agobo ibinwek eliphuut.

⁹ Ne ki yai kobooto Abraham, ak kayasyoet ne ki iyasyechi Isak,

¹⁰ ak ki igimityi Jakobo nooto koek ng'atuutyet, ki igimityi Israel koek kayomiset ne po koigeny,

¹¹ koleenji, “Agoonin emetap Kanaan, koek kebebertap poroteng'ung'.”

¹² Ye kita ko ng'ering' pichooto, ki ng'ering' miising' ak ki toek icheek eng' olooto.

¹³ Ki pendat kobunoot pororyet age agoi pororyet age; ki pun laitornatet age koba ye mi piik alak.

¹⁴ Ki ma chamji chii koyachi icheek ne ya; ee, ki kergong' laitorinik amu icheek,

¹⁵ kole, “Amat otwaa chechuuk che iilaatin, amoyachi ne ya maotikyuk.”

¹⁶ Ak ki kuur rubeet konyonji emet, ak ki til amitwogik tugul kong'ering'itu.

¹⁷ Ki iyookto chii kondoe icheek; ki kialda Joseph koek otwogin.

¹⁸ Ki igoochi ng'wanindo keelyekyik eng' mugurek, ki kinde ineendet ye mi karnook;

¹⁹ agoi peetuut ne ki isulda ng'olyoondennyi, ki tyem `ng'olyootap Kamuktaindet ne Toroor ineendet.

²⁰ Ki iyookto laitoryat kityaach ineendet; agot pounindetap piik ko ki unda kwo.

²¹ Ki inde ineendet koek kiptaiyatap koonnyi, ak pounindetap tuguukyik tugul;

²² si korat pounikyik ko uu ye machei, ak koneet poisyekyik utaatyet.

²³ Ki nyo Israel agine Misiri; ak ki uchi `Jakobo emetap Ham.

²⁴ Ak ki tes piikyik miising', ak kogimit icheek kosiir puunikwak.

²⁵ Ki wal mugulelwekwak kowech piikyik, si kong'aal kiboitiinikyik.

²⁶ Ki iyookto Musa kiboityondennyi, ak Aron ne kiga kolewen.

²⁷ Ki inde kwenunnywa kaboorunoikyik, ak kwang'utikyik eng' emetap Ham.

²⁸ Ki iyookto mesundeito, ak ki igoochi koimenit; ak ki ma ingelelji `icheek ng'aleekyik.

²⁹ Ki wal peekwak koek korotiik, ak kobar njireenikwak.

³⁰ Ki yom mororochik emennywa, eng' kooriigap laitorinikwak.

³¹ Ki twek, ak ki pwa kalyang'ik ng'iisyat, ak isireek eng' kiwotosyekwak tugul.

³² Ki igoochi koik ne kata ropta, ak maat ne liplibeni eng' emennywa.

³³ Ki pir keetiikwak ak icheek che po sabibuk ak mogoonikwak; ak ki iri keetiigap kiwotosyekwak.

³⁴ Ki twek, ak ki nyo chereng'endet, ak tinapchet, che ma iitoksei;

³⁵ ak ki am sogoot age tugul ne po emennywa, ak ki am logoegap mbareenikwak.

³⁶ Ki par kiboretook tugul eng' emennywa, taunetap kimnateennywa.

³⁷ Ak ki imong' icheek koibei fedha ak thahabu, ak ki ma komi chii ne nyalulat agot agenge eng' pororyosyekyik.

³⁸ Ki paibait Misiri ye kingo pa; amu kiga konyoor kaiyweisyet amu icheek.

³⁹ Ki iito pooldet koek ne tuge; ak maat si kogoochi pichooto lapkeiyet kemoi.

⁴⁰ Ki soom ak ki igoochi toriitik che taok, ak kibae icheek amitwogigap kipsengwet kobiyo.

⁴¹ Ki yaat rwandet, ak kisururgei peek; ki root eng' komoswek che yamyotiin ko uu aineet.

⁴² Amu ki ibwaat ng'olyoondennyi ne tiliil, ak Abraham kiboityondennyi.

⁴³ Ak ki imut piikyik komong' eng' poiboiyet, ak chechiik che kigelewen kotyenonu.

⁴⁴ Ak ki igoochi icheek emotinwegap pororyosyek, ak ki nam poisyonigap piik kobunji;

⁴⁵ si kobiit koriip kaneetisyosyekyik, ak koosup ng'atuutikyik. Olasu Kamuktaindet ne Toroor.