TAUNET 6 - Bukuit Ne Tilil

Yaityetap Kimugulmet

¹ Ye kingo toi kotesagis piik eng' ng'wony ak kosich tiibiik,

² kogeer anyun `weeriigap Kamuktaindet tiibiichooto po piik kole korooron, komutyigei tugul che ki lewen koek kwonyiikwak.

³ Ki mwa Kamuktaindet ne Toroor kole, “Ma tebee `Kabuusennyu chii agoi amu ineendet ko poorto. Ko uu nooto anyun, ko egu peetuusyekyik kenyiisyek pogol ak tiptem.”

⁴ Ki miitei Piik che eecheen che uu chemosin ng'wony eng' peetuusyechooto, ye kingo tuiyogei weeriigap Kamuktaindet ak tiibiigap piik ak kosikyi icheek lagok. Lagochooto anyun ko ki ek piik che ki nyigoonen ko po keny, ak ki murenik che ki taagunotiin.

⁵ Ki keer Kamuktaindet ne Toroor kole, oo miising' tengektap kimugulmet eng' ng'wony, ak kabwaatutik tugul che po muguleldanyi ko tengekto kityo peetuut age tugul.

⁶ Ki riir let Kamuktaindet ne Toroor agobo chii ne ki yai eng' ng'wony, ak ki kas ng'wanindo eng' muguleldanyi.

⁷ Ak ki mwa Kamuktaindet ne Toroor kole, “Abare awong'u piik che ki ayai eng' ng'wony komugul; kong'etee chii, kiyagiik, che ichuutegei ng'wony agoi toriit alak tugul che po parak; ki mata myee ayai icheek.”

⁸ Ago ki chamak Noah eng' taitap Kamuktaindet ne Toroor.

⁹ Chu isubi ko ooreetap kap Noah. Ki chiito Noah ne po imanda ak kogesunotkei eng' ibindanyi. Kibendoti ineendet ak Kamuktaindet.

¹⁰ Ki sich `Noah weeriik somok; Shem, Ham ak Japhet.

¹¹ Ak kiga kong'emak emet eng' taitap Kamuktaindet ak ki oo puunyoondit eng' ng'wony.

¹² Ki iro Kamuktaindet ng'wony kole ki kong'emak, amu kiga kowelel piik tugul atebosyekwak eng' ng'wony.

¹³ Ak ki leenji `Kamuktaindet Noah, “Kaabegechi agees piik tugul, amu oo puunyoondit ak ng'emisyet eng' ng'wony amu icheek. Ko uu nooto anyun, ang'eme icheek kobooto ng'wony komugul.

¹⁴ Yachigei moinget ne po keetiigap taragonik; ak ipchei kooriik che mengeechen eng' moinget ak imale manget oriit ak saang'.

¹⁵ Yai moinget ko uu ni: koindonyi ko mitainik pogol ak sosom ak sogool ak tebeesindonyi ko mitainik tiptem ak muut, ak toloitanyi ko mitainik taman ak muut.

¹⁶ Yai ole punu lapkeiyet eng' moinget, ak iyai koek tonon kakwautyet agenge: ak inde kurgennyi tabandap moinget ak ipcheune somok moinget, ne po ng'wony, ne po kween ak ne po parak.

¹⁷ Aipchini ng'wony maraneet ne oo si ang'eme tugul che saptos, age tugul ne tinyei kabuusetap saboondo eng' ng'wony. Asi kobek tugul che mi ng'wony.

¹⁸ Ka agimiit kayomisennyu kobooten, ak inyoo inyee moinget ak weeriiguk ak chebyoseng'ung' ak kwonyiigap weeriiguk.

¹⁹ Ketu alak eng' tuguuk tugul che saptos kobwa moinget oriit, aeng' aeng' che po ooreet age tugul, si iriip kosapcho kobooten, lewen kirgit ak subeen.

²⁰ Ingobwa kora toriitik ko uu kergeindonywa, kiyagiik ko uu kergeindonywa ak tyong'ik alak tugul che ichuuteegei ng'wony ko uu kergeindonywa, kobwonjin aeng' aeng' che po ooreet age tugul si iriip kosapcho.

²¹ Iyum anyun ak iipchigei amitwogik alak tugul che kiamei, si igonor koek amitwogiguk ak chechwaak.”

²² Ki yai anyun Noah ko uu nooto; ki yai kiy tugul ko uu ye ki ng'at `Kamuktaindet ineendet.