TAUNET 50 - Bukuit Ne Tilil

¹ Ki ing'uruuk anyun Joseph kotokyigei togeetap kwandanyi, koriirchi ak kong'utut.

² Ki ng'at `Joseph otwogikyik chepkerichinik konde kerichek muustap kwandanyi. Ki inde anyun chepkerichinichooto kerichek muustap Israel.

³ Ki kinde anyun kerichek ak ki igeskei peetuusyek artamu agobo ineendet, amu tenitu chooto peetuusyek che ki cham kindoe piik kerichek. Ak ki riirchi Misiriik ineendet peetuusyek tamanwogik tisap.

⁴ Ye kingo kagobata peetuusyek che po riirek, kong'alaalji `Joseph piigap kootap Pharaoh, koleenji, “Ngo ki anyooru chameet eng' taing'wong', ko kaigai omwachi Pharaoh kogas komyee eng' itiikyik, oleenji,

⁵ Kimakwo abba ayasyo, ak ki le, ‘Keero, kamei; tupcho kererinnyu ne ki achopchigei eng' emetap Kanaan.’ Ara anyun, kaigai igoono atogosta awo atup abba, si aweigei.”

⁶ Ki leenji Pharaoh, “Ui togoste, itup kwandang'ung', ko uu ye kimagun inee iyasye.”

⁷ Ki togosta anyun Joseph kwo kotup kwandanyi. Ki togosta kobooto ineendet otwogik tugul che po Pharaoh, ak poisyegap koonnyi, poisyek tugul che po emetap Misiri,

⁸ ak kootap Joseph komugul, tupchosyekyik ak piigap kootap kwandanyi. Kobatee lagokwak, keechiirekwak ak tuuga che ki ng'et eng' emetap Goshen.

⁹ Ki pa kobooto ineendet kariisyek ak piik che ketei paraisisyek. Ki piik che chaang' kot.

¹⁰ Ye kingo it rwanyut ne kiboorsee ne po Atad, ne miitei Jordan pitoniin, ko ki iteiyo eng' olooto eng' riirek che ng'woneen che pichiien; ak ki ng'at keriirchi kwandanyi peetuusyek tisap.

¹¹ Ye kingo keer che menyei emonooto, Kanaanik, riirek eng' rwanyutap Atad, kole, “Eechen riirechu eng' Misiriik.” Ki kiguure anyun yooto Abel-Misiri, ne miitei Jordan pitoniin.

¹² Ki yachi anyun weeriikyik ko uu ye kiga ng'at ineendet icheek.

¹³ Kisut poortannyi weeriikyik kwo emetap Kanaan, ak kitupchi kebeneet ne mi mbareetap Makpela, ne ki al Abraham kobooto mbareet eng' Epron Hitindet ne tokyingei Mamre, kobunji ineendet, si koek ye mi kereeriisyek.

¹⁴ Kingo kagotup Joseph kwandanyi, koweektagei kwo Misiri kobooto tupchosyekyik, ak tugul che kiga kotogosta kobooto ineendet, ye kibendi kotubei kwandanyi.

¹⁵ Ye kingo keer weeriik che tupcho ak Joseph kole kagome kwandanywa, kole, “Abeere, imuuchi kowechech Joseph ak kogeerwech yaityet tugul ne kiga kiyachi ineendet.”

¹⁶ Amu nooto anyun koyookto `icheek chiito kwo kap Joseph, koleenji, “Ki ng'at kwandang'ung' ye ki tomo kome, kole,

¹⁷ ‘Omwachi Joseph oleenji: Kaigai inyochigaat tupchosyeguk amu pistoennywa ak tengektonywa, amu kiyaun yaityet.’ Ara anyun, kisaain keele nyoiywech kaat acheek otwogigap Kamuktaindet ne po kwandang'ung'.” Ak ki riir Joseph ye ki ng'alaaljin `icheeget ineendet.

¹⁸ Ki pa anyun weerchooto tupcho ak icheek kobutyi ng'wony eng' tainnyi, ak koleenji, “Keero, acheek ko ki otwogiguk.”

¹⁹ Ago ki leenji Joseph, “Amoiywei, tos ageeregei Kamuktaindet?

²⁰ Okweek, ko ki oleen ki oyaiywo ne ya, ago ki yai Kamuktaindet komyeeit, si kosulda ko uu rani, si kesar piik che chaang'.

²¹ Amata oiywei anyun nguno. Abook kobooto lagokwok.” Ak ki igaigai icheek ak kong'alaalji eng' talasyet.

Meetap Joseph

²² Ki meny anyun Joseph Misiri, ineendet ak piigap kootap kwandanyi. Ki tar Joseph kenyiisyek pogol ak taman.

²³ Ki keer Joseph lagogap Ephraim agoi ibinda ne po somok, ak ki kigu lagogap Makir weeriitap Manasseh eng' kutung'oigap Joseph.

²⁴ Ak ki leenji Joseph tupchosyekyik, “Neegit ame; ago rutochinok iman Kamuktaindet, ak komaandak otogoste eng' emoni obe emet ne ki iyasyechi Abraham, Isak ak Jakobo.”

²⁵ Ak kimach `Joseph piigap Israel koyasyo kole, “Rutochinok iman Kamuktaindet, ak oip kawekyuk kotogosta koba eng' oli.”

²⁶ Kime anyun Joseph, ye kiga kotar kenyiisyek pogol ak taman. Ki kiinde kerichek muustonyi ak kinde moinget eng' olooto po Misiri.