TAUNET 5 - Bukuit Ne Tilil

Iyoteetap Adam agoi Noah

¹ Ni ko sireet ne po teteetap iyoteetap kap Adam. Eng' peetuut ne ki toi Kamuktaindet koyai chiito, ko ki yai icheek eng' kergeindonyi.

² Ki yai icheek, muren ak tye ak koberuur, yeityo kotoochi icheek kainet koguure Adam.

³ Ki tar Adam kenyiisyek pogol ak sosom kosich weeriit eng' kergeindonyi ak eng' itoondonyi, ak kiguure kainennyi Seth.

⁴ Ye kingo kagosich `Adam Seth, kotar kenyiisyek pogol sisiit ak ki sich weeriik alak ak tiibiik.

⁵ Ki ilil Adam kotinyei kenyiisyek pogol sogool ak sosom.

⁶ Ye kingo tinyei Seth kenyiisyek pogol ak muut, kosich Enosh.

⁷ Ki tar Seth kenyiisyek pogol sisiit ak tisap ye kingo kagosich Enosh, ak ki sich weeriik alak ak tiibiik.

⁸ Eng' tugul, ko ki tar Seth kenyiisyek pogol sogool ak taman ak aeng' si kolili.

⁹ Kingo po Enosh kenyiisyek tamanwogik sogool, kosich Kenan.

¹⁰ Ki tar Enosh kenyiisyek pogol sisiit ak taman ak muut ye kingo kagosich Kenan, ak ki sich weeriik alak ak tiibiik.

¹¹ Ki ilil Enosh ko po kenyiisyek pogol sogool ak muut.

¹² Ki po Kenan kenyiisyek tamanwogik tisap kosichei Mahalalel.

¹³ Komeng'iis Kenan kenyiisyek pogol sisiit ak artam ye kingo kagosich Mahalalel ak kosich weeriik alak ak tiibiik.

¹⁴ Ki ilil Kenan ko po kenyiisyek pogol sogool ak taman.

¹⁵ Kosich `Mahalalel Jared kotinyei kenyiisyek tamanwogik lo ak muut.

¹⁶ Ak ki tebi Mahalalel kenyiisyek pogol sisiit ak sosom ye kingo kagosich Jared, ak ki sich weeriik alak ak tiibiik.

¹⁷ Ki po Mahalalel kenyiisyek pogol sisiit ak tamanwogik sogool ak muut ye kingo lili.

¹⁸ Kingo po Jared kenyiisyek pogol ak tamanwogik lo ak aeng' kosich Enok.

¹⁹ Eng' kenyiisyek pogol sisiit ye kingo kagosich `Jared Enok, ko ki sich kora weeriik alak ak tiibiik.

²⁰ Ki ilil Jared ko po kenyiisyek pogol sogool ak tamanwogik lo ak aeng'.

²¹ Kingo po Enok kenyiisyek tamanwogik lo ak muut kosich Methuselah.

²² Ki pendat Enok ak Kamuktaindet eng' kenyiisyek pogol somok ye kingo kagosich Methuselah ak ki sich weeriik alak ak tiibiik.

²³ Peetuusyek tugul che po sabeetap Enok ko ki kenyiisyek pogol somok ak tamanwogik lo ak muut.

²⁴ Kibendoti Enok ak Kamuktaindet; ak ki mata kiro amu ki imut ineendet `Kamuktaindet!

²⁵ Kingo tinyei Methuselah kenyiisyek pogol ak tamanwogik sisiit ak tisap kosich Lamek.

²⁶ Ki meng'iis Methuselah kenyiisyek pogol tisap ak tamanwogik sisiit ak aeng' ye kingo kagosich Lamek ak ki sich weeriik alak ak tiibiik.

²⁷ Ki ilili Methuselah ko po kenyiisyek pogol sogool ak tamanwogik lo ak sogool.

²⁸ Ki tar Lamek kenyiisyek pogol ak tamanwogik sisiit ak aeng', kosich weeriit.

²⁹ Kiguure kainennyi Noah, kole, “Ineendet ne igoigoech eng' nyalilwogik che po poisyonikyok che uueen eng' ng'wony ne ki chup Kamuktaindet ne Toroor.”

³⁰ Ki meng'iis Lamek kenyiisyek pogol muut ak tamanwogik sogool ak muut ye kingo kagosich Noah, ak ki sich weeriik alak ak tiibiik.

³¹ Ki po Lamek kenyiisyek pogol tisap ak tamanwogik tisap ak tisap ye kingo lili.

³² Ak ye kingo tinyei Noah kenyiisyek pogol muut, kosich Shem, Ham ak Japhet.