TAUNET 47 - Bukuit Ne Tilil

Komi Jakobo ak weeriikyik taitap Pharaoh

¹ Ki wo anyun Joseph komwachi Pharaoh, koleenji, “Kagoit abba ak weeriik che kitupche, ak keechiirekwak, ak tuukwak, ak tuguukwak tugul che tinyei kobunu emetap Kanaan, miitei nguno emetap Goshen.”

² Ki imut weeriik muut eng' weeriik che tupcho, ak kobarta eng' taitap Pharaoh.

³ ki teebee `Pharaoh weeriik che tupcho ak Joseph koleenji, “Nee poisyeng'wong'?” Ak ki wolji Pharaoh, koleenji, “Acheek otwogiguk ko ki riibiikap kiyagiik, ko uu ye ki uu kwanisyekyok.”

⁴ Ki leenji `icheek Pharaoh, “Kageuchi emoni ko ki toek, amu ma mi ole kiyage akwotisyegap otwogiguk; amu ng'waan rubeet eng' emetap Kanaan. Ara anyun, kaigai chamwech acheek otwogiguk kemeny emetap Goshen.”

⁵ Ak ki ng'alaalji `Pharaoh Joseph, koleenji, “Kagoit oldang'ung' kwandang'ung' ak weeriik che otupche,

⁶ mi taing'ung' emoniito po Misiri. Igoochi kwandang'ung' ak weeriik che otupche komeny emet ole karaaran miising' kosiir tugul, ingomeny anyun emetap Goshen. Ak ngot ingen piik eng' icheek che ng'oomen, igoochi koriip tuukyuk.”

⁷ Ki imut anyun `Joseph kwandanyi kwo taitap Pharaoh, ak ki iberuur `Jakobo Pharaoh.

⁸ ki teebee `Pharaoh Jakobo, koleenji, “Ata kenyisyeguk?”

⁹ Ak ki wolji `Jakobo Pharaoh, koleenji, “Kenyiisyekyuk che ki atar eng' rutoitanyu ko pogol ak sosom. Ng'ering' ak ko yaacheen kenyiisyekyuk che ki atar, ak ma iit kenyiisyekyuk che ki it kenyiisyegap kwanisyekyuk eng' rutoitonywa.”

¹⁰ Ki iberuur `Jakobo Pharaoh, yeityo kwo eng' ole ki mi ineendet.

¹¹ Ki yai anyun Joseph komeng'iis kwandanyi ak weeriik che tupcho, ki igoochi icheek ole punjin eng' emetap Misiri, ole karaaran kosiir tugul eng' emonooto, eng' emetap Rameses, ko uu ye kiga ng'at Pharaoh.

¹² Kibai `Joseph kwandanyi, tupchosyekyik ak piik tugul che po kootap kwandanyi, eng' amitwogik, ko uu ye ki tee lagokwak.

Kandoinatetap Joseph eng' peetuusyegap rubeet

¹³ Ki ma kota komi amitwogik eng' emet komugul, amu king'wanit miising' rubeet, ak kinyalul emetap Misiri ak emetap Kanaan amu rubanooto.

¹⁴ Ki iyum Joseph robiinik tugul che ki piit eng' emetap Misiri ak emetap Kanaan che ki koip piik koale peek, ak ki ip fedhaisyechooto kobwa kootap Pharaoh.

¹⁵ Ye kingo keskei robiinik che po emetap Misiri, ak che po emetap Kanaan, kobwonji Misiriik tugul Joseph, ak koleenji, “Koonech amitwogik. Amu nee si kebegu eng' taing'ung'? Amu kogogeskei robiinik.”

¹⁶ Ak ki leenji Joseph, “Ogoonu tuukwok, si agoonok amitwogik che ogeere tuukwok, ngot ko kogogeskei robiinik.”

¹⁷ Kigetyi anyun `icheek Joseph tuukwak; ak ki igoochi Joseph amitwogik che ki ale paraisisyek, akwotisyek, tuuga ak sigiroik. Kibae kenyinooto amitwogik che ki ale tuukwak tugul.

¹⁸ Ye kingo keskei kenyinooto, kobwonji ineendet eng' kenyiit ne po aeng', ak koleenji, “Ma kimuuchi keung'e kiptaiyandennyo, keele kogogeskei silingisyekyok tugul, ak ki kobunji tuukyok kiptaiyandennyo. Ma komi kiy ne ng'etunot neta keipchini kiptaiyandennyo, kobatee poorwekyok kityo, ak koratinwekyok.

¹⁹ Amu nee anyun si kebegu eng' taing'ung', acheek ak emennyo? Alech acheek kobooto emennyo, si kenyooru amitwogik, ak kebunji acheek Pharaoh kobooto emennyo keegu otwogikyik. Koonech kesweek, si kesapchee, si ma kibegu, si ma kuber emet.”

²⁰ Ki alji anyun `Joseph Pharaoh emet komugul ne po Misiri. Ki alda chii tugul eng' Misiriik mbareennyi, amu kieetyi rubeet icheek, ak ki punji anyun Pharaoh emet.

²¹ Ki yai anyun `ineendet piik koek otwogikyik kong'etee tabanda age agoi tabanda age ne po Misiri.

²² Kobatee emetap tisiik ne ma al ineendet, amu ki cham konyooru tisiik amitwogik chechwaak eng' Pharaoh, si koamei kebebertanywa ne ki igoochin Pharaoh. Ki ma alda anyun emennywa amu nooto.

²³ Ki leenji `Joseph piik anyun, “Ogeero, kaalak rani, okweek ak emeng'wong' obunji Pharaoh. Irochu kesweek, si ogoole mbareenik.

²⁴ Si ye ogesisye ogoochi Pharaoh kebeberta ne po muut. Ak kobunjook kebeberwek ang'wanu: si koek kesweegap mbareenik ak koek amitwogikwok, che po piigap kooriikwok ak amitwogik che po lagokwok.”

²⁵ Ki le icheek, “Kaisaru saboonwekyok. Myee kenyooru chameet eng' taitap kiptaiyandennyo, ak keegu otwogigap Pharaoh.”

²⁶ Ki yai anyun Joseph ng'olyoondonooto koek ng'atuutyet eng' emetap Misiri ne mi agoi rani, keele kobunji Pharaoh kebeberta ne po muut, kobatee emetap tisiik ineegei ne ma punjin Pharaoh.

²⁷ Ki meny anyun `Israel Goshen, eng' emetap Misiri, Ak ki ek mogore eng' olooto, ak ki sigiis ak kotesagis miising'.

²⁸ Ki meny Jakobo emetap Misiri kenyiisyek taman ak tisap, ak kenyiisyek tugul che ki tar Jakobo kosabei ko ki pogol ak artam ak tisap.

²⁹ Ye kingo riik anyun peetuusyek che po kalilotetap Israel, koguur anyun weeriinnyi Joseph ak koleenji, “Ngo kaanyooru chameet eng' taing'ung', inde anyun eung'ung' kubestanyu, iyaiywo ne myee, ak ne po iman. Kaigai ametupcha Misiri,

³⁰ ago ye aru kobooto kwanisyekyuk, isuta amanda eng' Misiri, ak itupcha kereeriisyekwak.” Ak ki le, “Ayae ko uu ye kaimwa.”

³¹ Ak ki le, “Iyosyeiwo.” Ak ki iyasyechi. Yeityo kong'uruuk Israel eng' itogunnyi meto.