TAUNET 44 - Bukuit Ne Tilil

Kotyemei `Joseph tupchosyekyik

¹ Ki ng'at anyun chiito ne kitononjin koonnyi, koleenji, “Inyiit amitwogik lolotinwegap pichu, ko uu che imuuch koip, ak inde chepkondogap chii tugul kutitap lolennyi.

² Yeityo inde kigombennyu, nooto po fedha, eng' kutitap loletap toweet, kobooto silingisyekyik che po peek.” Ak ki yai ko uu ng'olyoot ne ki kamwa Joseph.

³ Ye kingo eech kota ko karon, kounda pichooto koba ak sigirokwak.

⁴ Ye kingo kagomanda eng' nganaseet, ye kitom kolooegitu, koleenji `Joseph chiito ne kitononjin koonnyi, “Ng'eet, isup pichooto, ye inyooru ileenji, ‘Amu nee si ogeere yaityet ne myee?

⁵ Tos ma kigombani ne eeise kiptaiyandennyu, ak kong'orse? Koyai ne leluut ngo yai ko uu ni.’ ”

⁶ Ye kingo nyoor anyun icheek, komwachi ng'aleechooto.

⁷ Ki leenji icheek, “Amu nee si komwa kiptaiyandennyu ng'aleek che uu chooto? Ingolooit eng' otwogiguk si ma yai kiy ne uu nooto!

⁸ Ogeero, robiinik, che ki kinyoorchi kutusweegap lolotinwekyok, kogiweekwok kogeny eng' emetap Kanaan. Kimuktoi ano anyun kechoore kootap kiptaindeng'ung' fedha anan ko thahabu?

⁹ Ingome age tugul eng' acheek otwogiguk ne kenyoorchin kioto, ak keegu acheek otwogigap kiptaiyandennyo.”

¹⁰ Ak ki le, “Ingotebi ko uu ng'aleeguk. Egu ineendet ne kenyoorchin kioto otwogindennyu, ak ma ki ityinok okweek yaityo.”

¹¹ Ki itu chii tugul lolennyi kochokyi, ak kotyach chii tugul nenyi.

¹² Ak ki cheeng', kotaune ne oo, agoi kogesune ne ming'in. Ki kinyoorchi kigombanooto loletap Benjamin.

¹³ Kigereer anyun ngoroikwak, ak kiratyi chii tugul tuguukyik sigiryennyi ak koweektagei koba nganaseet.

¹⁴ Ki it anyun Judah ak tupchosyekyik kootap Joseph amu kitom kwo ui, ak ki ibutyi icheek ng'wony eng' tainnyi.

¹⁵ Ki leenji `Joseph icheek, “Nee ni koyai? Tos mongen ole imuuchi kong'orso chiito ne uu anee?”

¹⁶ Ak ki le Judah, “Tos kimwaun nee anyun, kiptaiyandennyu? Ki ng'alaali keleen nee? Anan tos ki ityindoitech ano imanda? Kagonai Kamuktaindet tengektap otwogiguk, ara kimi yu anyun acheeget, ki otwogigap kiptaiyandennyo, ak ineendet ne kaginyoorchi kigombet agine.”

¹⁷ Ago ki le, “Ingolooit eng' anee ama yai ko uu nooto! Egu otwogindennyu ineendet ne kaginyoorchi kigombet, ago okweek, ko myee obe eng' kaalyeet kapkwandang'wong'.”

¹⁸ Yeityo koriikyi anyun `Judah Joseph ak koleenji, “Kaigai kiptaiyandennyu, asoomin ale, chamwo anee otwogindeng'ung' amwaun ng'olyoo, amenereekyo anee, otwogindeng'ung', amu i uu aginye Pharaoh.

¹⁹ Ki iteebenech acheek otwogiguk, kiptaiyandennyu, ile, ‘Otinye kwandang'wong', ak komi weeriit age ne otupche?’

²⁰ Ak ki kimwaun inyee, kiptaiyandennyo, keleenjin, ‘Ki tinyei abba, poiyot ne oos, ak kotinyei lakweet ne po osindanyi, neta koming'in. Ki kome ng'eetap kamet, ak mi nooto ineegei ne po kamennywa, ak kochamei `kwandanyi ineendet.’

²¹ Ak ki ileenjech acheek otwogiguk, ‘Omutwaa, kochoorgei ole ami, si kobiit ageer ineendet eng' konyekyuk.’

²² Ki kimwaun inyee, kiptaiyandennyo, keele, ‘Ma imuuchi koobeesyo weerooto ak kwandanyi, amu ngot kometo ineendet kwandanyi, ko tos me kwandanyi.’

²³ Ak ki ileenjech acheek otwogiguk, ‘Ngot ko mobwa ochooruge kobooto weeriit ne otupche ne ming'in ko momuuchi ogeera togoch kogeny.’

²⁴ Ye ki ngeit anyun kapotwogindeng'ung' kwandanyu, kemwachi ineendet ng'aleeguk.

²⁵ Ak kileenjech abba, ‘Oba kogeny oalwech amitwogik tutigin,’

²⁶ ki kileenji, ‘Ma kimuuchi kechoortegei, ago ngo mi tupchennyo ne ming'in kobootech kechoortegei anyun keebe, amu ma kimuuchi kegeer chiichooto togoch kobatee kemi ak tupchennyo ne ming'in.’

²⁷ Ak kileenjech otwogindeng'ung', kwandanyo, ‘Ongen ole kisikwo kwondonyu weeriik aeng';

²⁸ ak kibetena age, ak ki ale, Angen komyee ale kigetonaton, ak kobooch yooto, ko mata tuun ageer.

²⁹ Ngot omutena niito agine, ak konyoor kiy ne ya, ko kogoono ariirat agoi tuun amei.’

³⁰ Nooto anyun, ye ait kapotwogindeng'ung' abba, ama mi weeri kobootech, amu ki namgei saboondanyi ak saboondap weeriito,

³¹ komeei anyun abba ye keer kole ma mi lakweet, ak kigoochini `acheek otwogiguk abba, otwogindeng'ung', koriirat agoi tuun kome.

³² Amu kibunjo anee otwogindeng'ung' lakwaniito, atononjinechi abba, aleenji, ‘Ngot koma mutuun ineendet, ko kabunjo chalwogoto peetuusyek tugul eng' taitap abba.’

³³ Eng' nooto anyun, asaain ale chamwo atebi aek otwogindeng'ung', inyee kiptaiyandennyu, ageeregei weeri. Ago ingwo weeri kotogosta kobooto tupchosyekyik.

³⁴ Amu amuktoi ano anyun awo atogosta ye mi abba, ama kimi ak lakweet? Si ma keer yaityet ne tuun nyooru abba.”