TAUNET 42 - Bukuit Ne Tilil

Kobendi tupchosyegap Joseph Misiri

¹ Ye kingo kas anyun Jakobo kole miitei peek Misiri, koleenji `ineendet weeriikyik, “Amu nee si ogeeregei kityo?”

² Ak ki leenji, “Koagas keele miitei peek Misiri. Ochoortegei oalwech peek eng' oliindo, si kobiit kesapchee, si ma kibegu.”

³ Ki choortagei anyun weeriik tamanu che tupcho ak Joseph koba Misiri, koal peek.

⁴ Ago ki ma iyookto `Jakobo Benjamin ng'eetap kametap Joseph, kobooto tupchosyekyik, amu ki le, si ma nyoor kiy ne ya.

⁵ Ki pwa anyun weeriigap Israel kobooto che kibwanei koalisyei, amu ki miitei rubeet emetap Kanaan.

⁶ Ki pounindet Joseph ne po emet, ak ki ineendet ne ki aldochin peek piik tugul che po emet. Ki pwa anyun tupchosyegap Joseph, ak kong'uruuk eng' tainnyi kotokyi metowekwak ng'wony.

⁷ Ak ki keer `Joseph tupchosyekyik ak konyit, ago ki yaigei koigei chii ne ma ingen icheeget, ak kong'alaalji icheeget eng' koroomnateet. Ki teebe koleenji, “Obunu ano?” Ak ki wolji koleenji, “Ki punu emetap Kanaan, kibwane keale amitwogik.”

⁸ Nganda ki nai `Joseph tupchosyekyik, ko ki ma nai `icheek ineendet.

⁹ Ki ibwaat kogeny Joseph karwotitaosyek che kiga korwotyi agobo icheek, ak ki leenji, “Oo segeik, kobwa ogeer nyeraatyetap emet.”

¹⁰ Ki leenji `icheek ineendet, “Achicha, kiptaiyandennyu, ago kagibwane acheek otwogiguk keale amitwogik.

¹¹ Ki weeriigap chiito agenge acheek tugul, ki piik che po iman, ma kisegeik acheek otwogiguk.”

¹² Ago ki leenji icheek, “Achicha, ago kobwa ogeer nyeraatyetap emoni.”

¹³ Ak ki leenji, “Kitupche acheek otwogiguk ko ki taman ak aeng' ak ko weeriigap chiito agenge ne po Kanaan. Keero, miitei ne ming'in eng' peetuuni kobooto kwandanyo, ak ki kobetito agenge.”

¹⁴ Ago ki leenji `Joseph icheek, “Nooto anyun ne kamwaiwok aleenjok, oo segeik.

¹⁵ Kimuuchi ketyemenak ng'olyoondoni: ko uu ye sabei Pharaoh, ko momuuchi obe eng' oli, ngo ma nyo yu ng'eetap komet ne ming'in.

¹⁶ Oyookte age eng' okweek, komut ng'eetap komet, ak keratak kot kenai ng'aleekwok ngo mi imanit eng' okweek. Ngo ma uu nooto, ko ko uu ye sabei Pharaoh, ko kaagaa oo segeik.”

¹⁷ Ak kiger tugul kip agenge peetuusyek somok.

¹⁸ Eng' peetuutap somok koleenji `Joseph icheek, “Oyai ko uu ni si osapche, amu aiywei Kamuktaindet:

¹⁹ ngo oo piigap iman, kerati agenge eng' okweek, eng' koot ne kogigerchok. Si obe okweek, oip amitwogik amu rubeet ne mi kooriikwok.

²⁰ Ak omutwaa ng'eetap komet ne ming'in; si kotook ng'aleekwok ngo po iman, si mobegu.” Ak ki yai ko uu nooto.

²¹ Ki ng'alaaljigei icheegei kole, “Kagonamech kirwooget iman agobo tupchennyo, amu ki kigeer nyalildap muguleldanyi, ye ki igaigaech, ak ki ma kicham kegasyi; kanyonjech anyun nyalili amu nooto.”

²² Ak ki wolji Reuben, koleenji, “Ki ma amwaiwok, aleenjok, amoyachi kiy ne ya lakweet? Ago ki ma ocham ogas. Ogeer anyuno, kiyaachei korotiikyik.”

²³ Ki ma nai kole kasei Joseph ng'aleekwak, amu ki mi weegindet ne ki iweechi ng'aleekyik.

²⁴ Ki weigei kotuktoochi patai, ak koriir; yeityo koweleljigei icheeget kogeny kong'alaalji. Ak ki inem Simion eng' kwenunnywa, korat ineendet eng' tainnywa.

²⁵ Ki ng'at Joseph anyun kinyiit lolotinwekwak peek, ak keeweekyi chii tugul silingisyekyik kinde kinnyi, ak kogoochi amitwogik che po ooreet. Ak ki kiyachi ko uu nooto.

²⁶ Ki ratyi peechooto chwaget sigirokwak, ak koba.

²⁷ Ago ye kingo tyach age lolennyi eng' kootap toek, kole kogoochi sigiryennyi amitwogik che konorotiin, kogeer silingisyekyik komi kutitap lolet.

²⁸ Ak ki leenji weeriik che tupcho, “Kageweech silingisyekyuk, ogeero, miitei iman lolennyu.” Ak ki aragenso, kogeeregei kobotandos, koleen, “Nee ni kayaiywech Kamuktaindet?”

²⁹ Ye kingo it anyun icheek kap Jakobo kwandanywa eng' emetap Kanaan, kotetyi ineendet tuguuk tugul che kibiityi eng' ooreet, koleenji,

³⁰ “Ki ng'alaalwech chiito, ne kiptaiyatap emet, eng' koroomnateet, amu ki leen ki segeik che kisegei emet.

³¹ Ago ki kileenji, ‘Ki piik che po iman; ma kisegeik.

³² Kitupche acheek ko ki taman ak aeng', ki weeriigap kwandanyo; ma mi age, ak mi ne ming'in kobooto kwandanyo eng' emetap Kanaan.’

³³ Ak ki leenjech chiichooto, kiptaiyat ne po emonooto, ‘Anaenok ni, ngo oo piik che po iman; obagakwo ng'eetap kamenng'ung' age, ak obe oipchi peek piikwok che miitei kaa.

³⁴ Omutwaa weeriit ne otupche ne ming'in, si anai anyun ale ma oo segeik, ago kaagaa oo piik che po iman. Yeityo agoonok weeriit ne otupche kogeny, ak oyai mung'aaret eng' emet.’ ”

³⁵ Ye kingo abuch lolotinwekwak, ko ki mi chepkondok che po chii tugul lolennyi ko ratotiin. Ye kingo keer icheek kobooto kwandanywa silingisyekwak che ratotiin, koaragenso.

³⁶ Ak ki leenji Jakobo kwandanywa, “Ki obetena lagokyuk, ma mi Joseph, ak ma mi Simion, ak omache omutena Benjamin agine. Ki kobwanjo anyun tuguuchu tugul.”

³⁷ Yeityo koleenji `Reuben kwandanyi, “Tuun ibar weeriikyuk aeng' ngo mamutun ineendet kogeny. Koono kotebee eunekyuk, ak amutun ineendet kogeny.”

³⁸ Ago ki le, “Mobendi ochoortoigei kobooto weeriinnyu amu ki kome ng'eetap kamet, ak ineegei kityo ne ng'etunot. Ak ngot konyoor kiy ne ya eng' panda ne obendi, ogoono ariirat agoi tuun amei.”