TAUNET 40 - Bukuit Ne Tilil

Karwotitaosyegap Otwogik aeng' che po Pharaoh

¹ Kingo pata tuguuchu, kochalwogenji riibindetap tuguuk che kieei, ak riibindetap kwang'set, kiptaiyannywa laitoryatap Misiri.

² Ak ki nereekyi Pharaoh kiboitiinikyik tuwai, ne oo eng' che riibei tuguuk che kieei, ak ne oo eng' che riibei kwang'set,

³ ak ki kiger icheeget eng' ole kiga kiratyi Joseph.

⁴ Ki inde kiptaiyatap riibiik Joseph koriip icheek, ak ki tebi ko kerotin eng' peetuusyek che matya.

⁵ Ki irwotyi tuwai karwotitoet, chii tugul karwotitoennyi eng' kemout agenge, age tugul ko uu weeksetap karwotitoennyi, riibindetap tuguuk che kieei, ak riibindetap kwang'set ne po laitoryatap Misiri, che kiga kiratyi korgoreet.

⁶ Ye kingo nyo Joseph karon ole mi icheek, kogeer kole ki tinyei arageneet.

⁷ Ki teebe Joseph anyun kiboitinichooto po Pharaoh che ki mi tugul ko ratotiin eng' kootap kiptaiyandennyi, koleenji, “Kalya si oaragense rani?”

⁸ Koleenji icheek ineendet, “Kogirwotyi karwotitoet, ak ma mi chii ne imuuchi koboorwech ole teptoi.” Ak koleenji Joseph, “Tos ma po Kamuktaindet weekset? Kaigai anyun omwaiwo.”

⁹ Ki mwachi anyun riibindet ne oo ne po tuguuk che kieei, Joseph, karwotitoennyi, koleenji, “Keero, komi tainnyu keetitap sabibuk eng' karwotitoennyu,

¹⁰ ak ki tinyei keetoto mooriik somok. Ki uu che ing'atos, ak kiyesyo taaptokyik, ak kii sabibuk che ruryotiin.

¹¹ Ki mi eunnyu kigombetap Pharaoh, ak ki abut logoechooto, ak abirchi kigombetap Pharaoh, ak ki ande eutap Pharaoh kigombanooto.”

¹² Koleenji `Joseph ineendet, “Ye kiweech ko uu ni: temenichooto somok ko peetuusyek somok;

¹³ kotomo kobata peetuusyek somogu koeetin Pharaoh, ak koweekyin poisyeng'ung', ak iwe inde eutap Pharaoh kigombennyi, ko uu ye ki cham iyae yu kita ko ii riibindennyi ne po tuguuk che kieei.

¹⁴ Ago myee tuun ibwaata ye tuun kagomyeeit atebeeng'ung', ak irireena anyun, kaigai, ak imwaite eng' kap Pharaoh, si kimaanda eng' kooi.

¹⁵ Amu ki kichoora iman eng' emetap Yahudik, ak ma ayai kiy eng' olito ne yamei ketoorcho keriinget.”

¹⁶ Kingo keer ne oo eng' riibiik che pou kwang'set kole myee weeksonooto, koleenji Joseph, “Koarwotyi agane komi metinnyu ateruusyek somogu che po magatiinik che leelachen,

¹⁷ ak komiitei ne po parak eng' tugul amitwogik alak tugul che po Pharaoh che kwanyei kwong'ik, ago koam toriitik amitwogik che po ateruunooto komi metinnyu.”

¹⁸ Ak ki wolji Joseph koleenji, “Ye kiweech ko ni: ateruusyechooto somok ko peetuusyek somok;

¹⁹ kotom kogeskei peetuusyek somogu kotil Pharaoh meting'ung', ak kosongininin eng' keetit, ak koam toriitik poortang'ung'.”

²⁰ Eng' peetuutap somok, koit peetuut ne ki kisige Pharaoh, koyachi igoorto otwogikyik tugul. Ak ki ieet riibindet ne oo ne po tuguuk che kieei, ak ne oo ne po kwang'set eng' otwogikyik.

²¹ Ki weekyi anyun ne oo ne po riibiik che po tuguuk che kieei, poisyennyi, ak ki igoochi anyun riibindonooto Pharaoh kigombet konam.

²² Ago ki isonginin riibindet ne oo ne po kwang'set, ko uu ye kiga koweekyi `Joseph icheek ole teptoi karwotitoet.

²³ Ago ki ma ibwaat `Joseph ne oo ne po tuguuk che kieei, ki utye ineendet.