TAUNET 4 - Bukuit Ne Tilil

Kain ak Abel

¹ Ki ituiyogei chiichooto ak kwondonyi Hawa, ak ki manach Hawa kosich Kain. Komwa Hawa kole, “Kaasich muren eng' toretetap Kamuktaindet ne Toroor.”

² Ak ki sich kogeny weeriit ne tupcho, Abel. Ki kayagin ne po kechir Abel, ko ki ibati ng'wony Kain

³ Kingo pata peetuusyo, koipchi `Kain Kamuktaindet ne Toroor kagoochinetap rurotetap mbar.

⁴ Ki kwerichi Abel agine iyoteetap tai che akwaen che po akweennyi. Ak ki cham `Kamuktaindet ne Toroor Abel ak kagachinennyi,

⁵ ago ma cham Kain ak kagachinennyi. Ki nereech Kain miising' kot ko siriny togeennyi.

⁶ Koleenji `Kamuktaindet ne Toroor Kain, “Amu nee si inereech inyee? Ak kalya si isiriny togeng'ung'?

⁷ Ngot iyai ne myee, ko tos ma kitaachin? Ago ngo meyai ne myee, ko ruei tengekto eng' kurgat, tokyiningei magennyi, ago magaat anyun ibou.”

⁸ Ki ng'alaalji `Kain ng'eetap kamet Abel. Ak ye kingo ta komi tuwai kewanin, kosetyi `Kain ng'eetap kam Abel ak kobar.

⁹ koteebee `Kamuktaindet ne Toroor Kain anyun koleenji, “Mi ano tupcheng'ung', Abel?” Kowol Kain kole, “Mangen. Tos aa riibindetap tupchennyu?”

¹⁰ koteebee Kamuktaindet koleenji, “Keyai nee inyee? Riirchino kong'etee ng'wony tuugeetap korotiigap tupcheng'ung'!

¹¹ Nguno anyun ko ii chuboot eng' ng'wonyut ne kaiseng'eng' kotaach korotiigap ne otupche kobun euneguk:

¹² si ye ibatii ng'wony, koma iamee kiy. Iegu ne mweoti ak koombenoti eng' ng'wony.”

¹³ Koleenji `Kain Kamuktaindet ne Toroor, “Oo pirennyu kosiir ne tee ne amuuchi ala!

¹⁴ Keer anyuno, keona ra eng' ng'wony komugul ak ma atogu eng' taing'ung'. Aegu ne mweoti ak koombenoti eng' ng'wony ak chii age tugul ne kanyoorwo ko paro.”

¹⁵ Ki ng'at anyun Kamuktaindet ne Toroor kole, “Age tugul ne parei Kain keyaakyin mugetuut konyil tisap.” Ak ki imaar anyun `Kamuktaindet ne Toroor Kain si ma par chii age tugul ne kanyoor.

¹⁶ Ki wo Kain anyun eng' ole mi Kamuktaindet ne Toroor ak kwo komeny emetap Nod ne mi komostap kong'asiis eng' Eden.

¹⁷ Ki ituiyogei Kain ak kwondonyi, kosich Enok. Ki teech nganaseet ne kiguurtoe kainetap weeriinnyi Enok.

¹⁸ Ki sich `Enok Irad; kosich `Irad Meujael; kosich `Meujael Methushael; ak kosich `Methushael Lamek.

¹⁹ Ki itun `Lamek kwonyiik aeng' che kainaikwak ko ki Adah ak Zillah.

²⁰ Ki sich `Adah Jabel ne ineendet ko kwandap icheeget che kimeng'ooti emaisyek ak koyagi kiyagiik.

²¹ Ki kiguure ne tupcho, Jubal; ineendet kwandap icheeget che putei ketubosyek ak ndurerusyek.

²² Ki sich `Zillah agine Tubal-Kain ne ki kitang'indetap sugunonik ak kariik. Ki kiguure chepkametap Tubal-Kain, Naamah.

²³ Ki mwachi `Lamek chebyosokyik koleenji, “Ogas kutinnyu Adah ak Zillah! Oepchi iit ee ng'aleekyuk, kwonyiigap Lamek. Kaabar chii, muren ne kabiro! Neraneet ne kagoguoteno.

²⁴ Ngot ko ki kiyaakyi mugetuut Kain konyil tisap, ko agot Lamek keyookyin konyil tamanwogik tisap ak tisap.”

²⁵ Ak ye kingo testai komeng'iis Adam ak kwondonyi, kosich weeriit age ne kiguure Seth amu ki le, “Kagono Kamuktaindet iyoteet age koogeere Abel ne ki par Kain.”

²⁶ Ki sich Seth agine weeriit ne kiguure Enos. Kong'etee yooto anyun kotoi piik koguur kainetap Kamuktaindet ne Toroor.