TAUNET 37 - Bukuit Ne Tilil

Karwotitaosyegap Joseph

¹ Ki meny anyun Jakobo emetap Kanaan ole kitoo kwan.

² Chu ortinwegap Jakobo. Kiga koit Joseph kenyiisyek taman ak tisap ye ki iyagoti akweetap kerichek kobooto tupchosyekyik. Ki mi weerooto kobooto weeriigap Bila, ak weeriigap Silba, kwonyiigap kwandanyi, ak ki ibu ineendet ng'aleekwak che yaacheen komwachin kwandanywa.

³ Ki chamei anyun `Israel Joseph kosiir weeriikyik tugul, amu kisichei ko kagoosit, ak kinapchi ngoryeet ne kooi ne poochin eunek.

⁴ Ago ye kingo keer weeriik che tupcho kole chamei kwandanywa ineendet kosiir icheek tugul, kowech miising' kot ko mata kocham kong'alaalji ineendet eng' kaalyeet.

⁵ Ki irwotyi Joseph karwotitoet, ak ye kingo mwachi weeriik che tupcho, ko kites icheek kowech ineendet kosiir.

⁶ Ki leenji icheek, “Kaigai ogas karwotitaoni koarwotyi:

⁷ Ogeero, ko ki rate peek che mi ak mobeek eng' mbar, ak kong'eetyo peekyuk che koarat kotononso, yeityo koyiem peekwok che koorat peek chechuuk ak kong'uruukyi.”

⁸ Koleenji weeriik che tupcho, “Ileen tos tuun ilaitoranenech? Anan tos tuun iboiywech?” Ki tes anyun kowech ineendet kosiir amu karwotitaosyekyik ak ng'aleekyik.

⁹ Ki irwotyi karwotitoet age kogeny, ak komwachi tupchosyekyik koleenji, “Ogeero, koarwotyi kogeny karwotitoet: koing'uruukyoo asiista ak arawet ak kecheik taman ak agenge.”

¹⁰ Ago ye ki mwachi kwandanyi ak weeriik che tupcho, ko ki kergong' kwandanyi ineendet ak koteebe koleenji, “Nee karwotitaoni koirwotyi? Tos king'uruukyin agoi ng'wony iman agot anee ak kamenng'ung' ak tupchosyeguk?”

¹¹ Ki am ng'et kong' anyun tupchosyekyik agobo ineendet, ago kigonor kwandanyi ng'olyoondonooto eng' muguleldanyi.

¹² Ki pa tupchosyekyik koyaga akweetap keechiirek che po kwandanywa eng' Shekem.

¹³ Ak ki leenji Israel Joseph, “Tos ma iyagi weeriik che otupche akweet eng' Shekem? Nyoo anyun ayookten iwe ole mi icheeget.” Ak ki leenji ineendet, “Ami yu.”

¹⁴ Koleenji ineendet, “Ui anyun nguno, igeer ngo chamegei tupchosyeguk kobooto akweet; si inyoo imwaiwo.” Ki iyookto anyun kwo eng' atebweetap Hebron. Ki it Shekem,

¹⁵ ak konyoor chii ne ki cheeng'soti eng' keeweet, ak kiteebe ineendet koleenji, “Icheeng'e nee?”

¹⁶ Ak ki le, “Acheeng'oti weeriik che kitupche, kaigai mwaiwo ole iyagisye.”

¹⁷ Koleenji chiichooto, “Kogoba eng' oli, amu ki agas komwaei koleen, Ongebe Dothan.” Ki isup Joseph tupchosyekyik, ak konyoorchi Dothan.

¹⁸ Ki keer icheeget ineendet kota komi ole loo, ak kingo tomo koriik ole mi, kotil ng'aleek ole partoi ineendet.

¹⁹ Ki ng'alaaljigei kole, “Ogeero! Nyoonei chiitap karwotitoet.

²⁰ Ongebe anyun kebar, si kewiirchi keriinget, ak kemwa keele, Kaam tyondo ne ya, si kegeer kiit ne egu karwotitaosyekyik.”

²¹ Ago ki kas Reuben, ak kosar ineendet eng' eunekwak, koleenji, “Amongebar.”

²² Ki leenji Reuben, “Amotumde korotiik. Owiirchi keriingoni mi surkwen, amoyachi kiy ne ya” si kosar ineendet eng' eunekwak, si koweekyi ineendet kwandanyi.

²³ Ye kingo it Joseph anyun ole mi tupchosyekyik, koreegune ineendet ngoryennyi, ngoryonooto kooi ne ki ilaachi.

²⁴ Ki imut anyun ineendet ak kowiirchi keriinget. Ki ma komi peek keriingonooto.

²⁵ Ki tebi ng'wony koamis, ak ye kingo tabendo kogeer piigap Ismaelik kobwanei, kobunu Gilead, kobooto tambeesikwak che kilaei tuguuk che ng'uu ne anyiny, ak mwanik che kinyaise, ak tuguuk che uu igomoik, kochoortagei Misiri.

²⁶ Ki leenji anyun Judah weeriichooto tupcho, “Tos mi kelunet nee ngebar tupchennyo ak keuny korotiikyik?

²⁷ Ongebe anyun kealdochi Ismaelik, ago amongeyachi kiy ne ya; amu ineendet ko tupchennyo, ak ko po korotiikyok.” Ak ki kas tupchosyekyik ng'aleekyik.

²⁸ Ye kingo it yooto chemung'arainik che po Midian, ko ki imoong' icheek Joseph kolong' eng' keriinget, ak koaldochi ineendet Ismaelik eng' chepkondoi tiptem. Ki imut anyun Joseph kwo Misiri.

²⁹ Ye kingo weigei Reuben kwo ole mi keriinget, ak kogeer kole ki ma komi Joseph keriinget, kogereer ngoroikyik.

³⁰ Ki weektagei anyun kwo ole mi tupchosyekyik, ak kole, “Ma miitei lakweet; ara, si awo ano anyun?”

³¹ Ki nam icheek ngoryeetap Joseph ak koeny kwesta, ak koilee ngoryeet korotiik,

³² yeityo koyookto ngoryonooto kooi, keipchi kwandanywa, ak ipkole, “Kaginyooru ngoryoni; inyit anyun ngo ngoryeetap weeriing'ung' anan ma nenyi.”

³³ Ki inyit ineendet ak kole, “Ngoryeetap weeriinnyu iman! Kagoam ineendet tyondo ne ya. Kagetonaton Joseph iman.”

³⁴ Yeityo kogereer Jakobo ngoroikyik, ak kogermenegei kuniet, ak ki riirchi weeriinnyi peetuusyek che chaang'.

³⁵ Ki ng'eetyo weeriikyik tugul ak tiibiikyik tugul kole kogaigai ineendet, ago kiesyo ineendet kigaigai, ak ki le, “Eng' nooto anyun, ariirchini weeriinnyu agoi ait ye mi che ki kobek.” Ki riirchi anyun kwandanyi ineendet.

³⁶ Ak ki alda `Midianik Joseph kwo Misiri, koal Potipar, kiboityotap Pharaoh, kiptaiyatap riibiik.